Hiob 9 - ŊMALƐ KRƆŊKRƆŊ LƐ

Hiob wiemɔ

¹ Kɛkɛ ni Hiob hã Bildad hetoo ekɛɛ:

² Mile lɛɛlɛŋ akɛ nakai ji sane lɛ, shi te aaafee tɛŋŋ ni adesa aja yɛ Nyɔŋmɔ hiɛŋ?

³ Kɛji mɔ ko kɛɛ ekɛ Nyɔŋmɔ aaataa naa lɛ, mɔ lɛ nyɛŋ Nyɔŋmɔ saji akpe mli ekome kɛkɛ naa ejie.

⁴ Nilelɔ ji lɛ, ni eyɛ hewalɛ; namɔ ete shi ewo lɛ, ni eye kunim pɛŋ?

⁵ Efãmɔɔ gɔji, ni amɛleee kwraa kɛji etsɔ̃mɔ amɛ ebu shi yɛ emlifu mli.

⁶ Ehosoɔ je lɛ kɛmɔɔ eshishitoo; ni ekulashiŋi ni tere je lɛ hosoɔ.

⁷ Efãa hulu, ni ehiii lɛ shitee; ni esɔoɔ ŋulamii anaa, ni amɛkpɛɛɛ.

⁸ Lɛ ekoome ekpã ŋwɛi mli elɛɛ shi, ni enaanaa bonso nɔ yɛ ŋshɔŋ.

⁹ Lɛ ebɔ Jeŋ kpawo kɛ Oŋwɛ kɛ Wuɔ kɛ ebii kɛ wuoyigbɛ ŋulamii lɛ.

¹⁰ Efeɔ nibii wuji ni anaaa naa; kɛ naakpɛɛnii ni aleee amɛyibɔ.

¹¹ Naa Nyɔŋmɔ tsɔ̃ɔ mihe kɛhoɔ, ni minaaa lɛ; ehoɔ eyaa, ni miyooo lɛ.

¹² Naa, nɔ ni etaoɔ lɛ ekɔɔ; namɔ aaanyɛ enaa atsi? Namɔ aaanyɛ akɛɛ lɛ akɛ, “Mɛni ofeɔ nɛɛ?

¹³ Nyɔŋmɔ eŋmɛŋ emlifu lɛ he, ni mɛi ni ye bua Rahab lɛ aaabakua lɛ.

¹⁴ Te mafee tɛŋŋ mahã lɛ hetoo hu? Mɛɛ wiemɔi anɔ matsɔ̃ mi kɛ lɛ awie?

¹⁵ Yɛ mli akɛ tɔ̃mɔ ko bɛ mihe moŋ, shi minyɛŋ lɛ hetoo mahã; hewɔ lɛ fai moŋ makpa mikojolɔ lɛ.

¹⁶ Kɛji mitsɛ lɛ ni ehere minɔ po, miheŋ miyeŋ akɛ eebo mi toi.

¹⁷ Ejaakɛ ekɛ ahum kumɔɔ mi, ni ehãa mifaji lɛ faa yakatswaa.

¹⁸ Ehãaa mana mumɔhe, shi ewoɔ mi jaramɔ moŋ.

¹⁹ Kɛji aaye lɛ hewalɛ naa lɛ, naa, lɛ nɛ; ni kɛji aafee jalɛnii lɛ, namɔ kɛ lɛ kedeɔ?

²⁰ Yɛ mli akɛ tɔ̃mɔ ko bɛ mihe, kɛ̃lɛ mi diɛŋtsɛ minaa wiemɔ baabu mi fɔ. Shwamɔ ko bɛ mihe moŋ nɛ, shi eeetsɔ̃ɔ akɛ mihiii.

²¹ Shwamɔ ko bɛ mihe, shi mitsɛɛɛ mihe nɔ ko. Jeŋshihilɛ eje mitsine.

²² Fɛɛ ekome!” No hewɔ lɛ, miikɛɛ akɛ, “Jeŋshihilɛ eje mitsine; mɔ ni shwamɔ bɛ ehe, kɛ mɔ fɔŋ lɛ, Nyɔŋmɔ baakpãtã amɛ fɛɛ amɛhiɛ.

²³ Kɛji osharã gbe mɔ ko ni tɔ̃mɔ bɛ ehe lɛ, Nyɔŋmɔ ŋmɔɔ.

²⁴ Ekɛ je lɛ ewo mɔ fɔŋ dɛŋ; eha enɔ kojolɔi ahiɛ. Kɛjeee Nyɔŋmɔ ni lɛ, namɔ ni mɔ?

²⁵ “Migbii lɛ ahe yɛ oya fe foijolɔ, amɛhoɔ amɛyaa, ni amɛnaaa nɔ kpakpa ko.

²⁶ Amɛhoɔ amɛyaa shwiaa tamɔ glã lɛji, tamɔ okropɔŋ gbaa eyiɔ kooloo nɔ.

²⁷ Kɛji mikɛɛ majie mihiɛ yɛ mikɔmɔi lɛ anɔ, ni masaa mihiɛ, ni mana tsui lɛ,

²⁸ mipiŋmɔi lɛ aaawo mihe gbeyei moŋ, ejaakɛ mile akɛ obuŋ mi bem.

²⁹ Ni abaabu mi fɔ kɛ̃; mɛɛba mɔ magba mihe naa yaka?

³⁰ Kɛji miju mihe kɛ snoo nu, ni mifɔ midɛ̃ hu kɛ samla lɛ,

³¹ kɛ̃lɛ Nyɔŋmɔ, oootsi mi owo bu mli; ni mi diɛŋtsɛ mihe atade tete aaahã mihe anyaŋe mi.

³² Ejaakɛ Nyɔŋmɔ jeee adesa tamɔ mi koni mahã lɛ hetoo; ni wɔya ni akojo wɔ yɛ kojomɔhe.

³³ Mɔ ko bɛ ni aaadamɔ wɔteŋ, ni eeeŋɔ enine efɔ̃ wɔyi enyɔ lɛ fɛɛ wɔnɔ, ni ekpãtã wɔteŋ.

³⁴ Hã ekpa mi piŋmɔ, koni ehe ŋmiŋmi akamɔ mi.

³⁵ Kɛkɛ lɛ mawie, ni lɛ gbeyeishemɔ bɛ mli; ejaakɛ jeee nakai miyɔɔ.”