Hiob 27 - ŊMALƐ KRƆŊKRƆŊ LƐ

Hiob wie ekoŋŋ

¹ Kɛkɛ ni Hiob wo ewiemɔ lɛ nɔ ekoŋŋ, ni ekɛɛ,

² “Mina Nyɔŋmɔ hiɛkãalɔ lɛ, mɔ ni tswa misane lɛ efɔ̃ lɛ, kɛ Ofe lɛ, mɔ ni hã miwerɛ ho mihe lɛ, akɛ,

³ gbii abɔ ni wala yɔɔ mimli, ni Nyɔŋmɔ mumɔ hãa mimuɔ nɛɛ,

⁴ amale ejeŋ minaa, ni mililɛi lakaŋ mɔ ko.

⁵ Enɛ akagbale mi akɛ mabu nyɛ bem; kɛyaashi magbo lɛ, miŋmɛŋ mibemyeli lɛ he.

⁶ Mihiɛ mijalɛ lɛ mli kpɛŋŋ, ni miŋmɛŋ he; mihenilee ebuuu mi fɔ yɛ miwalaŋ gbii lɛ eko kwraa ahe.

⁷ Hã mihenyɛlɔ atsɔ̃ tamɔ yiwalɔ, ni hã mɔ ni teɔ shi ewoɔ mi lɛ atsɔ̃ tamɔ mɔ fɔŋ.

⁸ Ejaakɛ mɛni ji mɔ ni sheee Nyɔŋmɔ gbeyei lɛ hiɛnɔkãmɔ, be ni Nyɔŋmɔ efo ewala sɛɛ, ni eshɔ̃ ewala yɛ edɛŋ lɛ?

⁹ Kɛji fimɔ ba enɔ lɛ, ani Nyɔŋmɔ aaabo ebolɔmɔ toi?

¹⁰ Ani emii shɛɔ yɛ Ofe lɛ hewɔ, aloo esɔleɔ ebiɔ Nyɔŋmɔ dɛŋ yelikɛbuamɔ be fɛɛ be?

¹¹ Matsɔ̃ɔ nyɛ nɔ ni Nyɔŋmɔ hewalɛ tsuɔ; mikɛ nɔ ni yɔɔ Ofe lɛ he eteŋ nyɛ.

¹² Naa, nyɛ fɛɛ tswɛm nyɛna; mɛɛ hewɔ mɔ ni nyɛwieee wiemɔi ni ahe yɔɔ sɛɛnamɔ?

¹³ Nɔ ni mɔfɔŋ naa yɛ Nyɔŋmɔ dɛŋ nɛ; nɔ ni Ofe lɛ yɔɔ hã yiwalɔ nɛ.

¹⁴ Kɛji ebii ayi fa babaoo lɛ, klante amɛyi fa amɛhã, ni eshwiei lɛ aboloo shɛŋ amɛnaa.

¹⁵ Bii ni eshiɔ yɛ esɛɛ lɛ, gbele hela gbeɔ amɛ; ni amɛkulafoi lɛ foŋ amɛ tete.

¹⁶ Yiwalɔ buaa jwiɛtɛi naa tamɔ mlu, ni eeebua atadei anaa eto tamɔ mɛ;

¹⁷ eeebua naa nɛ, shi mɔ ni baawo ji jalɔ, ni mɔ ni fɔbuu bɛ ehe ji mɔ ni baaja ejwiɛtɛi lɛ.

¹⁸ Shĩa ni emaa lɛ etamɔ anaanu ntaŋ, loo asese ni bulɔ efee.

¹⁹ Eyakãa shi akɛ niiatsɛ, shi ebaŋ lɛ nakai dɔŋŋ; be ni eeegbele ehiŋmɛi lɛ enii ni eyɔɔ lɛ bɛ dɔŋŋ.

²⁰ Ŋmiŋmi mɔɔ lɛ tamɔ faa ni eje ŋa loɔ nibii; ahum woɔ lɛ kɛyaa nyɔɔŋ.

²¹ Bokã kɔɔyɔɔ lɛ woɔ lɛ kɛyaa, ebɛɔ lɛ kɛjeɔ eshĩaŋ kɛyaa.

²² Nyɔŋmɔ tsɛ̃ɔ kɛbaa enɔ ni enaaa lɛ mɔbɔ, be ni etaoɔ foi ejo kɛjɛ edɛŋ lɛ.

²³ Nyɔŋmɔ tswaa edɛŋ eshwieɔ enɔ, ni eboɔ lɛ ‘tsiaa!’ kɛjɛ eshihilɛhe lɛ mli.