Hiob 7 - ŊMALƐ KRƆŊKRƆŊ LƐ

¹ “Ani gbɔmɔ wala yɛ shikpɔŋ nɛɛ nɔ jeee tɔlɛ kɛ deŋmegbomɔ? Ani ewala gbii tamɔɔɔ apaafonyo wala gbii?

² Ani etamɔɔɔ bɔ ni apaafonyo kwɛɔ epaabɔɔnii gbɛ lɛ?

³ Nakai mihi shi shwɛm nyɔji abɔ ni mikã jaramɔ mli nyɔɔŋnyɔɔŋ fɛɛ.

⁴ Kɛji miho mikã shi lɛ, bɔ ni mibablaa shi nɛ. No hewɔ lɛ, nyɔɔŋ hu sɛɛ jɛkɛɔ, ni mibiɔ mihe akɛ, mɛɛbe je aaatsɛre ni mate shi?”

⁵ Miheloo ewo gɔgɔmi kɛ muji; miheloo lɛ hiɛ gbiɔ kɛkɛ lɛ eflɛ.

⁶ Migbii lɛ hoɔ oyayaaya fe mamalolɔ akokrowa tete, ni amɛmiitã ni hiɛnɔkãmɔ ko bɛ.

⁷ “Nyɔŋmɔ, kaimɔ akɛ miwala lɛ kɔɔyɔɔ ni, ni nɔ kpakpa bɛ ni mihiŋmɛi baana dɔŋŋ.

⁸ Mɔ hiŋmɛi ni naa mi nɛɛ, enaŋ mi dɔŋŋ. Ookwɛ mi nɛkɛ nɔŋŋ, ni malaaje.

⁹ Bɔ ni atatu tseɔ, ni elaajeɔ lɛ, nakai mɔ ni yaa gbohiiaje ekuuu esɛɛ ebaaa dɔŋŋ;

¹⁰ ekuuu esɛɛ ebaaa ewe dɔŋŋ, ni hiɛ kpaa enɔ kwraa.

¹¹ No hewɔ lɛ, mimuaŋ minaa! Mikɛ mimumɔŋ hejaramɔ baawie; mibawie misusuma nidɔɔnii.

¹² Ani ŋshɔ loo bonso ji mi hewɔ ni otoɔ mɔ ko ni ebu mihe lɛ?”

¹³ Kɛji mikɛɛ akɛ, “Misaa aaashɛje mimii, ni mipiŋmɔ he aaajɔ yɛ misaa nɔ lɛ,

¹⁴ kɛkɛ lɛ okɛ lamɔi miiwo mihe gbeyei, ni okɛ ninai hãa ŋmiŋmi mɔɔ mi.

¹⁵ Ni no hewɔ lɛ, masumɔ ni amia misɛ̃ ni magbo moŋ fe nɔ ni makã lootãa wuiwui nɛɛ amli.

¹⁶ Jeŋhilɛ eje mitsine; mihiŋ shi kɛyaŋ naanɔ. Ŋmɛɛmɔ mihe, ejaakɛ miwala tamɔ kɔɔyɔɔ.

¹⁷ Namɔ ji gbɔmɔ, hewɔ ni obuɔ ehe akɔntaa nɛkɛ, ni ojwɛŋɔ ehe kwraa po;

¹⁸ ni osaraa lɛ daa leebi, ni okaa lɛ okwɛɔ hiŋmɛitswaa fɛɛ hiŋmɛitswaa nɛɛ?

¹⁹ Mɛɛ beyinɔ okpaŋ nii kwɛmɔ; mɛɛbe po oooŋmɛɛ mihe, koni mana be mami misɛŋ nu?

²⁰ Bo adesai ahebulɔ, kɛji mifee esha lɛ, mɛni po mina mifee bo? Mɛɛba ni ojie ohiɛ oka mi? Mɛɛba mitsɔ̃ jatsu mihã mi diɛŋtsɛ nɔŋŋ mihe nɛɛ?

²¹ Mɛɛba okɛ mitɔ̃mɔi lɛ efaaa mi koni ofɔ minɔsha lɛ yɛ mihe? Ejaakɛ agbɛnɛ su mli makã ni obaatao mi, shi onaŋ mi yɛ he ko he ko.”