Hosea 10 - ŊMALƐ KRƆŊKRƆŊ LƐ

¹ Israel tamɔ wain tso ni efũ baa ni eewo. Babaoo ni Israelbii lɛ shwereɔ lɛ babaoo ni amɛmamɔɔ afɔleshãa latɛi ji no. Bɔ ni amɛshikpɔŋ lɛ baa nii lɛ, nakai nɔŋŋ amɛsaa shiui ni amɛkɛjaa lɛ hu ahe.

² Amɛyeee anɔkwa, ni no hewɔ lɛ, agbɛnɛ, amɛbaana he nyɔmɔwoo. Yehowa baakumɔ amɛfɔleshãa latɛi lɛ eshwie shi, ni ebaafite amɛshiui lɛ.

³ Agbɛnɛ amɛaakɛɛ akɛ, “Wɔbɛ maŋtsɛ ejaakɛ wɔsheee Yehowa gbeyei. Shi kɛji wɔyɛ maŋtsɛ po lɛ mɛni ebaanyɛ efee ehã wɔ?”

⁴ Amɛwieɔ huu kɛkɛ ni amɛleee nɔ ni amɛwieɔ lɛ. Amɛwoɔ shi babaoo ni amɛle akɛ amɛyeŋ nɔ, ni amɛkpãŋɔ kpãŋmɔi yaka ni sɛɛnamɔ bɛ he. No hewɔ lɛ, toigbalamɔ baatsɔ̃ tamɔ ebɔɔ ŋmei ni efɛ̃ shi yɛ ŋmɔshi akofii anɔ ahã amɛ.

⁵ Samaria maŋ bii lɛ aaashe gbeyei, ni amɛbaaye ŋkɔmɔ yɛ Bet-Aven shika tsinabi lɛ hewɔ. Amɛ kɛ wulɔmɛi lɛ ni jaa tsinabi lɛ baawo yara amɛfo yɛ enyam ni afo sɛɛ lɛ hewɔ.

⁶ Anɔkwa, abaawo shika tsinabi lɛ kɛya koni akɛyake Asiria maŋtsɛ kpele lɛ. Ni no baahã hiɛgbele amɔ Israel, ni ehiɛ baashwie shi yɛ ŋaa gbonyo toi ni ebo lɛ hewɔ.

⁷ Samaria maŋtsɛ aaatsɔ̃ tamɔ tso kuku ni kplaŋɔ yɛ faa hiɛ.

⁸ Betel gɔji lɛ ayiteiaŋ hei ni Israelbii lɛ jaa amãgãi yɛ ni amɛkɛgbo toi lɛ, aaakpãtã fɛɛ hiɛ. Ŋmei kɛ aŋlɛŋlɛi baakwɛ̃ yɛ afɔleshãa latɛi lɛ anɔ yɛ jɛi. Gbɔmɛi nɛɛ baabolɔ amɛkɛɛ gɔji lɛ akɛ, “Nyɛhaa wɔnɔ!” Ni amɛaakɛɛ gɔ̃ŋkpɔi lɛ hu akɛ, “Nyɛbashwiea wɔnɔ!”

Yehowa bu Israel fɔ

⁹ Yehowa kɛɛ akɛ, “Israel, ofee esha kɛjɛ Gibea esha lɛ nɔ beebe, ni ohiɛ esha lɛ mli oofee lolo. Mɛni hewɔ esaaa akɛ ta ni afã ashi nɔshafeelɔi lɛ ninaa bo yɛ Gibea?

¹⁰ Mibate shi mawo toigbolɔi lɛ, ni mibagbala amɛtoi bɔ ni misumɔɔ. Maji baafee ekome awo Israelbii, ni abaagbala amɛtoi yɛ eshai enyɔ lɛ ni amɛfee lɛ ahewɔ.

¹¹ “Nyɛsɛɛ ko lɛ Israel tamɔ tsina oblayoo ni atsɔse lɛ, ni enyaa he kɛ̃, akɛ akɛ lɛ miigbee ŋmaa lɛ. Enɛ hewɔ lɛ, miwooo ekuɛ fɛɛfɛo lɛ kɔŋtso. Shi agbɛnɛ mibawo Israel kuɛ kɔŋtso. Yuda baashãtã tsina kɔi ekɛhu; ni Israel baaninɛ nɔ ni ehu lɛ.”

¹² Nyɛfea nii ni ja tamɔ aduɔ wu kpakpa, ni nyɛaakpa misuɔmɔ ni sɛɛ efooo lɛ yibii. Nyɛjea wala hee shishi tamɔ asaa shikpɔŋ atoɔ nidumɔ, ejaakɛ be yɛ lolo bɔ ni sa ni nyɛkɛaatao Yehowa sɛɛgbɛ kɛyaashi eeeba ebajɔɔ nyɛ tamɔ nu nɛɔ shwieɔ nii anɔ.

¹³ Nyɛdu efɔŋ, ni nyɛkpa nɔsha, ni nyɛye yibii ni amale wo: “Ejaakɛ nyɛkɛ nyɛhiɛ fɔ̃ nyɛtayaa shwiilii lɛ kɛ hii kãkãlɔi lɛ ayifalɛ nɔ.

¹⁴ No hewɔ lɛ, ta aaabanina nyɛ, ni aaakpãtã nyɛmɔji lɛ fɛɛ ahiɛ tamɔ bɔ ni Maŋtsɛ Shalman kpãtã Bet-Arbel maŋ lɛ hiɛ yɛ ta mli, ni eplenee emli yeifɔyei kɛ amɛbii fɛɛ lɛ.

¹⁵ Nakai nɔ ko pɛpɛɛpɛ baaba nyɛnɔ, nyɛ Betelbii. Efɔŋ kpeteŋkple ni nyɛfee lɛ hewɔ lɛ nyɛmaŋtsɛ baagbo leebi maŋkpa.”