Hiob 41 - ŊMALƐ KRƆŊKRƆŊ LƐ

¹ “Obaanyɛ okɛ kpoŋ asha leviatan aloo okɛ kpãa afi elilɛi akpɛtɛ edaaŋ?

² Ani ooonyɛ owo egugɔŋ taŋkpee aloo okɛ kpoŋ ala ekadaa?

³ Ani eekpa bo fai babaoo? Aloo ekɛ bo aaawie naajɔlɛ wiemɔi?

⁴ Ani ekɛ bo aaakpãŋ akɛ oŋɔ lɛ ofee otsulɔ kɛya naanɔ lo?

⁵ Ani okɛ lɛ baashwɛ tamɔ akɛ loofɔlɔ shwɛɔ, aloo obaafi lɛ ohã oblayei lo?

⁶ Ani wolɛi baaba amɛbaye enaa? Ani amɛfolɔ emli amɛhã jarayelɔi lo?

⁷ Ani ooonyɛ otsulɔ akplɔi owo ehewojiaŋ obɔ̃, aloo oootsulɔ eyitso kɛ wuoyaa akplɔ?

⁸ Kɛ onine ata ehe okwɛ, ni ofeŋ nakai ekoŋŋ; ohiɛ kpaŋ nɔmɔ ni nyiɛ sɛɛ nɔ.

⁹ Naa, mɔ fɛɛ mɔ ni baana leviatan lɛ enijiaŋ jeɔ wui, ni egbeɔ shi.

¹⁰ Kãkãlɔ ko kãkãlɔ ko bɛ ni aaanyɛ awo ehiɛ la. Belɛ namɔ ji mɔ ni aaanyɛ mi mihiɛ adamɔ mɔ?

¹¹ Namɔ kwraa etsɔ̃ hiɛ efee nɔ ko ehã mi, koni mato lɛ najiaŋ? Nɔ fɛɛ nɔ ni yɔɔ jeŋ lɛ, minɔ ni.

¹² Mibawie eniji kɛ enaji kɛ ehewalɛ kpele kɛ egbɔmɔtso he daa.

¹³ Mɔ ko bɛ ni baanyɛ ehewolo lɛ ekpɔ; aloo eta enyanyɔji nta lɛ ahe.

¹⁴ Namɔ baanyɛ agbele edaa kɛyanina enyanyɔji ni yɔɔ gbeyei lɛ.

¹⁵ Ehe totoi ni ato amɛ klɛmpɛiklɛmpɛi tsara nɔ ha ekoto sɛɛ, ni atsara amɛ tamɔ nɔ ni asɔo amɛnaa.

¹⁶ Eko tsa eko nɔ tsikitsiki, bɔ ni kɔɔyɔɔ tete nyɛɛɛ amɛteŋ etsɔ̃.

¹⁷ Akɛ eko etsa eko nɔ, amɛkpɛtɛ amɛhe bɔ ni ehiii amɛteŋ tsemɔ.

¹⁸ Kɛji etsine lɛ ekpɛlɛɔ la, ni ehiŋmɛiiaŋ tamɔ leebi hulu haai.

¹⁹ La fãa kɛjɛɔ edaaŋ tamɔ haai; la srɛmii fɛlɛɔ kɛjɛɔ edaaŋ.

²⁰ Egugɔŋ fãa lasu tamɔ lamɔ fãa kɛjɛɔ kukwɛi ni ma la nɔ mli, loo tamɔ jwɛi ni miishã lasu.

²¹ Egugɔŋ mumɔ tsɛ̃ɔ ŋai, ni edaaŋ fãa la.

²² Ekuɛ mli ehewalɛ yɔɔ, hewɔ lɛ eyɛ gbeyei kɛji oyaje ehiɛgbɛ.

²³ Eheloo lɛ kpɛtɛ ehe kpɛŋŋ bɔ ni anyɛɛɛ akpɔ.

²⁴ Etsui wa tamɔ tɛ, ewa tamɔ wiɛ.

²⁵ Kɛji ewo ehe nɔ lɛ, kãkãlɔi sheɔ gbeyei; ŋmiŋmi mɔmɔɔ amɛ kɛji ekãnya ehe.

²⁶ Kɛji abã lɛ klante lɛ, efooo; ni akplɔ loo gãi loo loogbee akplɔ nyɛɛɛ lɛ afo.

²⁷ Dade tamɔ jwɛi ni egbi, ni akɔɔble tamɔ tso ni ekpɔtɔ hã lɛ.

²⁸ Gãimlibi wooo lɛ foi; ni aklomia mli tɛ tsɔ̃ɔ gbetseli hãa lɛ.

²⁹ Tsokpoti tamɔ gbetseli, ni efeɔ lɛ ŋmɔlɔ kɛji atsɛ̃rɛ lɛ akplɔ.

³⁰ Emlishi totoi lɛ tamɔ gbɛ ko naabu sakasaka lɛ, ni ehoɔ ekãa ŋmɔtɔ lɛ mli tamɔ ŋmãagbeemɔ tso.

³¹ Ehãa ŋshɔ lɛ tswaa tamɔ nula; ni afui ni etswaa lɛ tamɔ mu ni ma la nɔ.

³² Esɛɛ mo kpɛɔ ni ehãa ŋshɔ lɛ tswaa afui tamɔ waŋ.

³³ Esaso kooloo ni sheee nɔ ko nɔ ko gbeyei bɛ shikpɔŋ lɛ nɔ.

³⁴ Ebuuu nɔ ko nɔ ko ni he wa, lɛ ji kooloi hewalɔi fɛɛ atsɛ.”