Hiob 8 - ŊMALƐ KRƆŊKRƆŊ LƐ

¹ Kɛkɛ ni Bildad, Shuhinyo lɛ, here Hiob nɔ ekɛɛ:

² “Mɛɛbe po ooohiɛ nɛkɛ wiemɔi nɛɛ amli kɛyashi, onaa wiemɔi ni tamɔ ahum wulu nɛɛ?

³ Ani Nyɔŋmɔ tsɔ̃ɔ jalɛ hiɛ ebuɔ shi? Aloo Ofe lɛ kɔdɔ̃ɔ etoi eyeɔ sane?

⁴ Kɛji obii lɛ tɔ̃ enɔ lɛ, no lɛ egbala amɛtoi bɔ ni sa amɛ.

⁵ Kɛji obaatao Nyɔŋmɔ sɛɛgbɛ ni okpa Ofe lɛ fai,

⁶ ni kɛji ohe tse ni oja lɛ, no lɛ anɔkwa, Nyɔŋmɔ baaye ebua bo, ni ebaaduro bo we kpakpa ekoŋŋ.

⁷ Osa shihilɛ lɛ baafee nɔ ko bibioo, shi owɔsɛɛ shihilɛ baafe nɔ wulu.

⁸ “Ofainɛ, bo lɛ bi tsutsu yinɔbii, ni obo nɔ ni amɛtsɛmɛi ekpa shi ni amɛna lɛ toi.

⁹ Ejaakɛ wɔ lɛ, nyɛ kpaakpa nyɛ afɔ wɔ, ni wɔleee nɔ ko nɔ ko, ejaakɛ wɔgbii yɛ jeŋ tamɔ hɔ̃ɔŋ.

¹⁰ Ani blematsɛmɛi nɛɛ etsɔŋ bo nii; ani amɛgbaŋ bo, ani amɛwieŋ amɛnilee mli wiemɔi?

¹¹ “Ani adã kwɛ̃ɔ yɛ he ni ŋmiamɔ bɛ lo? Ani glã shwereɔ yɛ he ni nu bɛ?

¹² Be mli ni amɛgba afofro, ni anako afolɔ lɛ, amɛŋalaa amɛshiɔ jwɛi krokomɛi fɛɛ.

¹³ Mɛi fɛɛ ni hiɛ kpaa Nyɔŋmɔ nɔ lɛ, bɔ ni amɛnaagbee yɔɔ nɛ; mɔ ni sheee Nyɔŋmɔ gbeyei lɛ, ehiɛnɔkãmɔ aaafite.

¹⁴ Ehiɛnɔkãmɔ mli tserɛɔ, ehiɛnɔkãmɔ lɛ tamɔ anaanu ntaŋ.

¹⁵ Ehoɔ ekpasaa ewe lɛ, shi ewe lɛ nyɛɛɛ shi ema; emɔɔ mli waa; shi no nyɛɛɛ lɛ asɔo.”

¹⁶ Gbɔmɔ shwereɔ yɛ hulu hiɛ, ni niji ni etsɛ̃rɛ lɛ haa etrom lɛ nɔ.

¹⁷ Efãi blaa tɛi kui, etsɔ̃ɔ tɛsai amli tete.

¹⁸ Kɛji akpãtã ehiɛ yɛ he ni eyɔɔ lɛ, no lɛ he ni ehi lɛ diɛŋtsɛ baatso yɛ ehe ekɛɛ akɛ, “Minako bo dã!”

¹⁹ Shi naa, miishɛɛ ni eyɔɔ ji akɛ gbɔmɛi krokomɛi baakwɛ̃ kɛnyiɛ esɛɛ.

²⁰ “Naa, Nyɔŋmɔ kwaaa mɔ ni tɔ̃mɔ ko bɛ ehe; ni asaŋ etooo he nine ehãaa efɔŋfeelɔi.

²¹ Ebaahã odaa aaayi obɔ̃ kɛ ŋmɔlɔ, ni odaa ayi obɔ kɛ oshebɔɔ.

²² Ohenyɛlɔi ahiɛ aaagboi, ni yiwalɔi awei aaalaaje.”