Hiob 22 - ŊMALƐ KRƆŊKRƆŊ LƐ

Sanegbaa ni ji etɛ̃ lɛ Elifaz wiemɔ

¹ Kɛkɛ ni Elifaz, Temannyo lɛ, here Hiob nɔ ekɛɛ,

² “Aso adesa ko he yɛ sɛɛnamɔ hã Nyɔŋmɔ? Anɔkwa, nilelɔ lɛ, lɛ diɛŋtsɛ ehe sɛɛ enaa.

³ Ani eji miishɛɛ sane hã Ofe lɛ kɛji ofeɔ nii ni ja? Aloo Nyɔŋmɔ naa he sɛɛ kɛji ohi shi ni shwamɔ ko bɛ ohe?

⁴ Ani gbeyei ni osheɔ lɛ hewɔ ni Nyɔŋmɔ kãa ohiɛ, ni ekojoɔ bo nɛɛ?

⁵ Ani jeee oyiwalɛ nifeemɔi ni naa wa kɛ onifɔɔjianii ni aleee naa lɛ hewɔ ekɛ bo yeɔ nɛɛ?

⁶ Ejaakɛ onyɛ onyɛmimɛi anɔ, ni amɛto bo awaba yakatswaa; ni oshɔ̃ amɛheboi oŋmɛ amɛyayai.

⁷ Mɔ ni etɔ lɛ lɛ, ohãaa lɛ nu ni enu; ni mɔ ni hɔmɔ yeɔ lɛ hu okamaa lɛ niyenii.

⁸ Mɔ ni yɔɔ hewalɛ lɛ, lɛ eŋɔɔ shikpɔŋ lɛ, ni mɔ ni hiɛ yɔɔ nyam lɛ, lɛ ehiɔ shikpɔŋ lɛ nɔ.

⁹ Yei okulafoi lɛ, ashwieɔ amɛ, amɛyaa kɛ amɛdɛ̃ folo.

¹⁰ No hewɔ lɛ, tsɔnei ebɔle bo kɛkpe, ni ŋmiŋmi emɔ bo trukaa,

¹¹ duŋ ewo bo, ni no hewɔ lɛ, onaaa nii, ni nu afua eha onɔ.

¹² Aso Nyɔŋmɔ bɛ ŋwɛi shɔŋŋ? Kwɛmɔ bɔ ni ŋulamii lɛ ekomɛi yɔɔ shɔŋŋ diɛŋtsɛ hã.

¹³ No hewɔ lɛ, okɛɔ akɛ, ‘Mɛni ji nɔ ni Nyɔŋmɔ le? Ani eeenyɛ etsɔ̃ duŋ kpii lɛ mli ekojo lo?’

¹⁴ Osusuɔ akɛ atatui kabitii etsimɔ enɔ, ni no hewɔ lɛ, enaaa nii, ni ŋwɛi kɛ shikpɔŋ husu lɛ naa esharaa shi yɛ?

¹⁵ Ani obaaba blema jeŋba gbonyo ni yiwalɔi lɛ ba lɛ eko?

¹⁶ Mɛi ni ashara amɛ kɛtee dani eshɛ amɛbe, ni afɔ amɛshishitoo ashwie kɛ nu?

¹⁷ Amɛkɛɛ Nyɔŋmɔ akɛ, ‘Jee wɔnɔ!’ Ni ‘Mɛni Ofe lɛ baanyɛ wɔ efee?’

¹⁸ Tsɛbelɛ Nyɔŋmɔ ji mɔ ni hã amɛshĩai shwere kɛ nii. Minuuu mɛi fɔ̃ji lɛ ashishi!

¹⁹ Mɛi ni feɔ jalɛnii naa, ni efeɔ amɛ miishɛɛ; mɛi ni efeko efɔŋ ko lɛ yeɔ amɛhe fɛo.

²⁰ Amɛkɛɔ akɛ, ‘Anɔkwa, akpãtã wɔhenyɛlɔi lɛ ahiɛ, ni nii ni amɛshi hu la ekpãtã hiɛ.’

²¹ Okɛ Nyɔŋmɔ akpãtã, koni otoiŋ ajɔ bo; no nɔ aaatsɔ̃ ni oooye ejurɔ.

²² No hewɔ lɛ, mɔ enaa wiemɔi lɛ amli, ni okɛ ewiemɔi lɛ ato otsuiŋ.

²³ Kpalemɔ kɛya Ofe lɛ ŋɔɔ, ni oba ohe shi. Kpa nibii ni ejaaa feemɔ lɛ yɛ owe lɛ mli.

²⁴ Kɛ okɛ oshika yawo mlu mli, ni okɛ Ofir shika yawo faa ni hoɔ shishi tɛi amli,

²⁵ ni oŋɔ Ofe lɛ ofee oshika, kɛ ojwiɛtɛi ni jara wa lɛ,

²⁶ no dani omli aaafli bo yɛ Ofe lɛ hiɛ, ni ooowo ohiɛ nɔ okwɛ Nyɔŋmɔ!

²⁷ Sɔlemɔ okpa lɛ fai ni eeebo bo toi; ni oooye oshiwoi lɛ anɔ.

²⁸ Nɔ ni oooto oyiŋ akɛ ooofee lɛ eeeye omanye ehã bo, ni la aaakpɛ ahã bo yɛ ogbɛ nɔ!

²⁹ Ejaakɛ Nyɔŋmɔ baa mɔ ni woɔ ehe nɔ shi, ni heshibalɔ lɛ, ehereɔ eyiwala.

³⁰ Ehereɔ mɔ ni efeko efɔŋ ko yiwala. Eeehere oyiwala kɛji ofeko esha.”