Hiob 3 - ŊMALƐ KRƆŊKRƆŊ LƐ

Hiob kɛ esane ŋmɛ Nyɔŋmɔ hiɛ

¹ Be nɛɛ sɛɛ lɛ, Hiob gbele enaa, ni elomɔ gbi ni afɔ lɛ lɛ.

² Hiob kɛɛ akɛ,

³ “Oo Nyɔŋmɔ, hã gbi nɔ ni afɔ mi lɛ hiɛ akpãtã; hã gbi gbɛkɛ ni akɛɛ akɛ, ‘Ana binuu musu lɛ hiɛ akpãtã.’

⁴ Hã jeŋ awo duŋ nakai gbi lɛ. Nyɔŋmɔ ni yɔɔ ŋwɛi lɛ akatiu esɛɛ, ni jeŋ akatse yɛ nɔ.

⁵ Hã enɔ atsi kpii kɛ duŋ; hã atatu kabitii atsi yɛ enɔ, hã duŋ ni ewo kpii shwane lɛ awo ehe gbeyei.

⁶ Hã duŋ kpii awo nakai nyɔŋ lɛ mli; kaahã emii shɛ ehe yɛ afi lɛ mli gbii lɛ ateŋ eko nɔ; akabu lɛ ashi afi lɛ mli nyɔji lɛ anɔ.

⁷ Hɛɛ, hã nakai gbi lɛ atsɔ̃ tamɔ yoo kene; akanu miishɛɛ gbee he yɛ nɔ!

⁸ Hã mɛi ni lomɔɔ gbi alomɔ lɛ, mɛi ni le bonso hiɛlawoo lɛ.

⁹ Hã emaŋkɛ̃ ŋulamii lɛ afɔ̃ɔ kpɛmɔ; hã etao la, shi ekana eko; ni ekana hulu haaigbalamɔ.

¹⁰ Ejaakɛ eŋmɛ gbɛ ni afɔ mi ni etsiii minyɛ musu naa, ni ehã miina jaramɔ.

¹¹ “Mɛɛba migbooo yɛ mifɔmɔ mli; mɛɛba minyɔɔɔ be ni ashwie mi shi lɛ?

¹² Mɛɛba shuɔ he mi fɔ̃ enɔ; ni mɛɛba fufɔ hã mina lɛ miye?

¹³ Kulɛ benɛ miho mikã shi kpoo; kulɛ bɛ miwɔ ni kulɛ benɛ mihe ejɔ mi

¹⁴ kɛkã maŋtsɛmɛi kɛ jeŋ ajinafoi lɛ, mɛi ni saa mamɔɔ mɔji ni ekumɔ hãa amɛhe lɛ,

¹⁵ loo tamɔ lumɛi shikatsɛmɛi, mɛi ni shĩaiaŋ eyimɔ kɛ jwiɛtɛi lɛ ateŋ.

¹⁶ Aloo mɛɛba mitsɔ̃ɔɔ sharakemɔ bi ni enãaa hulu la lɛ?

¹⁷ Jɛi lɛ yitsoŋwalɔi kpaa mɔ haomɔ; ni mɛi ni etɔ amɛ woɔ amɛtsui.

¹⁸ Gboklɛfoi fɛɛ ahe jɔɔ amɛ yɛ jɛi; ni amɛnuuu kpalalɔ gbee dɔŋŋ.

¹⁹ Mɔ bibioo kɛ mɔ wulu feɔ pɛ yɛ jɛi, ni nyɔŋ yeɔ ehe yɛ enuŋtsɔ dɛŋ.

²⁰ “Mɛɛba ahãa mɔ ni yɔɔ haomɔ mli lɛ lá; ni ahãa mɔ ni werɛ eho ehe wala?

²¹ Mɔ ni shweɔ gbele, shi gbele baaa lɛ, ni etsaa shi etaoɔ gbele fe bɔ ni atsaa shi ataoɔ jwetri ni akɛtee lɛ;

²² mɔ ni mii shɛɔ fe nine, ni enyaaa kɛji ena gbonyobu lɛ.

²³ Mɛɛba ahãa gbɔmɔ ni aŋɔ ewala atee, gbɔmɔ ni Nyɔŋmɔ esa eyi lɛ la?

²⁴ Ŋkɔmɔyeli etsɔ̃ miniyenii, ni mifɔseɔ mligbigblimɔ mishwieɔ shi tamɔ nu.

²⁵ Ejaakɛ nɔ gbeyei ni misheɔ lɛ, no nɔŋŋ baa minɔ, ni nɔ ni mitsui fãa yɛ he lɛ, no ji nɔ ni minaa.

²⁶ Mihe ejɔko mi, ni minako miyitso toohe; mibɛ hejɔlɛ shi haomɔ miiba lolo.”