Hiob 35 - ŊMALƐ KRƆŊKRƆŊ LƐ

¹ Kɛkɛ ni Elihu saa kɛɛ ekoŋŋ akɛ,

² “Aso osusuɔ akɛ eja gbɛ akɛ oookɛɛ akɛ Nyɔŋmɔ hiɛ lɛ tɔ̃mɔ ko bɛ ohe,

³ hewɔ ni okɛɔ akɛ, ‘Mɛɛ sɛɛnamɔ yɔɔ he? Mɛɛ ejurɔ miyeɔ kɛji mifee esha lɛ?’

⁴ Mahã bo kɛ onanemɛi ni fata ohe lɛ fɛɛ hetoo.

⁵ Kwɛmɔ ŋwɛi! Kwɛmɔ bɔ ni atatui lɛ yɔɔ ŋwɛi shɔŋŋ yɛ oyiteŋ!

⁶ Kɛji ofee esha lɛ, mɛni ona ofee Nyɔŋmɔ? Kɛji ofee esha lɛ shii abɔ po, mɛɛ awui no yeɔ Nyɔŋmɔ?

⁷ Kɛji jalɔ ji bo lɛ, mɛni okɛwa Nyɔŋmɔ, aloo mɛni enaa kɛjɛɔ odɛ̃ŋ?

⁸ Esha ni ofeɔ lɛ, adesa tamɔ bo awui eyeɔ, ni ojalɛ lɛ, gbɔmɔ eyeɔ ebuaa.

⁹ Yiwaa babaoo hãa maŋbii lɛ bolɔɔ; amɛbolɔɔ amɛtsɛɔ yelikɛbuamɔ yɛ ojei ayiwalɛ nifeemɔnii ahewɔ.

¹⁰ Shi mɔ ko kwraa ekɛɛɛ akɛ, ‘Nɛgbɛ Nyɔŋmɔ, miBɔlɔ lɛ yɔɔ, mɔ ni hãa hiɛnɔkãmɔ yɛ fĩmɔbe mli kɛ

¹¹ mɔ ni tsɔ̃ɔ wɔ nii fe bɔ ni etsɔ̃ɔ shikpɔŋ lɛ nɔ kooloi lɛ, ni ehãa wɔleɔ nii fe ŋwɛi loofɔji lɛ?’

¹² Amɛbolɔɔ amɛtsɛɔ yelikɛbuamɔ shi Nyɔŋmɔ efooo amɛdaaŋ yɛ amɛnifɔɔjianii kɛ amɛhenɔwomɔ hewɔ.

¹³ Anɔkwa, Nyɔŋmɔ booo yaka yaafo toi, ni Ofe lɛ ebuuu hu.

¹⁴ Nɔ ni wa fe fɛɛ ji akɛ, oookɛɛ akɛ onaaa lɛ, ni sane lɛ kã ehiɛ, ni oomɛ lɛ.

¹⁵ Shi agbɛnɛ, akɛni Nyɔŋmɔ mlifu gbalaaa mɔ toi, ni ediii tɔ̃mɔ sɛɛ yrɛdɛɛ hewɔ lɛ,

¹⁶ Hiob, oowie huu, oowie babaoo ni nilee bɛ mli.”