Hiob 24 - ŊMALƐ KRƆŊKRƆŊ LƐ

Hiob wiemɔ

¹ “Mɛɛba Ofe lɛ etooo be pɔtɛ̃ɛ ni ekojoɔ, ni mɛɛba mɛi ni sɔmɔɔ lɛ tete leee ekojomɔ bei lɛ?

² Mɛi tsirɛɔ husui kɛyaa sɛɛ, amɛshɔ̃ɔ mɛi akooloi ni amɛkɛshiɔ amɛkooloi anɔ amɛlɛɔ.

³ Amɛshɔ̃ɔ awusãi atejii yɛ amɛdɛŋ kɛyaa; amɛhãa okulafo kɛ etsina toɔ amɛ awaba.

⁴ Amɛtsirɛɔ ohiafoi kɛjeɔ gbɛteŋ, ni shikpɔŋ lɛ nɔ shitswialɔi fɛɛ teeteɔ amɛhe.

⁵ No hewɔ lɛ, naa, ohiafoi lɛ nyiɛ ŋa nɔ ni amɛmiitao niyenii tamɔ ŋaŋ teji amɛhã amɛbii koni amɛye.

⁶ Ŋa nɔ amɛfolɔɔ kooloi aniyenii yɛ; ni yiwalɔi awaintromi amli amɛyeɔ kpɛkpɛo yɛ.

⁷ Amɛkamɔɔ shi nyɔɔŋnyɔɔŋ fɛɛ kɛ amɛhe yayai, ni fɛ̃i be hu amɛbɛ hehaanɔ.

⁸ Gɔji lɛ anɔ nyɔŋmɔ eyi amɛ, ni amɛhɔlɔ tɛkploi amli, ejaakɛ amɛbɛ abobaahe yɛ he ko he ko.

⁹ Amɛteŋ mɛi komɛi tseɔ abifao ni kã fufɔ naa awusã; ni amɛbiɔ, ni ohiafo kɛ ebi abifao tete batoɔ amɛ awaba.

¹⁰ Ohiafoi nyiɛ yayai ni mama bɛ amɛhe; ni amɛtereɔ jatsu kɛ hɔmɔ.

¹¹ Amɛfeɔ mu yɛ yiwalɔi amutsei ateŋ; amɛŋaa wain kɛ wain tsɔnei nɛ, shi kumai yeɔ amɛ.

¹² Aanu mɛi ni miigboi akɛ̃ɛmɔ kɛjɛ maŋ lɛ mli, ni pilafoi miibolɔ kɛmiitsɛ yelikɛbuamɔ; kɛ̃lɛ Nyɔŋmɔ booo amɛfaikpamɔ toi.

¹³ Mɛi yɛ ni amɛkwa la lɛ, amɛnuuu egbɛjianɔtoo shishi, ni amɛhiii shi yɛ egbɛi lɛ anɔ hu.

¹⁴ Gbɔmɔgbelɔ lɛ teɔ shi leebi mra ni eyaa eyagbeɔ ohiafo kɛ shitswialɔ, ni kɛji je na hu lɛ etsɔ̃ɔ tamɔ julɔ.

¹⁵ Ni gbãlãfitelɔ hu mɛ̃ɔ hiɛbulɛ ni ekɛ nɔhaanɔ haa ehiɛ ni ekɛɔ akɛ, “Mɔ ko yooŋ mi.”

¹⁶ Amɛjwaraa shĩai yɛ duŋ mli nyɔɔŋ; ni shwaneshwane lɛ amɛŋmɛɔ amɛyi amɛwoɔ tsuŋ; ni amɛkɛ hulu la lɛ bɛ sane ko.

¹⁷ Ejaakɛ nyɔɔŋ duŋ kpii lɛ ji amɛleebi; ejaakɛ duŋ kpii mli gbeyei nibii lɛ ji amɛnanemɛi.

[Zofa]

¹⁸ Yiwalɔ lɛ, faa shaa lɛ kɛyaa shwiaa, ni Nyɔŋmɔ lomɔɔ eshikpɔŋ ni eshi lɛ; eyaaa ewaintrom lɛ mli gbɛ dɔŋŋ eyaŋaaa wain.

¹⁹ Jeŋ gbimɔ kɛ dɔlɛ hereŋŋ hãa snoo nu miiɔ, nakai gbohiiaje hu loɔ eshafeelɔi kɛyaa.

²⁰ Hiɛkpaa amɛ nɔ yɛ blohuiaŋ, akaiii amɛgbɛii tete dɔŋŋ; ni no hewɔ lɛ, akuɔ yiwalɛ mli tamɔ tso.

²¹ Amɛyeɔ yoo kene ni bɛ bi dɛŋ nii, ni amɛfeee yoo okulafo ejurɔ ko kwraa.

²² Kɛ̃lɛ Nyɔŋmɔ tsɔ̃ɔ ehewalɛ nɔ ehãa hewalɔi awala sɛɛ tsɛɔ; amɛteɔ shi ni amɛgboiɔ, kɛji jeŋshihilɛ je amɛtsine.

²³ Nyɔŋmɔ hãa amɛhiɔ shi shweshweeshwe, ni amɛkɛ amɛhe fɔ̃ɔ no nɔ, shi ehiŋmɛi kã amɛjeŋba he daa.

²⁴ Awoɔ amɛ nɔ be kukuoo ko, kɛkɛ lɛ amɛlaaje; amɛgbiɔ tamɔ jwɛi, ni afolɔɔ amɛ ashwieɔ tamɔ akuɔ abele.

²⁵ Kɛji jeee nakai ji sane lɛ, namɔ baanyɛ ekɛɛ akɛ amalelɔ ji mi, asaŋ ni etsɔ̃ɔ akɛ miwiemɔi lɛ ekome nɛkɛ bɛ mli?”