Hiob 39 - ŊMALƐ KRƆŊKRƆŊ LƐ

¹ “Ani ole be mli ni afɔɔ gɔji anɔ abotiai lo? Ona ofrote ni eefɔ dã?

² Ole nyɔji abɔ ni amɛhiɛɔ musu? Ole amɛfɔmɔ be lo?

³ Ani ole be mli ni amɛsɔ̃ɔ shi amɛfɔɔ amɛbii lo?

⁴ Amɛbii lɛ naa hewalɛ, ni amɛdaraa yɛ jwɛiiaŋ; amɛjeɔ kpo, ni amɛkuuu amɛsɛɛ amɛbaaa dɔŋŋ.

⁵ Namɔ ŋmɛ̃ɛ ŋaŋ teji he koni eye ehe? Namɔ fɛne kpãa lɛ ehã teji?

⁶ Ni miŋɔ ŋa kplanaa lɛ mihã lɛ akɛ eshĩa, ni miŋɔ mukpo shikpɔŋ lɛ mihã lɛ akɛ eshihilɛhe lɛ.

⁷ Esumɔɔɔ hoo ni yɔɔ maŋ lɛ mli lɛ, ni enuuu mɔ ko ni miikpala lɛ gbee.

⁸ Gɔji lɛ anɔ tsɔ̃ɔ eniyelihe, ni etaoɔ nii ni yɔɔ frɔ̃frɔ̃ yɛ jɛi eyeɔ.

⁹ Ani koo mli tsina aaakpɛ̃lɛ ni esɔ̃mɔ bo? Aloo eeesumɔ ni ebawɔ kooloi awɔɔhe?

¹⁰ Ani obaanyɛ owo tsinanuu kpãa ni etsa akofii, aloo eninɛ ŋmɔ yɛ jɔi amli kɛnyiɛ osɛɛ?

¹¹ Ani okɛ ohe aaafɔ̃ enɔ yɛ ehewalɛ kpele lɛ hewɔ, aloo oooshi nitsumɔ muu lɛ fɛɛ oŋmɛ enɔ?

¹² Ani oheɔ lɛ oyeɔ akɛ ekɛ onikpamɔnii lɛ baaku esɛɛ; naa, ni ebua obele lɛ naa ewo aboŋo mli?

¹³ Duguma tswaa efijiaŋ kɛ ntɛŋ; shi hewalɛ kome nɛkɛ bɛ mli ni ekɛaa sumɔ bo.

¹⁴ Ejaakɛ eshiɔ ewɔji lɛ yɛ shikpɔŋ koni shikpɔŋ mlu mli dɔlɛ lɛ ahã amɛhe adɔ la.

¹⁵ Ni ehiɛ kpaa nɔ akɛ mɔ ko kɛ enane aaanyɛ ajwara amɛ; ni ŋaŋ kooloi aaanyɛ amɛnaanaa nɔ.

¹⁶ Ewaa ebii bibii lɛ ayi, tamɔ nɔ ni jeee ebii ni; etɔlɛ lɛ aaanyɛ afee yaka kɛ̃lɛ esheee no gbeyei.

¹⁷ Ejaakɛ Nyɔŋmɔ ehã nilee ebɔ lɛ, ni jwɛŋmɔ hu ehãaa lɛ eko.

¹⁸ Kɛji ewo ehe nɔ, ni ebaabɔ̃i foijee lɛ, eŋmɔɔ okpɔŋɔ kɛ mɔ ni ta nɔ lɛ fɛɛ.

¹⁹ “Hiob, bo ji mɔ ni hã okpɔŋɔ hewalɛ ni eyɔɔ lɛ? Ekuɛ he tsɔi funyaŋŋ lɛ bo ohã lɛ?

²⁰ Ani bo ohãa okpɔŋɔ huluɔ tamɔ baalabi tuɔ lɛ? Etsinemɔ gbɛɛmɔ yɛ gbeyei!

²¹ Ekɛ enane gbɛɔ shi yɛ jɔɔ lɛ mli, eshwaa efɔɔ ehewalɛ nɔ; ejeɔ kpo ekɛ tabilɔi yakpeɔ.

²² Eleee nɔ ni ji gbeyei, no haaa ekpokpo tete; ejooo foi yɛ klante naa.

²³ Gãimlibii gbɛɔ woɔ lɛ, akplɔ kɛ damfojai kpɛlɛɔ woɔ lɛ.

²⁴ Ekɛ hiɛdɔɔ kɛ grimɔ kpitiɔ shi; enyɛɛɛ shi edamɔ kɛji tɛtɛrɛmantɛrɛ gbɛɛ.

²⁵ Kɛji tɛtɛrɛmantɛrɛ gbɛɛ lɛ, ekɛɔ akɛ, ‘Yiɛ, eshɛ!’ Enyiɛ shɔŋŋ ni enuɔ ta he fu, kɛ asafoiatsɛmɛi lɛ afaamɔi kɛ blɔmɔ he.

²⁶ Ani bo onilee naa ni laalɔɔ filikiɔ kɛyaa ŋwɛi, ni egbɛɔ efijiaŋ etsɔ̃ɔ wuoyigbɛ?

²⁷ Ani bo ofamɔ naa ni okropɔŋ woɔ ehe nɔ ni eyafeɔ etsu yɛ ŋwɛi shɔŋŋ lɛ?

²⁸ Tɛsaa ni kwɔ fe fɛɛ nɔ he ni yɔɔ shɔ̃shɔ̃ɔshɔ̃ lɛ, efeɔ eshihilɛhe yɛ.

²⁹ Jɛi ejɛɔ ni enaa kooloo ni eeemɔ; ehiŋmɛi naa shɔŋŋ nii.

³⁰ He ni gbohii jwere lɛ, jɛi okropɔŋ yɔɔ; ni ebii bibii lɛ nuɔ gbohii lɛ alá.”