Hiob 26 - ŊMALƐ KRƆŊKRƆŊ LƐ

Hiob wiemɔ

¹ Kɛkɛ ni Hiob here nɔ ni ekɛɛ,

² “Ei, bɔ ni oyeɔ obuaa mɔ ni bɛ hewalɛ nɛ? Ei, bɔ ni ohereɔ mɔ ni egbɔjɔ lɛ yiwala nɛ?

³ Kwɛ, bɔ ni owoɔ mɔ ni bɛ jwɛŋmɔ lɛ ŋaa ni ojieɔ nilee babaoo kpo otsɔ̃ɔ nɛ?

⁴ Namɔ wa bo kɛwie lɛ, ni namɔ mumɔ jɛ omli je kpo nɛɛ?

[Bildad]

⁵ Gbohii asusumai lɛ miikpokpo, ni fai lɛ kɛ amɛmli nibii fɛɛ miikpokpo.

⁶ Gbohiiaje kã shi kpetekplee yɛ Nyɔŋmɔ hiɛ; nɔ ko nɔ ko ehaaa nɔ yɛ Nyɔŋmɔ hiɛ.

⁷ Elɛɛ kooyigbɛ ŋwɛi lɛ mli eha shi yɛ kɔɔyɔɔ mli, ni eŋɔ je lɛ etsotsoro shi ni etsotsorooo nɔ ko nɔ ko nɔ.

⁸ Nyɔŋmɔ tiaa nu naa yɛ atatu mli, kɛ̃lɛ nu lɛ tsiimɔ fɛɛɛ atatu lɛ.

⁹ Ehãa atatu lɛɔ shi, ni ehaa nyɔɔŋtsere hiɛ fɛɛ.

¹⁰ Efo akrabatsa yɛ ŋshɔ sɛɛ ni no etsɔ̃ husu ni kã la kɛ duŋ lɛ teŋ.

¹¹ Akulashiŋi ni hiɛ ŋwɛi lɛ ahe kpokpoɔ, ni amɛhe jɔ̃ɔ amɛhe kɛji ekã amɛhiɛ lɛ.

¹² Ejɔɔ ŋshɔ he yɛ ehewalɛ naa, ni ekɛ enilee kpãtãa sasabonsam lɛ hiɛ.

¹³ Emumɔ ji nɔ ni hãa ŋwɛi tseɔ, ni ekɛ enine kpãtãa onufu ni miijo foi ni eya lɛ hiɛ.

¹⁴ Naa, ehewalɛ lɛ he okadii nyɔkɔsiɔ̃ɔi komɛi kɛkɛ nɛ; ni ewiemɔ ablɛbi fioo kɛkɛ wɔnuɔ lɛ. Shi namɔ aaanyɛ ele Nyɔŋmɔ hewalɛ lɛ kɛwula shi.”