Hiob 38 - ŊMALƐ KRƆŊKRƆŊ LƐ

¹ Kɛkɛ ni Yehowa jɛ ahum lɛ mli ehã Hiob hetoo ekɛɛ,

² “Namɔ hu ji mɔ ni kɛ wiemɔi ni nilee bɛ mli ehã mijwɛŋmɔ hiɛ ehua nɛɛ?

³ Feemɔ kralo odamɔ shi tamɔ nuu, shi mibabi bo sane ni ohã hetoo.

⁴ Be ni mito je lɛ shishi lɛ, nɛgbɛ oyɔɔ? Kɛji ole he nɔ ko lɛ, kɛɛmɔ mi!

⁵ Namɔ ji mɔ ni tsɔ̃ɔ bɔ ni eda ehã; aloo namɔ ji mɔ ni mɔ kpãa mli kɛsusu edalɛ lɛ? Bɛ ole?

⁶ Mɛni nɔ ato je lɛ shishi ama? Namɔ ji mɔ ni to ekoŋtɛ lɛ?

⁷ Be ni leebi ŋulamii lɛ fɛɛ la kutuu ni ŋwɛibii lɛ bɔ oshe kɛ nyamɔ lɛ?

⁸ Aloo namɔ ŋamɔ agboi lɛ ekɛtsi ŋshɔ lɛ naa, be ni etue kɛjɛ je lɛ shishitoo he lɛ.

⁹ Be ni mihã atatui tsɔ̃ ŋshɔ hebo, ni mihã duŋ kpii hu tsɔ̃ mama ni mikɛbala lɛ lɛ?

¹⁰ Be ni mito je lɛ husui ni mikɛ agboi kɛ amɛsɛɛ adabaŋi tsi enaa,

¹¹ ni mikɛɛ akɛ, ‘Biɛ nɛɛ obaawa, ni okafo mli; ni biɛ oshɔkei wuji lɛ baawa.’

¹² Hiob, ni oba jeŋ nɛɛ, ofã ni je etsɛre dã? Ni otsɔ̃ɔ jetsɛremɔ egbɛhe pɛŋ?

¹³ Ani ofã jetsɛremɔ ni emɔmɔ shikpɔŋ lɛ naagbee hei lɛ amli koni ehwanya mɛi fɔ̃ji fɛɛ kɛjɛ nɔ eshwie dã lo?

¹⁴ Jetsɛremɔ hãa gɔji kɛ jɔi jeɔ shi faŋŋ tamɔ atade ni akumɔ mli loo tamɔ naasɔomɔnɔ ni ta magbɛ hiɛ.

¹⁵ Ehãa mɛi fɔɔji enãaa hei ni amɛaatsɔ̃, ni amɛniji ni amɛkɛtsuɔ nifɔɔjianii lɛ kumɔɔ yɛ amɛhe.

¹⁶ Aso oshɛ he ni ŋshɔ jɛɔ lɛ pɛŋ; ni oshara shi kɛnyiɛ ŋshɔ shishi dã?

¹⁷ Ani ajie gbohiiaje agboi lɛ akpo atsɔ̃ɔ bo, aloo ajie duŋ kpii lɛ naa agboi lɛ akpo atsɔ̃ɔ bo?

¹⁸ Ani ole je lɛ dalɛ? Kɛji ole nibii nɛɛ fɛɛ lɛ, wiemɔ!

¹⁹ Nɛgbɛ atsɔ̃ɔ kɛyaa he ni la jɛɔ, loo nɛgbɛ ji duŋ shihilɛhe,

²⁰ koni otsɔ̃ɔ gbɛ ni kã shi kɛyaa eshihilɛhe lɛ mli, koni oŋɔ lɛ oyato ehusu nɔ?

²¹ Bɛ ole, ejaakɛ ofii fa babaoo ni no mli lɛ afɔ bo!

²² Obote tsui ni mito snoo yɛ mli, lɛ mli pɛŋ loo ona tsui ni mito nyɔŋmɔŋtɛi yɛ mli,

²³ ni ji nii ni mito mihã amanehulu be loo nɔmɔ kɛ ta be lɛ?

²⁴ Nɛgbɛ gbɛ ni yaa he ni hulu la lɛ jɛɔ egbɛɔ eshwãa, loo he ni bokãgbɛ kɔɔyɔɔ lɛ jɛɔ eshwãa je lɛ mli lɛ kã?

²⁵ Namɔ egba nujɔɔ efɔ̃ shi koni nu ni miinɛ anyiɛ mli, ni eje gbɛ ehã srawa,

²⁶ bɔ ni afee ni nu anɛ ashwie shikpɔŋ ni mɔ ko mɔ ko bɛ nɔ, kɛ shiaŋa he ni adesa ko bɛ hu nɔ?

²⁷ Namɔ hãa shikpɔŋ olɛŋlɛ ni kã shi efolo naa ofɔ̃, ni jwɛi kwɛ̃ɔ yɛ nɔ?

²⁸ Ani nu ni nɛɔ yɛ tsɛ, loo namɔ ni fɔ bɔ́?

²⁹ Namɔ musuŋ aisi jɛ, ni namɔ fɔ ŋwɛi bɔ́ ni efimɔ kpɔbii.

³⁰ Nu fiɔ, ni ewaa tamɔ tɛ, ni ŋshɔ hiɛ fɛɛ waa keketee.

³¹ “Ani obaanyɛ okɛ kɔsɔŋkɔsɔ afimɔ Wuɔ kɛ ebii? Aloo obaanyɛ kpãi ni fimɔ Oŋwɛ ofɛne?

³² Ani obaanyɛ otsɔ̃ɔ ŋulamii ni kpɛlɛɔ lɛ he ni amɛtsɔ̃ kɛya kɛji amɛje, aloo obaanyɛ otsɔ̃ɔ Jeŋ Kpawo kɛ ebii lɛ gbɛ?

³³ Ani ole akpɔi ni hiɛ ŋwɛi, aloo obaanyɛ ohã nakai akpɔi lɛ aye shikpɔŋ lɛ hu nɔ?

³⁴ Ani obaanyɛ owo ogbee nɔ ni ofã atatui lɛ koni amɛnɛ nu amɛshwie onɔ?

³⁵ Ani obaanyɛ ofã srawai akɛ amɛgbala, ni ani amɛaaba oŋɔɔ amɛbakɛɛ bo akɛ, ‘Naa wɔ?’

³⁶ Namɔ tsɔ̃ɔ loofɔlɔ ibis be ni Nilo baasraŋ nɔ? Aloo namɔ tsɔ̃ɔ wuɔ nuu akɛ nu baanɛ?

³⁷ Namɔ yɔɔ nilee ni ekɛbaanyɛ atatui lɛ ekane? Aloo ebaanyɛ ekpoo amɛnaa shi koni amɛnɛ nu

³⁸ ni baahã su akpɔtɔ ni efimɔ kukulibii efee tɔo?

³⁹ Ani bo omiɔ milɛloo ohãa jata, aloo ohãa jatabii loo amɛyeɔ shɛɔ amɛnaa

⁴⁰ be ni amɛbumɔ amɛbui amli, aloo amɛhɔlɔ odɔtɔi amli amɛwo ka lɛ?

⁴¹ Namɔ hã kwãakwãalabite niyenii, be ni ebii bibii bolɔɔ amɛtsɛɔ Nyɔŋmɔ, ni amɛtsomloɔ ejaakɛ niyenii bɛ lɛ?