Hiob 6 - ŊMALƐ KRƆŊKRƆŊ LƐ

Hiob wiemɔ

¹ Hiob here nɔ, ni ekɛɛ akɛ,

² “Oo, mina ni aŋmɛ minaagbai kɛ mihejaramɔ fɛɛ yɛ nsɛni mli.

³ Ejaakɛ aaana akɛ etsii fe ŋshɔnaa shia, ni no hewɔ ni minaa wiemɔi lɛ efeŋ yiŋ flɛflɛ lɛ.

⁴ Ejaakɛ Ofe lɛ etsɛ̃rɛ mi gãi, ni miinu gãimlibii lɛ anaa ebɔɔ lɛ he yɛ mimli; Nyɔŋmɔ he ŋmiŋmi emɔ mi emuu.

⁵ Ani ŋaŋ teji bolɔɔ be ni ena jwɛi eekpe, aloo tsina bolɔɔ yɛ eniyeniiashi?

⁶ Ani ayeɔ nii mutɛ ni ŋoo bɛ mli? Aloo mɛɛ ŋɔɔmɔ yɔɔ wuɔwɔlɔ mli eyɛŋ lɛ mli?

⁷ Nii ni misusuma sumɔɔɔ akɛ eyeɔ lɛ nomɛi nɔŋŋ etsɔ̃ miniyenii ni minyaŋeɔ nɛɛ.

⁸ “Oo, mina ni kulɛ mina mitaomɔnii; ni Nyɔŋmɔ hã mi mishweenii.

⁹ Mina ni kulɛ Nyɔŋmɔ akpãtã mihiɛ; eeeŋmɛ enine gbɛ ni etsɛ̃rɛ mimli!

¹⁰ Kulɛ mimii aaashɛ mihe, mimli aaafli mi pam yɛ minɔnaa ni akɛfaaa lɛ fɛɛ sɛɛ, ejaakɛ mikwako Mɔ Krɔŋkrɔŋ lɛ wiemɔi lɛ.

¹¹ Mihewalɛ enyiɛ hewɔ ni mamia mihiɛ mamɛ? Mɛɛ ji minaagbee hewɔ ni mato mitsui shi?

¹² Ani mihewalɛ lɛ tɛ hewalɛ ni? Loo miheloo lɛ akɔɔble ni?

¹³ Anɔkwa, mibɛ hewalɛ ko dɔŋŋ, minyɛmɔ fɛɛ etã.

¹⁴ “Mɔ ni kwaa enaanyo ejurɔfeemɔ lɛ, esheee Ofe lɛ gbeyei.

¹⁵ Minyɛmimɛi lɛ yeee anɔkwale tamɔ faa ni hoɔ, tamɔ jɔɔ mli faa ni hoɔ kɛyaa ni eŋalaa;

¹⁶ amɛhiɛ diɔ oookɛɛ aisi, ni amɛyi tɔ kɛ nyɔŋmɔŋtɛ yɛŋ muɛmuɛ ni atsɛɔ lɛ snoo.

¹⁷ Kɛji dɔlɛ ba pɛ amɛlaaje; kɛ jeŋ dɔ pɛ amɛmii.

¹⁸ Gbɛnyiɛlɔi asafo gbaa afã kɛjeɔ amɛgbɛ nɔ, amɛyafoɔ shi kɛtaoɔ nu yɛ shiaŋa lɛ nɔ ni amɛhiɛ kpãtãa.

¹⁹ Tema kɛ Sheba gbɛfalɔi asafoi taoɔ kɛ hiɛnɔkãmɔ,

²⁰ shi amɛhiɛ gboiɔ akɛ amɛŋɔ amɛhiɛ amɛfɔ nɔ; ejaakɛ kɛji amɛshɛ he pɛ, amɛhiɛ shwieɔ shi.

²¹ Bɔ pɛ ni nyɛ ji nyɛhã mi nɛ, mimanehulu ni nyɛna lɛ, ehã nyɛmiishe gbeyei.

²² Ani mibi akɛ nyɛke mi nɔ ko, aloo nyɛkɛ nyɛnii ni nyɛyɔɔ ayawo mɔ ko daaŋnii ahã mi?

²³ Aloo nyɛhere mi yɛ henyɛlɔ lɛ dɛŋ, aloo nyɛkpɔ̃ mi yɛ yiwalɔi adɛŋ?

²⁴ Nyɛtsɔa mi; nyɛhãa manua shishi, koni nɔ mli ni mitɔ̃ yɛ lɛ, mafee diŋŋ.

²⁵ Anɔkwa wiemɔ yɛ hewalɛ; shi mɛni kãmɔ ni nyɛkãa mi lɛ baanyɛ etsu?

²⁶ Ani nyɛsusuɔ akɛ nyɛaanyɛ nyɛkã gbɔmɔ yɛ wiemɔ hewɔ, be mli ni mɔ ni bɛ hiɛnɔkãmɔ wiemɔ lɛ, kɔɔyɔɔ ni lɛ?

²⁷ Nyɛaafɔ̃ awusa nɔ oshiki, ni nyɛaaye nyɛnaanyo yi jara.

²⁸ Shi agbɛnɛ, nyɛtɛjea nyɛhiɛ nyɛkwɛa mi; ejaakɛ mimaleŋ mitsɔŋ nyɛ kɔkɔɔkɔ!

²⁹ Nyɛfainɛ, awa jɛi! Nyɛkafea esha; awa jɛi, misane lɛ ja.

³⁰ Ani wiemɔ ko ni ejaaa eje minaa dã? Ani mileee nɔ kpakpa yɛ nɔ fɔŋ he?”