Hiob 21 - ŊMALƐ KRƆŊKRƆŊ LƐ

¹ Kɛkɛ ni Hiob hã hetoo ekɛɛ:

² “Nyɛboa nɔ ni miyɔɔ kɛɛmɔ toi jogbaŋŋ, ni no afee nɔ ni nyɛkɛaashɛje mimii.

³ Nyɛnaa tsui nyɛhãa mi, ni mi hu mawie; ni kɛji miwie migbe naa lɛ, koni nyɛye mihe fɛo.

⁴ Ani gbɔmɔ mikɛna lɛ? Mɛni hewɔ esa akɛ mato tsui shi?

⁵ Nyɛkwɛa mi, ni nyɛhe aaajɔ̃ nyɛhe; ni nyɛkɛ nyɛnine aaato nyɛnaabu.

⁶ Kɛji mijwɛŋ he lɛ, miwerɛ hoɔ, ni ŋmiŋmi mɔɔ mi.

⁷ Mɛni hewɔ mɛi fɔ̃ji ayi naa wala, amɛgbɔlɔɔ, ni amɛjeɔ agbo kɛ hewalɛ?

⁸ Amɛnaa amɛbii ashweremɔ, ni amɛnabii daraa yɛ amɛhiɛ.

⁹ Asheee gbeyei yɛ amɛshĩai amli, ni Nyɔŋmɔ edɔɔɔ kpãa etooo amɛnɔ.

¹⁰ Amɛtsina hii lɛ kwɔɔ; ni efeee yaka, ni amɛtsina yei lɛ sharakeee.

¹¹ Amɛhãa amɛbii jeɔ kpo, ni amɛtumɔɔ kɛ shwɛmɔ tamɔ toobii.

¹² Amɛlaa kɛnyiɛɔ milɛ̃ kɛ saŋku sɛɛ; ni amɛnyaa kɛji blɛ gbɛɛ.

¹³ Amɛyeɔ ejurɔ yɛ amɛwala mli, ni amɛyaa gbohiiaje kpoo kɛ toiŋjɔlɛ.

¹⁴ Yiwalɔi kɛɔ Nyɔŋmɔ akɛ, “Jee wɔnɔ! Wɔtaooo wɔle bɔ ni otaoɔ akɛ aba jeŋ ahã.

¹⁵ Namɔ ji Ofe lɛ, ni esa akɛ wɔsɔmɔ lɛ lɛ? Ni mɛni sɛɛ wɔɔna kɛji wɔsɔle wɔkpa lɛ fai?”

¹⁶ Naa, amɛshweremɔ lɛ aso jeee amɛ diɛŋtsɛ amɛhewalɛ mli eyɔɔ? Shi yiwalɔi asusumɔ nɛɛ lɛ, mi lɛ miŋɔɔɔ nɔ.

¹⁷ Shii enyiɛ agbe mɛi fɔ̃ji akane lɛ, ni amanehulu eba amɛnɔ, aloo Nyɔŋmɔ ehã amɛpiŋ yɛ emlifu naa

¹⁸ ni amɛtsɔ̃ tamɔ jwɛi yɛ kɔɔyɔɔ naa, loo tutuu ni kɔɔyɔɔ loɔ kɛyaa?

¹⁹ Nyɛkɛɔ akɛ, ‘Nyɔŋmɔ etĩa amɛnifɔɔjianii lɛ anaa eto ehã amɛbii. Dabida! Nyɔŋmɔ baagbala efɔŋfeelɔ toi yɛ lɛ diɛŋtsɛ enɔ fɔŋ lɛ hewɔ, koni amɛna amɛle nɔ ni amɛ diɛŋtsɛ amɛfee lɛ.’

²⁰ Hã ena lɛ diɛŋtsɛ ehiɛkpãtãmɔ kɛ ehiŋmɛii ni esa enaa Ofe lɛ mlifu lɛ eko.

²¹ Ejaakɛ mɛɛ ŋkɔmɔ eyeɔ yɛ ebii ni eshi he, kɛji egbii asɛɛ efo yɛ jeŋ?

²² Aso mɔ ko aaanyɛ Nyɔŋmɔ nilee etsɔ̃ɔ, lɛ mɔ ni ekojoɔ ŋwɛibii tete po lɛ?

²³ Mɔ ko gboɔ ni eyɛ hewalɛ kpiŋtiŋkpliŋŋ be mli ni eyɔɔ hejɔlɛ, ni etoiŋ hu ejɔ lɛ,

²⁴ ni egbɔmɔtso eshwi ni ewui amli eyi obɔ̃ kɛ fɔ tsɔtsɔɔ tsɔ lɛ.

²⁵ Mɔ ko hu gboɔ yɛ awerɛhoo mli, ni eyeko ŋɔɔmɔ ko kwraa dã.

²⁶ Amɛ fɛɛ amɛyajwereɔ su mli, ni gɔgɔmii haa amɛhe.

²⁷ Naa, mile nyɛjwɛŋmɔi kɛ ŋaa ni nyɛtsɔ̃ɔ kɛgba minaa fɛɛ.

²⁸ Ejaakɛ nyɛbiɔ akɛ, ‘Nɛgbɛ lumɔ lɛ we lɛ yɔɔ agbɛnɛ, gbɔmɔ ni ji yiwalɔ lɛ?’

²⁹ Nyɛbiko gbɛfalɔi lɛ anii, ni odase ni amɛyeɔ lɛ nyɛŋɔɔɔ nɔ,

³⁰ akɛ abaa yiwalɔ yi yɛ amanehulu gbi lɛ nɔ; ni mlifu gbi lɛ nɔ lɛ ahereɔ eyiwala?

³¹ Namɔ kãa yiwalɔ hiɛ, ni namɔ woɔ lɛ nɔ ni efee he nyɔmɔ?

³² Kɛji atere lɛ ni ayaafu lɛ, abuɔ esaŋ lɛ he tete.

³³ Nakai mɛi fɛɛ aaanyiɛ esɛɛ; ni mɛi ni etsɔ̃ ehiɛ kɛtee ayifa babaoo.

³⁴ Mɛɛba mɔ nyɛaasumɔ akɛ nyɛkɛ yaka wiemɔi ashɛje mimii lɛ? Nyɛwiemɔi lɛ amale sɔŋŋ ni.”