Hiob 18 - ŊMALƐ KRƆŊKRƆŊ LƐ

Bildad wie

¹ Kɛkɛ ni Bildad, Shuhinyo lɛ, here Hiob nɔ ni ekɛɛ,

² “Mɛɛ beyinɔ nɔŋŋ ooogbe wiemɔ naa? Susumɔ he koni wɔwie.

³ Mɛɛba obuɔ wɔ tamɔ tsinai? Mɛɛba wɔtamɔ mɛi ni bɛ yitseiaŋ yɛ ohiɛ lɛ?

⁴ Bo diɛŋtsɛ okɛ omlifu yeɔ bo nɔŋŋ ohe awui. Aso ootao akɛ ashi je lɛ ahã bo, aloo ohewɔ lɛ abaafamɔ tɛsai ashwie?

⁵ Hɛɛ, abaagbe mɔ fɔŋ kane lɛ, ni ela lɛ etsoŋ dɔŋŋ!

⁶ Ewe lɛ mli kane egbo, ni agbe kane ni ye eyiteŋ lɛ.

⁷ Enaji ni efamɔɔ waawaa lɛ nɔ baagbɔ, ni lɛ diɛŋtsɛ eyiŋtoi baatsi lɛ atswa shi.

⁸ Ejaakɛ lɛ diɛŋtsɛ enyiɛɔ kɛyaboteɔ yaa mli, ni yaa lɛ duɔ lɛ.

⁹ Enanetsitsi aaadu jwao, ni kpãa ni akɛtsɔ tsɔne aaadu lɛ.

¹⁰ Akɛ kpãa etee sũ mli eto lɛ, ni atsɔ̃ lɛ akpa yɛ gbɛteŋ.

¹¹ Ehewɔ nibii fɛɛ ni bɔle lɛ ehã ŋmiŋmi emɔ lɛ, ni amɛnyiɛ esɛɛ kpaakpa.

¹² Ehewalɛ baatã, ni amanehulu efee kralo eto etɛmɔ kɛ shigbeemɔ.

¹³ Hela baakpãtã ehewolo hiɛ, gbele kromɔbi lɛ baaye eniji kɛ enaji.

¹⁴ Aaakpɔ lɛ yɛ shĩa ni ehiɛ kã nɔ lɛ mli; ni akɛ lɛ aaatee maŋtsɛ ni hãa ŋmiŋmi mɔɔ lɛ lɛ ŋɔɔ.

¹⁵ Mɔkpɔŋ aaayahi ewe lɛ mli kɛji ashwã mli swɔɔ kɛgbe emli muawa sɛɛ.

¹⁶ Eshishifãi lɛ aaagbi yɛ shishigbɛ ni eniji hu aaaŋala yɛ eyiteŋ.

¹⁷ Akaiŋ lɛ yɛ shikpɔŋ lɛ nɔ, ni atsiŋ egbɛi atã yɛ blohuŋ.

¹⁸ Ashwie lɛ kɛje la hiɛ kɛtee duŋ mli, ni ashwie lɛ kɛje jeŋ.

¹⁹ Ebi loo eshwie bɛ emaŋbii ateŋ, ni eshwɛko mɔ ko mɔ ko yɛ shihilɛhe lɛ mli.

²⁰ Anaigbɛbii ahe aaajɔ̃ amɛhe, yɛ nɔ ni eba enɔ lɛ hewɔ, ni ŋmiŋmi aaamɔmɔ bokãgbɛbii hu.

²¹ Anɔkwa, bɔ pɛ ni mɛi ni sheee Nyɔŋmɔ gbeyei ashĩai feɔ nɛ; mɔ ni leee Nyɔŋmɔ lɛ nɛkɛ eshihilɛhe tsɔ̃ɔ.”