Hiob 29 - ŊMALƐ KRƆŊKRƆŊ LƐ

Hiob naagbee naajiemɔ

¹ Hiob bɔ̃i wiemɔ ekoŋŋ, ni ekɛɛ,

² “Oo, mina ni kulɛ mitsɔ̃ tamɔ bɔ ni miyɔɔ be ko ni eho lɛ, be mli ni Nyɔŋmɔ buɔ mihe lɛ,

³ be ni ela lɛ kpɛɔ yɛ miyiteŋgbɛ ni minaa nii yɛ duŋ mli lɛ.

⁴ No be mli lɛ, minibii shwere, ejaakɛ Nyɔŋmɔ naanyobɔɔ bu miwe lɛ he.

⁵ Ofe lɛ kɛ mi yɛ, ni mimusuŋbii hu bɔle mihe kɛkpe.

⁶ Mitsinai kɛ mitoi hãa mi fufɔ babaoo, ni mimutsei shwere yɛ tɛsai amli.

⁷ Kɛji mije kpo kɛtee maŋ koi lɛ shi, ni miyata shi yɛ blohuŋ lɛ,

⁸ oblahii lɛ hãa mi gbɛ kɛji amɛna mi, ni onukpai lɛ teɔ shi hãa mi,

⁹ lumɛi tete fɔ̃ɔ wiemɔ, ni amɛkɛ amɛniji toɔ amɛnaabu;

¹⁰ abladei agbei laajeɔ, ni amɛlilɛi kpɛtɛɔ amɛdaaŋ.

¹¹ Mɛi fɛɛ ni nuɔ mihe lɛ jɔɔ mi, ni kɛji amɛna mi lɛ, amɛkafoɔ mi.

¹² Ejaakɛ mihereɔ ohiafo ni foɔ kɛ awusã ni bɛ bualɔ lɛ.

¹³ Mɔ ni hiɛ heɔ akpãtã lɛ jɔɔmɔ baninaa mi, ni mihãa okulafo tsui nyɔɔ emli kɛ nyamɔ.

¹⁴ Jalɛ ji mimama ni mibuɔ, ni mijalɛ saneyeli ji mitade kɛ akekre.

¹⁵ Mitsɔ̃ hiŋmɛi mihã shwilafo, ni mitsɔ̃ naji mihã obubuafo.

¹⁶ Mitsɔ̃ tsɛ mihã ohiafoi ni mɛi ni mileee amɛ tete mitao amɛsaji amli mihã amɛ.

¹⁷ Mikumɔ mɔfɔŋ lɛ nyanyɔji yɛ edaaŋ, ni ehã eŋmɛɛ nɔ ni kɔ̃ enaa ni eyaaye lɛ he efɔ̃ shi.

¹⁸ Kɛkɛ ni mikɛɛ mihe akɛ, “Mishĩa teŋ magbo yɛ ni migbii baafa tamɔ shia.

¹⁹ Mitamɔ tso ni efãi etsɛ̃rɛ kɛtee kɛyanina nu, ni bɔ nyɔɔ ebai anɔ nyɔɔŋnyɔɔŋ fɛɛ.

²⁰ Mɛi ahiɛ sɔɔ mi be fɛɛ be, ni migãi lɛ hu naa hewalɛ hee yɛ midɛŋ.”

²¹ Mɛi bo mi toi, ni amɛmɛ, ni amɛfee kpoo kɛmɛ nɔ ni miyɔɔ kɛɛmɔ.

²² Kɛji miwie sɛɛ lɛ, mɔ ko ewieee dɔŋŋ; ni miwiemɔi lɛ boteɔ amɛmli.

²³ Amɛkwɛɔ miwiemɔ gbɛ tamɔ okwaafonyo kwɛɔ nunɛmɔ gbɛ.

²⁴ Miŋmɔɔ kɛji mina akɛ amɛtsui miiye, ni mihiɛ ŋmɔlɔ lɛ woɔ amɛ hewalɛ.

²⁵ Mi, mito amɛshihilɛ lɛ he gbɛjianɔ, ni mihi shi mihã amɛ akɛ yitso; mihi shi yɛ etabilɔi ateŋ akɛ maŋtsɛ. Mihi shi akɛ mɔ ni shɛjeɔ ŋkɔmɔyelɔi amii.