Hiob 34 - ŊMALƐ KRƆŊKRƆŊ LƐ

¹ Kɛkɛ ni Elihu kɛɛ akɛ,

² “Nyɛ nilelɔi kɛ jwɛŋlɔi, nyɛboa miwiemɔ toi, nyɛfea toi nyɛhãa mi,

³ ejaakɛ toi akɛŋmɛɔ wiemɔ akwɛɔ, tamɔ bɔ ni akɛ lilɛi saa niyenii anaa akwɛɔ lɛ.

⁴ Nyɛhãa wɔkɔa nɔ ni ja, nyɛhãa wɔsusua he yɛ wɔteŋ wɔna nɔ ni hi.

⁵ Ejaakɛ Hiob ekɛɛ akɛ, ‘Miyeɔ bem’ shi Nyɔŋmɔ kɛ mi yeee yɛ jalɛ naa;

⁶ bem ni miyeɔ lɛ fɛɛ sɛɛ lɛ, abu mi amalelɔ: Mifala lɛ bɛ tsabaa, tsɛbelɛ tɔ̃mɔ ko bɛ mihe.

⁷ Namɔ ena mɔ ko tamɔ Hiob, mɔ ni bɔɔ musu tamɔ anuɔ nu pɛŋ?

⁸ Mɔ ni kɛ mɛi ni tsuɔ nishaianii bɔɔ naanyo, ni ekɛ gbɔmɛi fɔ̃ji nyiɛɔ?

⁹ Ejaakɛ ekɛɛ akɛ, ‘Ehe bɛ sɛɛnamɔ hã gbɔmɔ akɛ ekɛ Nyɔŋmɔ aaabɔ naanyo!’

¹⁰ No hewɔ lɛ, nyɛ mɛi ni nyɛyɔɔ jwɛŋmɔ lɛ, nyɛboa mi toi. Enɛ akagbale Nyɔŋmɔ fɔɔŋfɔ akɛ eeefee nɔ fɔŋ, aloo Ofe lɛ, eeefee nɔ ko ni ejaaa hu.

¹¹ Ejaakɛ Nyɔŋmɔ woɔ gbɔmɔ nyɔmɔ yɛ enitsumɔ naa, ni ekɛ gbɔmɔ yeɔ yɛ ejeŋba naa.

¹² Anɔkwa, Nyɔŋmɔ yeee toikɔdɔmɔ sane; ni Ofe lɛ tsɔ̃ɔɔ sane hiɛ ebuuu shi.

¹³ Namɔ ji mɔ ni kɛ je lɛ nɔkwɛmɔ hã lɛ? Namɔ kɛ jeŋ muu lɛ fɛɛ hã lɛ?

¹⁴ Kɛji eeeŋɔ emumɔ lɛ yɛ je lɛŋ, ni eeehã mumɔ lɛ akpale kwraa kɛba eŋɔɔ lɛ,

¹⁵ no lɛ heloo fɛɛ heloo hiɛ aaakpãtã; ni gbɔmɔ aaatsɔ̃ sũ ekoŋŋ.

¹⁶ Kɛji oyɛ jwɛŋmɔ lɛ bo toi! Bo nɔ ni makɛɛ lɛ toi!

¹⁷ Ani mɔ ni taooo jalɛ saneyeli baanyɛ mɛi anɔ eye? Ani ooobu mɔ ni ja ni eyɔɔ hewalɛ lɛ fɔ?

¹⁸ Ani ooobu mɔ ni kɛɔ maŋtsɛ akɛ ‘Yakagbɔmɔ’ kɛ lumɛi hu akɛ, ‘Yitsoŋwalɔi?’

¹⁹ Ni ekwɛɛɛ lumɛi ahiɛ ni ebuuu niiatsɛ fe ohiafo, ejaakɛ lɛ eninenaa nitsumɔnii ji amɛ fɛɛ kwa lɛ bem?

²⁰ Trukaa gbɔmɔ gboɔ; ahosoɔ gbɔmɔ nyɔɔŋ, ni ehoɔ eyaa; hewalɔi hoɔ amɛyaa, ni amɛtsɔ̃ɔɔ adesa nine nɔ.

²¹ Ejaakɛ ohiŋmɛi jwere gbɔmɔ adesa jeŋba nɔ, ni onaa enyiɛmɔhei fɛɛ.

²² Duŋ kabitii bɛ he ko he ko ni mɛi ni tsuɔ nishaianii aaanyɛ atee amɛhe yɛ mli.

²³ Ejaakɛ etoko be pɔtɛɛ ko ehãko adesa ko ni eeeya kojomɔ yɛ lɛ ehiɛ.

²⁴ Ekpãtãa hewalɔi ahiɛ ni etaooo amɛsaji amli, ni eholeɔ mɛi krokomɛi etoɔ amɛnajiaŋ.

²⁵ Akɛni ele amɛnifeemɔnii lɛ, ebutuɔ amɛ nyɔɔŋ, ni amɛhiɛ kpãtãa.

²⁶ Egbalaa mɛi fɔ̃ji atoi yɛ mɛi fɛɛ ahiɛ.

²⁷ Ejaakɛ amɛkpale yɛ esɛɛ, ni amɛbuuu egbɛi lɛ ekoeko;

²⁸ ni no hewɔ lɛ, amɛhã ohiafoi ayaafo yashɛ eŋɔɔ; ni enu mɛi ni efĩ amɛ lɛ abolɔmɔ.

²⁹ Kɛji Nyɔŋmɔ fee diŋŋ lɛ, namɔ baanyɛ lɛ ashwa? Kɛji ekɛ ehiɛ tee lɛ namɔ baanyɛ ehiɛ lɛ ena?

³⁰ Nɔ ko bɛ ni aaanyɛ afee koni gbɔmɔ fɔŋ akaye maŋ nɔ, ni ekahã maŋbii bote kaa mli.

³¹ Ejaakɛ ani mɔ ko ekɛɛ Nyɔŋmɔ dã akɛ ‘Agbala mitoi. Mifeŋ nɔ ni ehiii dɔŋŋ;

³² tsɔ̃ɔmɔ mi nibii ni minaaa; koni kɛji mifee nɔ ni ehiii lɛ mikafee nakai dɔŋŋ?’

³³ Akɛni okwa egbɛi lɛ, ani Nyɔŋmɔ baafee nɔ ni otaoɔ ehã bo lo? Kɛɛmɔ nɔ ni ole lɛ, ejaakɛ bo diɛŋtsɛ esa akɛ okɔɔ nɔ ni osumɔɔ; shi jeee mi matsɔ̃ɔ bo.

³⁴ Mɛi ni nuɔ nii ashishi lɛ baakɛɛ mi; ni nilelɔi ni nuɔ nɔ ni miwieɔ lɛ baakɛɛ akɛ,

³⁵ ‘Hiob wieɔ ni jwɛŋmɔ bɛ mli; nilee bɛ ewiemɔ mli.’

³⁶ Mina ni kulɛ aka Hiob akwɛ kɛyashi naagbee, ejaakɛ hetoi ni ehãa lɛ tamɔ mɛi fɔ̃ji anaa wiemɔ.

³⁷ Ejaakɛ eetse atua efata esha ni efee lɛ he, eetswa edɛ̃ eshwie wɔnɔ ni eewie babaoo eeshi Nyɔŋmɔ.”