Hiob 42 - ŊMALƐ KRƆŊKRƆŊ LƐ

¹ Kɛkɛ ni Hiob here Yehowa nɔ ekɛɛ,

² “Yehowa, mile akɛ onyɛɔ nɔ fɛɛ nɔ ofeɔ, ni oyiŋtoo ko bɛ ni aaanyɛ naa aku.

³ Namɔ hu ji mɔ ni kɛ wiemɔi ni nilee bɛ mli teɔ nilee nɔ? No hewɔ lɛ, miwie nibii ni minuuu shishi, nibii ni ahe yɔɔ naakpɛɛ tsɔ̃ hã mi bɔ ni minuuu amɛshishi.

⁴ Okɛɛ mi akɛ, ‘Bo toi; ni mawie. Mibabi bo sane koni ohã mi hetoo!’

⁵ Mitoi kɛkɛ mikɛnu ohe, shi agbɛnɛ mihiŋmɛi ena bo.

⁶ No hewɔ lɛ, eedɔ mi, ni miishwa mihe yɛ sũ kɛ lamlu mli.”

Sane lɛ fɛɛ naagbee

⁷ Be ni Yehowa kɛ Hiob ewie nɛkɛ sɛɛ lɛ, Yehowa kɛɛ Elifaz, Temannyo lɛ, akɛ, “Mimli ewo bo kɛ onanemɛi enyɔ lɛ fɛɛ ala, ejaakɛ nyɛwieee mihe bɔ ni ja tamɔ mitsulɔ Hiob fee lɛ.

⁸ No hewɔ lɛ, agbɛnɛ nyɛmɔmɔa tsinahii kpawo kɛ ojwɛnii hu kpawo kɛyaa mitsulɔ Hiob ŋɔɔ koni nyɛkɛyashãa shãa afɔle nyɛhãa nyɛhe. Mitsulɔ Hiob baakpa fai ehã nyɛ ni mibabo efaikpamɔ lɛ toi, ni mikɛ nyɛ yeŋ yɛ nyɛkooloofeemɔ lɛ naa, ejaakɛ nyɛwieee mihe bɔ ni ja tamɔ Hiob fee lɛ.”

⁹ No hewɔ lɛ, Elifaz, Temannyo lɛ, kɛ Bildad, Shuhinyo lɛ, kɛ Zofar, Naamanyo lɛ, yiŋ amɛtee ni amɛyafee bɔ ni Yehowa kɛɛ amɛ lɛ; ni Yehowa mɔ Hiob faikpamɔ lɛ mli.

¹⁰ Be ni Hiob ekpa fai ehã enanemɛi lɛ sɛɛ lɛ, Yehowa hã Hiob saa eshwere ekoŋŋ. Yehowa ku nii fɛɛ ni Hiob yɔɔ sa lɛ ebɔ he toi enyɔ ehã lɛ.

¹¹ Kɛkɛ ni Hiob nyɛmimɛi hii lɛ kɛ enyɛmimɛi yei lɛ fɛɛ kɛ mɛi fɛɛ ni le lɛ sa lɛ ba eŋɔɔ; ni amɛ kɛ lɛ ye nii, ni amɛye lɛ ŋkɔmɔ, ni amɛshɛje emii yɛ sane fɔŋ ni Yehowa hã ye lɛ lɛ hewɔ. Amɛteŋ mɔ fɛɛ mɔ ke Hiob jwiɛtɛi kuku kɛ shika ga.

¹² Yehowa jɔɔ Hiob yɛ enaagbee wala beiaŋ fe bɔ ni ejɔɔ lɛ tsutsu lɛ. Hiob na gwantɛŋi akpei nyɔŋma kɛ ejwɛ kɛ yoomai akpei ekpaa kɛ tsinai akpei enyɔ kɛ teji yei akpe kome.

¹³ Esaa efɔ bihii kpawo kɛ biyei etɛ̃.

¹⁴ Ewo ebiyoonukpa lɛ gbɛi akɛ Yemima, ebiyoo ni ji enyɔ lɛ ewo lɛ Kezia, ni ebiyoo ni ji etɛ̃ lɛ ewo lɛ Keren-Hapak.

¹⁵ Yoo ko kwraa bɛ shikpɔŋ tso muu lɛ fɛɛ nɔ ni ehe yɛ fɛo tamɔ amɛ. Amɛtsɛ Hiob hã amɛ egboshinii lɛ eko tamɔ ehã amɛnyɛmimɛi hii lɛ.

¹⁶ Sane nɛɛ sɛɛ lɛ Hiob saa ehi shi afii oha kɛ nyɔŋmai ejwɛ, ni ena eshwiei kɛyashi amɛyinɔ ni ji ejwɛ nɔ bii.

¹⁷ Ni Hiob gbo be ni eji nuumo kotokoto ni eye afii babaoo diɛŋtsɛ lɛ.