Hiob 4 - ŊMALƐ KRƆŊKRƆŊ LƐ

Klɛŋklɛŋ sanegbaa lɛ Elifaz wiemɔ

¹ Kɛkɛ ni Elifaz, Temannyo lɛ, hã Hiob hetoo ekɛɛ,

² “Kɛji aka bo kɛ wiemɔ lɛ, eeefee bo mlifu lo? Shi kɛ̃lɛ namɔ aaanyɛ enaa emua?

³ Naa, otsɔ̃ɔ mɛi babaoo anii kɛho, ni owo mɛi hu ni nijiaŋ eje wui hewalɛ.

⁴ Owiemɔ ehere mɔ ni etɛ́ ni eyaagbee shi; mɛi ni nakutseiaŋ egbɔjɔ lɛ, owo amɛ hewalɛ; ni amɛnyɛ shi amɛdamɔ.

⁵ Shi agbɛnɛ lɛ eshɛ onɔ, shi onaaa tsui; esa ohe, no ojijaa nɛɛ.

⁶ Kwɛ jeee Nyɔŋmɔ gbeyei ni osheɔ lɛ no nɔ ohiɛ kã, ni onɔkwayeli jeŋba lɛ ji ohiɛnɔkãmɔ?

⁷ “Kɛ ohiɛ awo mli okwɛ! Namɔ hiɛ ekpãtã pɛŋ be mli ni efeko efɔŋ ko? Aloo nɛgbɛ aplene mɛi ni feɔ jalɛnii yɛ pɛŋ?

⁸ Bɔ pɛ ni mina nɛ: Mɛi ni huɔ nɔsha ŋmɔ, ni amɛduɔ yiwalɛ wui lɛ nomɛi nɔŋŋ amɛkpaa.

⁹ Nyɔŋmɔ mumɔ ni shwieɔ amɛnɔ lɛ kpãtãa amɛhiɛ, ni emlifu kɔɔyɔɔ pleneɔ amɛ.

¹⁰ Ajɔɔ jata huumɔ kɛ oloowɔ gbee he, ni akumɔ jatabii atsoji fɛɛ.

¹¹ Jata ni he wa gboɔ kɛ enaaa kooloo emɔ ni eye, ni jata yoo bii gbɛɔ shwãa.

¹² “Be ko lɛ, minu wiemɔ ko; efo mitoi naa nyɔɔŋ

¹³ be ni wɔ ni tsii nyɔɔ mɛi anɔ, ni ninai ahejwɛŋmɔ

¹⁴ hã ŋmiŋmi mɔ mi, ni mikpokpo kɛshɛ miwuiaŋ tɔ̃ɔ.

¹⁵ Mumɔ ko bafo mihiɛ; mihe tsɔi te shi damɔ shi.

¹⁶ Mumɔ lɛ wa edamɔ shi keŋŋ; shi miyooo esu.” Shi su ko badamɔ mihiɛ, jɛi fee koniŋŋ, kɛkɛ ni minu gbee ko:

¹⁷ “Aso adesa ko aaaja yɛ Nyɔŋmɔ hiɛ? Aso adesa ko he aaatse yɛ ebɔlɔ lɛ hiɛ?

¹⁸ Kɛji Nyɔŋmɔ kɛ ehe efɔ̃ɔɔ etsuji anɔ, ni enaa tɔ̃mɔ yɛ ebɔfoi tete ahe lɛ,

¹⁹ ani osusuɔ akɛ ekɛ ehe baafɔ gbɔmɔ adesa nɔ, gbɔmɔ ni jɛ shikpɔŋ su mli ni afufluɔ lɛ tamɔ omlɛgɛ?

²⁰ Gbɔmɔ hiɛ kãa leebi, shi egboɔ trukaa gbɛkɛnaashi. Ehiɛ kpãtãa, ni mɔ ko ebuuu ehe akɔntaa.

²¹ Kɛji atserɛ emli fãi lɛ; aso amɛgboiii yɛ be mli ni amɛnako jwɛŋmɔ lolo lɛ?”