Hiob 17 - ŊMALƐ KRƆŊKRƆŊ LƐ

¹ “Misusuma etɔ bahao; miwala gbii lɛ etã, gbonyobu miimɛ mi!

² Anɔkwa ji akɛ hefɛoyelɔi ebɔle mi, ni mihiŋmɛii jwere mlilawoo nibii ni amɛfeɔ lɛ anɔ.

³ Miiye bo anɔkwa, Nyɔŋmɔ, he mi oye!

⁴ Akɛni oŋamɔ amɛjwɛŋmɔi anaa koni amɛkanu sane shishi hewɔ lɛ, ohaŋ amɛye minɔ kunim ko.

⁵ Mɔ ni tsɔ̃ɔ enanemɛi asɛɛgbɛ, bɔ ni afee ni kɛji aja amɛnii lɛ, ena eko lɛ, ebii ahiŋmɛii tete aaafite.

⁶ Efee mi nɔ ni akɛbuɔ abɛ ehã maŋbii, ni mitsɔ̃ mɔ ni afɛ̃ɔ lajɔ̃ ashwieɔ ehiɛ.

⁷ Awerɛho sɔŋŋ ehã mihiŋmɛi nɔ efee kusuu, ni miniji kɛ mi naji efee kanyakanya, amɛtsɔ̃ tamɔ hɔ̃ɔŋ.

⁸ Enɛ hãa mɛi ni feɔ jalɛ nii ahe jɔ̃ɔ amɛhe; ni mɔ ni efeko nɔ fɔŋ griɔ ewoɔ mɔ fɔŋ.

⁹ Kɛ̃lɛ jalɔ lɛ fiɔ shi yɛ egbɛ lɛ nɔ, ni mɔ ni niji ahe tse hewalɛ shwereɔ kɛyaa naanɔ.

¹⁰ Shi nyɛ, nyɛ fɛɛ, nyɛkua nyɛsɛɛ kɛbaa; shi minaŋ nilelɔ ko nilelɔ ko yɛ nyɛteŋ.

¹¹ Migbii lɛ eho etee; miyiŋtoi, ni ji nɔ ni mitsui shwe lɛ, fɛɛ efee yaka.

¹² Amɛkɛ gbɛkɛ feɔ shwane, ni amɛkɛɔ akɛ, “La ebɛŋkɛ”.

¹³ Kɛji miŋɔ miwe lɛ akɛ gbohiiaje, kɛ miŋmɛ misaa lɛ yɛ duŋ lɛ mli,

¹⁴ ni kɛji mikɛɛ bu lɛ akɛ, “Mitsɛ ji bo”, ni mikɛɛ gɔgɔmi akɛ, “Minyɛ loo minyɛmi yoo ji bo lɛ”,

¹⁵ no lɛ nɛgbɛ mihiɛnɔkãmɔ yɔɔ? Namɔ baana mihiɛnɔkãmɔ lɛ?

¹⁶ Ani hiɛnɔkãmɔ hu aaaya Gbohiiaje? Ani wɔ kɛ lɛ fɛɛ baakpleke shi kɛya su mli lo?”