Hiob 19 - ŊMALƐ KRƆŊKRƆŊ LƐ

Hiob wiemɔ

¹ Kɛkɛ ni Hiob here nɔ akɛ,

² “Mɛɛ beyinɔ nyɛaagba minaa, ni nyɛkɛ wiemɔ aaasu mitsui kɛaayashi?

³ Shii abɔ nɛɛ fɛɛ lɛ, nyɛmiibɔ mi ahora; efeee nyɛ hiɛgbele akɛ nyɛmiitɔ̃ minɔ?

⁴ Kɛji eyɛ mli tete akɛ mifee efɔŋ lɛ, mɛni no kɔɔ yɛ nyɛhe?

⁵ Kɛji nyɛmiiwo nyɛhe nɔ yɛ minɔ, ni nyɛmiiŋɔ mimanehului lɛ akɛ minɔ fɔŋ lɛ he okadi lɛ,

⁶ no lɛ nyɛnaa nyɛlea akɛ Nyɔŋmɔ ni ebu mi fɔ, ni ekɛ eyaa lɛ ebɔle mi kɛsa miyi.

⁷ Naa, mibolɔɔ akɛ aawa mi yi, shi ahereee mi nɔ; miboɔ koni aye abua mi, shi ayeee mi jalɛ sane.

⁸ Etswa gbogbo ekɛsa minaa, ni no hewɔ lɛ, minyɛɛɛ maho; ni ehã migbɛ lɛ nɔ ewo duŋ.

⁹ Ekpakpla mininamɔ fɛɛ yɛ mihe, ni efo minunyam fɛɛ sɛɛ.

¹⁰ Ekpãtã mihiɛ yɛ he fɛɛ he, ni egbe naa ehã mi; ni efo mihiɛnɔkãmɔ lɛ efɔ̃ shi tamɔ atoɔ tso.

¹¹ Nyɔŋmɔ mli ewo la ewo mi, ni ebuɔ mi akɛ ehenyɛlɔ.

¹² Etabilɔi lɛ ba kutuu, amɛfo sa amɛwo mihe, ni amɛbɔle miwe lɛ kɛkpe.

¹³ Nyɔŋmɔ ehã minyɛmimɛi ekwa mi, ni mɛi ni le mi etsɔ̃mɔ amɛhe mɛi kpɔji amɛhã mi.

¹⁴ Miwekumɛi egbala amɛhe shi, mishieŋtsɛmɛi fɛɛ ahiɛ ekpa minɔ;

¹⁵ mishĩa mli gbɔi ahiɛ ekpa minɔ, mitsuji yei buɔ mi akɛ gbɔ, mitsɔ̃ mɔkpɔŋ yɛ amɛhiɛ.

¹⁶ Kɛji mitsɛ mitsulɔ lɛ, efooo midaaŋ; kɛji mikpa lɛ fai tete, nakai nɔŋŋ.

¹⁷ Midaaŋ lamɔ eje fu ewo miŋa, minyɛ musuŋbii tete nyɛɛɛ mihe fu naa amɛdamɔ.

¹⁸ Mihe guɔ egbo yɛ gbekɛbii tete ahiɛ, ni amɛshwieɔ shi kɛ ŋmɔlɔ kɛji amɛna mi.

¹⁹ Mishieŋtsɛmɛi fɛɛ miinyaŋe mi, ni mɛi ni misumɔɔ etsɔ̃mɔ amɛhiɛ amɛwo mi.

²⁰ Miwui ekpɛtɛ mihewolo, ni dromɔ naa kɛkɛ ni miyɔɔ wala mli nɛɛ.

²¹ Oo, minanemɛi, nyɛnaa mi mɔbɔ! Nyɛnaa mi mɔbɔ, ejaakɛ Nyɔŋmɔ nine eta mihe!

²² Mɛɛba nyɛwaa mi yi tamɔ bɔ ni Nyɔŋmɔ efee mi lɛ?

²³ Oo, mina ni kulɛ aŋmã minaa wiemɔi lɛ! Oo, mina ni kulɛ aŋmã awo wolo mli!

²⁴ Mina ni kulɛ akɛ pɛi kpɛ wiemɔ lɛ, ni akɛ sumui wo mli yɛ tɛsaa nɔ, koni ehi shi kɛya naanɔ.

²⁵ Ejaakɛ mile akɛ, mikpɔlɔ lɛ hiɛ kã, ni naagbee mli lɛ eeedamɔ misɛɛ;

²⁶ ni kɛji mihewolo hiɛ kpãtã nɛkɛ sɛɛ, ni heloo bɛ mihe lɛ, mana Nyɔŋmɔ.

²⁷ Lɛ nɔŋŋ kɛ̃ mana, ni mayoo lɛ; ejeee mɔkpɔŋ ko. Mitsui miitse yɛ mimli!

²⁸ Kɛji nyɛmiikɛɛ akɛ, “Bɔ ni wɔɔtsɔ̃ wɔwa lɛ yi!” Kɛ “Sane tso muu fɛɛ lɛ jɛ lɛ” lɛ,

²⁹ nyɛshea klante gbeyei, klante lɛ ni Nyɔŋmɔ mlifu kɛ kojomɔ kɛbaa lɛ, koni nyɛna nyɛle akɛ kojomɔ ko yɛ.”