Hiob 20 - ŊMALƐ KRƆŊKRƆŊ LƐ

¹ Kɛkɛ ni Zofa, Naamanyo lɛ, here Hiob nɔ ni ekɛɛ,

² “Miyiŋ kɛ mi ewie, ni mihe miitswa shi ni mahã bo hetoo.

³ Minu jɛmɔi ni ojɛ mi lɛ, ni mile hetoo ni mahã bo.

⁴ Aso oleee kɛjɛ teteete, kɛjɛ beyinɔ ni abɔ gbɔmɔ adesa ato shikpɔŋ nɛɛ nɔ lɛ,

⁵ akɛ efɔŋfeelɔi anyamɔ sɛɛ etsɛɛɛ, ni mɛi ni sheee Nyɔŋmɔ gbeyei amiishɛɛ yeɔ hiŋmɛitswaa kɛkɛ!

⁶ Egbojee aaakwɔ kɛshɛ ŋwɛi, ni eyitso tete aaashɛ atatuiaŋ;

⁷ kɛ̃lɛ amɛhiɛ aaakpãtã kɛya naanɔ tamɔ amɛ diɛŋtsɛ amɛwamɔ. Mɛi ni ena amɛ pɛŋ lɛ aaabi akɛ, ‘Nɛgbɛ amɛtee?’

⁸ Ebaalaaje tamɔ lamɔ, ni anaŋ lɛ; ebaalaaje tamɔ nyɔɔŋ ninaa.

⁹ Mɛi ni ena lɛ lɛ, enaŋ lɛ dɔŋŋ, ni eshihilɛhe lɛ enaŋ lɛ dɔŋŋ.

¹⁰ Ekɛ lɛ nɔŋŋ eniji baadãi enii ni ena kɛjɛ ohiafoi adɛŋ lɛ ehã amɛ. Ebii baatao koni ohiafoi ana amɛhe tsuijurɔ.

¹¹ Egbɔmɔtso yɛ kpiŋtiŋkpliŋŋ kɛ oblahiiaŋ hewalɛ nɛ, shi fɛɛ baatsɔ̃ sũ.

¹² Yɛ mli akɛ nɔfɔŋfeemɔ ŋɔɔ enaa, ni ekɛteɔ yɛ elilɛi shishi,

¹³ ni emiii akɛ eŋmɛɔ he, shi etsiɔ̃ naa yɛ edaaŋ;

¹⁴ kɛ̃lɛ eniyenii lɛ tsakeɔ yɛ emusuŋ, ni etsɔ̃ɔ tamɔ shinɔi adrɔ yɛ emli.

¹⁵ Emimiɔ mɛi ajwetrii shi eshweɔ fɛɛ ekoŋŋ. Nyɔŋmɔ jieɔ fɛɛ kɛjɛɔ emusuŋ.

¹⁶ Eeeshwɔ shinɔi anaa ebɔɔ, ni no aaagbe lɛ tamɔ nɔ ni blikã ekɔ̃ lɛ.

¹⁷ Ehiŋmɛi enaŋ fai lɛ ekwɛ, fai ni hoɔ ni eyi kɛ wo kɛ fufɔ lɛ.

¹⁸ Eeedãi nibii ni egbo he deŋme fɛɛ ehã, ni enaŋ hegbɛ eye eninenaa nitsumɔ mli ŋɔɔmɔ,

¹⁹ ejaakɛ ewa ohiafoi ayi, ni ekwa amɛ, ni shĩa ni jeee lɛ ema lɛ, eshɔ̃ɔ ekãa naa.

²⁰ Akɛni fufeemɔ leee mitɔ hewɔ lɛ, eyeee nii ni ŋɔɔ enaa ni eshwɛ eko.

²¹ Kɛji eye nii lɛ eshwɛɛɛ eko, no hewɔ lɛ, eninamɔ sɛɛ etsɛŋ.

²² Enii ni ena babaoo lɛ mli po, eeefĩ lɛ, ni hejaramɔ ni baaba enɔ lɛ naa baawa pam.

²³ Nyɔŋmɔ baahã emlifu ni naa wa lɛ anina lɛ, ni ebaanɛ eshwie enɔ, ni ebaatsɔ̃ eniyenii ni aaayi emusu obɔ̃.

²⁴ Ebaajo dade tawuunii anaa foi; shi akɔɔble gãi aaagbu emli kɛho.

²⁵ Abaagbala gãi lɛ, ni ebaaje kpo yɛ egbɔmɔtso lɛ mli; gãi lɛ naa kaŋkaŋ lɛ fãa kɛjɛɔ edɔrɔ mli; ni gbele ŋmiŋmi mɔɔ lɛ.

²⁶ Ejwetri ni ena fɛɛ hiɛ aaakpãtã; la ni mɔ ko mɔ ko huuu baashã enii ni eshwɛ yɛ eshĩa mli fɛɛ.

²⁷ Ŋwɛi aaajie enifɔɔji anii kpo etsɔ̃ɔ, ni je lɛ aaate shi awo lɛ.

²⁸ Enii ni ena fɛɛ hiɛ aaakpãtã, yɛ Nyɔŋmɔ mlifu gbi lɛ nɔ.

²⁹ Nɔ ni Nyɔŋmɔ eto ehã gbɔmɔ fɔŋ nɛ, gboshinii ni Nyɔŋmɔ yɔɔ hã lɛ nɛ.”