Hiob 36 - ŊMALƐ KRƆŊKRƆŊ LƐ

¹ Elihu tee ewiemɔ lɛ nɔ, ni ekɛɛ akɛ,

² “Na tsui ohã mi fioo, ni matsɔ̃ɔ bo nɔ ko naa, ejaakɛ miyɛ nɔ ko lolo ni mibawie mahã Nyɔŋmɔ.

³ Minilee babaoo lɛ mli majɛ matsɔ̃ɔ akɛ miBɔlɔ lɛ yeɔ jalɛ sane.

⁴ Ejaakɛ anɔkwa wiemɔ miwieɔ lɛ. Mɔ ko ni le nii jogbaŋŋ damɔ ohiɛ nɛɛ.

⁵ Naa, Nyɔŋmɔ je agbo, ni enyaŋeee mɔ ko mɔ ko; eniiashishinumɔ naa wa jogbaŋŋ.

⁶ Ehãaa mɔ fɔŋ yi ana wala, shi ohiafoi kɛ mɛi ni naa amanehulu lɛ eyeɔ amɛsane ehãa amɛ.

⁷ Ehiŋmɛi kãa jalɔ he, ni ehãa amɛtsɔ̃mɔɔ tamɔ maŋtsɛmɛi ni tara sɛii anɔ ni awoɔ amɛnɔ gojoo.

⁸ Kɛji awo amɛ gboklɛi ni amanehulu efĩmɔ amɛ lɛ,

⁹ kɛkɛ lɛ Nyɔŋmɔ tsɔ̃ɔ amɛ nɔ fɔŋ ni amɛfee, amɛtɔ̃mɔi kɛ amɛhenɔwomɔ lɛ.

¹⁰ Egbeleɔ amɛtoiiaŋ, ni amɛnuɔ kãmɔ ni ekãa amɛ akɛ amɛkpa nishaianii feemɔ lɛ.

¹¹ Kɛji amɛbo Nyɔŋmɔ toi, ni amɛsɔ̃mɔ lɛ lɛ, amɛaaye amɛwala be lɛ yɛ ejurɔyeli mli, kɛ amɛfii lɛ hu yɛ miishɛɛ mli.

¹² Shi kɛji amɛbooo toi lɛ, no lɛ amɛleŋ nii, ni amɛaagboi yɛ klante naa.

¹³ Mɛi ni sheee Nyɔŋmɔ gbeyei lɛ, eŋmɛ̃ɛɛ mlifu he; kɛji efĩ amɛ tete lɛ amɛbiii Nyɔŋmɔ dɛŋ yelikɛbuamɔ.

¹⁴ Amɛgboiɔ yɛ amɛblahiiaŋ, ni amɛwala sɛɛ foɔ kɛ hiɛgbele kɛ tɔlɛ.

¹⁵ Nyɔŋmɔ tsɔseɔ gbɔmɔ kɛtsɔ̃ɔ amanehulu nɔ, ni ekɛ nɔnaa gbeleɔ mɔ hiŋmɛi.

¹⁶ Nyɔŋmɔ jie bo kɛje jaramɔ mli kɛba he ko ni ohe jɔ bo yɛ, ni okplɔ̃ lɛ nɔ eyi tɔ kɛ niyenii.

¹⁷ Shi agbɛnɛ aagbala otoi bɔ ni sa bo pɛpɛɛpɛ; aagbala otoi yɛ jalɛ naa.

¹⁸ Kwɛmɔ ni ahi koni akɛ nyɔɔŋnihamɔ akalaka bo; ni kaahã ninamɔ miihã oodu gbɛ.

¹⁹ Aso oyaafo baanyɛ bo ahere, aloo ohewalɛ kɛ oshika aaanyɛ nɔ ko afee?

²⁰ Kaashwe ni duŋ awo, be ni maji ahiɛ aaakpãtã lɛ.

²¹ Kwɛmɔ jogbaŋŋ ni okabɔ̃i eshafeemɔ: ejaakɛ oosumɔ enɛ moŋ fe nɔnaa.

²² Naa, Nyɔŋmɔ je agbo yɛ ehewalɛ lɛ naa; ni mɛɛ tsɔɔlɔ kɛ lɛ yeɔ hegbɔ?

²³ Namɔ baanyɛ etsɔ̃ɔ Nyɔŋmɔ nɔ ni sa akɛ efee, aloo namɔ aaanyɛ akɛɛ Nyɔŋmɔ akɛ, ‘Ofee nɔ ko ni ejaaa’.

²⁴ Kaimɔ koni okafo enifeemɔ ni adesai fɛɛ ewo he lala lɛ.

²⁵ Adesai fɛɛ miikwɛ enifeemɔ kɛmiijɛ shɔŋŋ; shi kɛ̃lɛ adesa nuuu shishi.

²⁶ Naa, Nyɔŋmɔ da, shi wɔleee lɛ; ni wɔnyɛŋ efii ni eye wɔkane.

²⁷ Ejaakɛ egbalaa nu kulibii kɛyaa ŋwɛi, ni ehãa afua tsɔ̃ɔ nu,

²⁸ ni ŋwɛi fɔseɔ shwieɔ shi, ni ebashwieɔ adesai fɛɛ anɔ babaoo.

²⁹ Ani mɔ ko aaanyɛ anu bɔ ni atatui ha ŋwɛi lɛ shishi, aloo eeenu ŋwɛi shiimɔ shishi?

³⁰ Naa, egbɛ ŋwɛi srawa mli kɛbɔle ehe; shi ehã ŋshɔ shishi wo duŋ.

³¹ Ejaakɛ gbɛ nɔ ni etsɔ̃ɔ elɛɔ adesai nɛ, ni ekumaa amɛ niyenii babaoo.

³² Ekɛ enine mɔɔ ŋwɛi srawa mli ni etsɔ̃ɔ lɛ he ni egba kɛyayi.

³³ Ŋwɛi srawa gbɛɛmɔ lɛ tsɔ̃ɔ bɔ ni eji, akɛ mɔ ko ni mli fũɔ yɛ nishaianii hewɔ.”