Hiob 33 - ŊMALƐ KRƆŊKRƆŊ LƐ

¹ “Ni agbɛnɛ, Hiob, bo toi, ni ofee toi ohã miwiemɔi lɛ fɛɛ.

² Naa, migbele minaa ni mawie nɔ ni misusuɔ.

³ Wiemɔi fɛɛ ni mawie lɛ jɛ mitsui mli krɔŋŋ; ni mawie nɔ ni mile anɔkwaleŋ.

⁴ Nyɔŋmɔ mumɔ lɛ ji nɔ ni bɔ mi, ni Ofe lɛ mumɔ lɛ hãa miyi naa wala.

⁵ Kɛji ooonyɛ lɛ, too he ohã mi; saamɔ ohe; saamɔ nɔ ni obaakɛɛ lɛ oto.

⁶ Naa, mi kɛ bo yeɔ hegbɔ yɛ Yehowa gbɛfaŋ; mi hu sũ nɔŋŋ akɛshɔ̃ mi.

⁷ Naa, mihe ŋmiŋmi akawo ohe gbeyei; minyɛŋ onɔ.

⁸ Lɛɛlɛŋ, owie owo mitoiiaŋ, ni minu owiemɔi lɛ.

⁹ Okɛɛ akɛ, ‘Mihe tse, tɔ̃mɔ ko bɛ mihe; miyeɔ bem, ni mifeko esha ko.

¹⁰ Naa, eetao sane efo eŋmɛ minɔ; ebuɔ mi akɛ ehenyɛlɔ.

¹¹ Ebɔ minaji apã, ejie ehiɛ eka mi.’

¹² Naa, miikɛɛ bo akɛ, enɛ mli lɛ osane lɛ ejaaa; ejaakɛ Nyɔŋmɔ da aahu fe adesa.

¹³ Mɛni hewɔ oshwaa Nyɔŋmɔ ni okɛɔ akɛ, ‘Ehãaa miwiemɔi lɛ eko kwraa hetoo lɛ.’

¹⁴ Ejaakɛ Nyɔŋmɔ wieɔ shii abɔ, fɛɛ ni adesa ediii sɛɛ.

¹⁵ Nyɔɔŋ be ni wɔ ni tsii enyɔ adesai anɔ yɛ amɛsai amli lɛ, Nyɔŋmɔ tsɔ̃ɔ lamɔ kɛ nyɔɔŋ ninaa nɔ

¹⁶ ni egbeleɔ adesai atoiiaŋ ni ekɛ kɔkɔbɔɔ woɔ amɛhe gbeyei

¹⁷ koni ehã adesa akpale kɛjɛ enifeemɔnii ahe, ni ehã adesa akpa ehenɔwomɔ lɛ.

¹⁸ Etsiɔ adesa susuma naa koni ekayagbee bu kwɔŋkwɔŋ lɛ mli; ebuɔ ewala hu he koni akakpãtã hiɛ kɛ klante.

¹⁹ Nyɔŋmɔ gbalaa adesa toi kɛ saa mli piŋmɔ kɛ ewuiaŋ kpemɔ,

²⁰ ni no hãa edaaŋ gboɔ kɛ niyeli, ni ekpoɔ niyenii ni kpɔɔ ewɔlɔmɔ tete.

²¹ Etãa loo ni ehiii lɛ kwɛmɔ, ni egbɔmɔtsoŋ wui ni kulɛ anaaa lɛ bajwereɔ shi faŋŋ.

²² Ebɛŋkɛɔ gbohiiaje, ni ewala bɛŋkɛɔ gbele bɔfoi lɛ.

²³ Kɛji ena bɔfoi akpe lɛ ateŋ eko damɔ mli hã lɛ, ni etsɔ̃ɔ gbɔmɔ nɔ ni hi hã lɛ,

²⁴ ni ena gbɔmɔ mɔbɔ, ni ekɛɛ akɛ, ‘Jiemɔ lɛ kɛjɛ gbohiiajeyaa mli, mina eyinii ni akɛkpɔ̃ lɛ.’

²⁵ No lɛ eheloo aaatsɔ̃ efɔ́ tamɔ gbekɛ nɔ, ni eeeku sɛɛ etsɔ̃ oblanyo ekoŋŋ.

²⁶ Eeekpa Nyɔŋmɔ fai, ni eeeduro lɛ; ni eeeba Nyɔŋmɔ hiɛ kɛ nyamɔ. Eeegba eyiwalaheremɔ lɛ etsɔ̃ɔ mɛi.

²⁷ Ni eeela yɛ adesai ahiɛ, ni eeekɛɛ akɛ, ‘Mifee esha, ni mikɔ̃dɔ̃ nɔ ni ja; ni akɛ mihe fa mi;

²⁸ Ehere misusuma kɛjɛ gbohiiaje ni mihiɛ kã lolo.’

²⁹ Naa, Nyɔŋmɔ feɔ nɛkɛ nii nɛɛ shii abɔ ehãa gbɔmɔ,

³⁰ koni ehere eyiwala kɛjɛ gbohiiaje, koni wala afee enɔ.

³¹ Oo Hiob, ka otoi! Bo mi toi, feemɔ diŋŋ, mibawie!

³² Kɛji oyɛ nɔ ko ni oookɛɛ lɛ, kɛɛmɔ mi! Wiemɔ, shi miitao bo bem mabu.

³³ Kɛjeee nakai lɛ, bo moŋ bo mi toi; feemɔ diŋŋ, ni matsɔ̃ɔ bo nilee.”