Hiob 28 - ŊMALƐ KRƆŊKRƆŊ LƐ

Nilee kafomɔ

¹ “Anɔkwa, bui yɛ ni atsaa jwiɛtɛi yɛ mli, ni hei yɛ ni anaa shika ni asereɔ yɛ.

² Atsaa dade yɛ shikpɔŋ ni asereɔ akɔɔble kɛjɛɔ tɛ mli.

³ Mɛi sheee duŋ gbeyei, ni amɛboteɔ duŋ mli amɛyataoɔ tɛi ni yɔɔ duŋ kabitii lɛ mli kɛyaa duŋ lɛ shishi tɔ̃ɔ.

⁴ Mɛi yatsaa shika bui yɛ hei ni gbɔmɔ bɛ. Gbɛfalɔi ahiɛ kpaa amɛnɔ; amɛtsotsoroɔ kpãa naa kɛyaa kɛbaa yɛ shika bui lɛ amli.

⁵ Shikpɔŋ mli niyenii jɛɔ; shi shikpɔŋ lɛ nɔŋŋ shishi lɛ, efee tamɔ nɔ ni la eshã.

⁶ Emli tɛi amli anaa safiro yɛ, ni shika futru hu yɛ mli.

⁷ Okropɔŋ leee jɛigbɛ lɛ, akroma ko hiŋmɛi enako jɛi dã.

⁸ Kooloi kakawuai lɛ eko kwraa nane yiko gbɛ lɛ nɔ dã, ni jata tsɔ̃ko enɔ kɛhoko dã.

⁹ Gbɔmɔ kɛ enine tsaa tswɛrɛbo tɛ, ni etsaa gɔji ashishi ekɛwuleɔ amɛ eshwieɔ shi.

¹⁰ Be mli ni ekpɛɔ gbɛ kɛtsɔ̃ɔ tɛsai amli lɛ, ehiŋmɛi naa ojarawatɛi fɛɛ.

¹¹ Etsĩɔ fai anaa koni amɛkanyɛ amɛho, ni nii ni akɛtee shishi lɛ, ejieɔ lɛ kpo etsɔ̃ɔ.

¹² Shi nɛgbɛ abaana nilee yɛ? Ni nɛgbɛ ji he ni niiashishinumɔ yɔɔ?

¹³ Gbɔmɔ leee ejarawalɛ; ni anaaa lɛ yɛ hiɛkãalɔi ashikpɔŋ lɛ nɔ.

¹⁴ Ŋshɔŋ bu kwɔŋkwɔŋ lɛ kɛɛ, ‘Ebɛ mimli!’ Ni ŋshɔ hu kɛɛ, ‘Ebɛ miŋɔɔ!’

¹⁵ Atseee shika aheee, ni anyɛŋ aŋmɛ jwiɛtɛi ni baashɛ enyɔmɔwo.

¹⁶ Ofir shika shɛɛɛ ejara; nakai nɔŋŋ ji ojarawatɛ onike loo safiro.

¹⁷ Shika kɛ ashwishwɛ kɛ lɛ yeee hegbɔ; ni akɛtsakeŋ shika jwinei kpakpai diɛŋtsɛ.

¹⁸ Atsiŋ tɛ̃ŋlɛ̃o kɛ kɔli tã yɛ he ni eyɔɔ; nilee jara wa fe adiagba.

¹⁹ Etiopia ojarawatɛ topasiɔn kɛ lɛ yeee hegbɔ, ni anyɛŋ aŋmɛ shika ŋmiiŋmi ni baashɛ ejara.

²⁰ Belɛ nɛgbɛ nilee jɛɔ mɔ, ni nɛgbɛ ji he ni niiashishinumɔ yɔɔ?

²¹ Aŋɔ tee, ni hiɛkãalɔ ko hiŋmɛi enaŋ; akɛtee loofɔji ni filikiɔ yɛ ŋwɛi tete.

²² Gbele kɛ hiɛkpãtãmɔ kɛɛ, ‘He kɛkɛ wɔnu kɛ wɔtoi ni aawie.’

²³ Nyɔŋmɔ pɛ ni le gbɛ ni kã kɛyaa he; ni lɛ ele he ni eyɔɔ lɛ.

²⁴ Ejaakɛ lɛ lɛ, enaa jeŋ naagbee hei bluublu, ni enaa nɔ fɛɛ nɔ ni yɔɔ ŋwɛi shishi.

²⁵ Be ni eŋmɛ kɔɔyɔɔ hewalɛ ehã lɛ, ni esusu ŋshɔi kɛ fai afalɛ,

²⁶ be ni etsɔ̃ɔ bɔ ni nu anɛ ahã, kɛ bɔ ni srawa agba kɛnyiɛ ŋwɛi ahã lɛ;

²⁷ no mli Nyɔŋmɔ na nɔ krɛdɛɛ ni ji nilee; ni eka etɛ naa ekwɛ ni eŋɔ nɔ.

²⁸ Kɛkɛ ni ekɛɛ adesã akɛ, ‘Naa, Nuŋtsɔ lɛ gbeyeishemɔ lɛ, no ji nilee, ni hewii kɛ efɔŋ hejee ji jwɛŋmɔ.’ ”