Hiob 40 - ŊMALƐ KRƆŊKRƆŊ LƐ

¹ Kɛkɛ ni Nyɔŋmɔ kɛɛ Hiob akɛ,

² “Aso mɔ ni miitao mɔ he tɔ̃mɔ ekɛɛ lɛ, ebaanyɛ ekɛ Ofe lɛ ataa naa? Mɔ ni kɛ Nyɔŋmɔ miitaa naa lɛ, hã ehã hetoo.”

³ Kɛkɛ ni Hiob here Yehowa nɔ ni ekɛɛ,

⁴ “Naa, mijeee mɔ ko; mɛɛ hetoo mahã? Mikɛ minine eto minaabu.

⁵ Miwie shi kome, ni mitoŋ nɔ dɔŋŋ. Miwie shii enyɔ; ni miyaŋ nɔ dɔŋŋ.”

⁶ Kɛkɛ ni Yehowa jɛ ahum lɛ mli ekɛ Hiob wie ekoŋŋ,

⁷ “Miamɔ tamɔ nuu; mibabi bo sane koni ojie mi naa.

⁸ Aso ooka ni otsɔ̃ɔ akɛ mitɔ̃? Oobu mi fɔ koni oye bem?

⁹ Aso ohewalɛ shɛɔ Nyɔŋmɔ nɔ lɛ, ni obaanyɛ ohã ogbee ashi tamɔ Nyɔŋmɔ nɔ lɛ lo?

¹⁰ Kɛji nakai lɛ, no lɛ wulamɔ ohe koni ogbojee akwɔ ni onunyam ada kpele.

¹¹ Grimɔ kɛ mlifu ni okɛnina hewolɔ fɛɛ hewolɔ koni oba lɛ shi;

¹² hɛɛ hewolɔ fɛɛ hewolɔ lɛ oba lɛ shi, ni otsirɛ yiwalɔi otswia shi yɛ hei ni amɛdamɔ.

¹³ Tsiimɔ amɛ fɛɛ amɛnɔ owo shikpɔŋ, ni ofimɔ amɛhiɛiaŋ yɛ gbohiiaje,

¹⁴ kɛkɛ lɛ mi hu makplɛ̃ nɔ mahã bo akɛ oyɛ hewalɛ ni baanyɛ ehã oye kunim.

¹⁵ Kwɛmɔ nuŋshwuɔ; mi mibɔ lɛ tamɔ mibɔ bo. Ekpeɔ jwɛi tamɔ tsina,

¹⁶ shi kwɛmɔ hewalɛ ni yɔɔ ehɛ mli, kɛ hewalɛ ni yɔɔ ehewojiaŋ fãi lɛ mli.

¹⁷ Ehãa elei shɔ̃ɔ keketee tamɔ tsenedru, ni atswɛ̃tswɛ̃ fãi ni yɔɔ eshuɔji amli lɛ.

¹⁸ Ewui wa tamɔ akɔɔble, ni eniji kɛ enaji tamɔ dade adabãŋ.

¹⁹ Lɛ ji Yehowa ninenaa nitsumɔi lɛ ateŋ titri ko; mɔ ni bɔ lɛ lɛ pɛ nyɛɔ enɔ eyeɔ,

²⁰ Ejaakɛ ŋmei tsei lɛ hãa lɛ hɔ̃ɔŋ yɛ he ni ŋaŋ kooloi fɛɛ yashwɛɔ yɛ lɛ.

²¹ Ehoɔ ekãa shi yɛ ŋmei tsei ashishi, ni eteɔ ehe yɛ glãi amli yɛ ŋmiamɔ mli,

²² ejaakɛ ŋmei tsei lɛ hãa lɛ hɔ̃ɔŋ ni faa lɛ mli jwɛi lɛ bɔleɔ ehe kɛkpeɔ.

²³ Naa, kɛji faa lɛ fee hamahama tete ewooo ehe gbeyei; kɛji Yordan yi kɛbata esɛ̃ tete po eyoyrooo.

²⁴ Ani mɔ ko aaanyɛ eje ehiɛgbɛ ni emɔ lɛ, aloo ekɛ tsɔne adu egugɔ?”