Hiob 37 - ŊMALƐ KRƆŊKRƆŊ LƐ1 “Ŋwɛi shiimɔ lɛ hãa mitsui tswaa ni tse po eheɔ etse yɛ mimli nɛɛ. 2 Nyɛboa Nyɔŋmɔ gbee ni ji ŋwɛi shiimɔ lɛ toi, kɛ shiimɔ ni jɛ edaaŋ lɛ. 3 Eŋmɛɔ he ewoɔ ŋwɛi shishi fɛɛ, ni ŋwɛi srawa gbalaa kɛyaa shikpɔŋ lɛ koji ejwɛ lɛ fɛɛ. 4 Ŋwɛi shiimɔ lɛ sɛɛ lɛ, ewoɔ egbee kɛ agbojee; ni etsiii srawa naa be mli ni eshiɔ lɛ. 5 Nyɔŋmɔ gbeeshiimɔ yɛ naakpɛɛ ni efeɔ nibii wuji ni wɔjwɛŋmɔ shɛɛɛ he. 6 Ekɛɔ snoo akɛ, ‘Nɛɛ oshwie shikpɔŋ lɛ nɔ; ni ekɛɔ nu kɛ futufuli akɛ, nɛɛ waa!’ 7 Ejieɔ gbɔmɔ nine yɛ nɔ fɛɛ nɔ ni efeɔ lɛ he, koni adesai fɛɛ ana ale akɛ lɛ efeɔ nɔ fɛɛ nɔ. 8 Kɛkɛ lɛ ŋaŋ kooloi yaa amɛbuiaŋ, ni amɛhɔlɔ amɛshihilɛhei lɛaŋ. 9 Ahum jɛɔ wuoyigbɛ ebaa, ni fɛ̃i hu jeɔ kooyigbɛ. 10 Mumɔ ni Nyɔŋmɔ muɔ lɛ hãa nu fĩɔ kpɔ, ni fai fɛɛ fĩɔ tɔo tsɔ̃ɔ aisi. 11 Ehãa atatui yiɔ kɛ nu ni ehãa srawa kpɛlɛɔ yɛ atatui lɛaŋ. 12 Amɛbɔleɔ shi yɛ egbɛjianɔtoo naa; amɛyeɔ efãmɔ nɔ yɛ je lɛ mli fɛɛ. 13 Bei komɛi lɛ, ehãa enɛɛmɛi baa koni egbala gbɔmɛi atoi, bei komɛi lɛ yɛ eshikpɔŋ lɛ yibaamɔ hewɔ, ni bei komɛi hu koni ekɛtsɔ̃ɔ suɔmɔ ni eyɔɔ. 14 Oo, bo enɛ toi, Hiob, da gãa koni ojwɛŋ Nyɔŋmɔ naakpɛɛ nitsumɔi lɛ ahe. 15 Ani ole bɔ ni Nyɔŋmɔ feɔ efãa amɛ ehãa, ni ehãa la kpɛɔ kɛjɛɔ atatu mli? 16 Ani ole bɔ ni Nyɔŋmɔ, mɔ ni le nii kɛwula shi lɛ feɔ etsuɔ enaakpɛɛ nitsumɔ ni hãa atatu sɛŋɔ shi lɛ? 17 Ele bo bɔ ni otadei amli dɔɔ la, be ni ehã shikpɔŋ lɛ efee shiŋŋ yɛ wuoyigbɛ kɔɔyɔɔ lɛ hewɔ lɛ? 18 Ani obaanyɛ olɛɛ ŋwɛi, ni tamɔ dade kaŋkaŋ ni ashwie nɛɛ, mli oha shi tamɔ Nyɔŋmɔ efee lɛ? 19 Tsɔ̃ɔmɔ wɔ nɔ ni wɔkɛɛ Nyɔŋmɔ; ejaakɛ wɔjwɛŋmɔ naa etã, wɔbɛ nɔ ko ni wɔbaakɛɛ. 20 Akakɛɛ lɛ akɛ masumɔ mawie; mɔ ko bɛ ni baasumɔ akɛ ekpãtã ehiɛ. 21 Ni agbɛnɛ adesa nyɛɛɛ la lɛ ekwɛ kɛ jeŋ tse tete, ejaakɛ atatui eha hiɛ; shi kɛji kɔɔyɔɔ tswa lɛ eloɔ atatui lɛ kɛyaa. 22 La tsuru fɔɔ kpɛɔ kɛjɛɔ kooyigbɛ kɛbaa. Ni Nyɔŋmɔ he anunyam lɛ hãa wɔsheɔ gbeyei. 23 Ofe lɛ, wɔnyɛŋ lɛ wɔna; ehewalɛ da, ni eyeɔ jalɛ sane; ekpaŋ jalɛ saneyeli. 24 No hewɔ lɛ, nyɛ adesai fɛɛ, nyɛshea lɛ gbeyei, ejaakɛ mɛi ni buɔ amɛhe nilelɔi lɛ, ebuuu amɛ.” |
Bible in Ga Language © Bible Society of Ghana, 2020.
Bible Society of Ghana