Hiob 14 - ŊMALƐ KRƆŊKRƆŊ LƐ

¹ Gbɔmɔ ni yoo fɔ lɛ yɔɔ nɛɛ, kukuoo kɛkɛ ji ewala be lɛ; ni emli eyi tɔ kɛ haomɔ sɔŋŋ.

² Ewala nɛɛ tamɔ fɔfɔi; ekwɛ̃ɔ, ni eŋalaa shwiaa; ehoɔ tamɔ hɔ̃ɔŋ, ni etsɛɛɛ.

³ Gbɔmɔ ni tamɔ nɛkɛ lɛ ona be ookwɛ lɛ, ni ootao okɛ lɛ aye sane lo?

⁴ Te aaafee tɛŋŋ ni ana nɔ ni he tse kɛ nɔ ni he tseee teŋ srɔto lɛ?

⁵ Akɛni ato ewala be lɛ, ni nyɔji abɔ ni ebaaye yɛ odɛ̃ŋ lɛ, belɛ owo ewala he husu momo.

⁶ Jiemɔ ohiɛ yɛ enɔ; kaafo edaaŋ koni emii ashɛ ehe yɛ ewala mli tamɔ apaafonyo.

⁷ Tso tete yɛ hiɛnɔkãmɔ akɛ kɛji atoo lɛ lɛ, eeehere ekoŋŋ, ni niji ni ebaatsɛ̃rɛ lɛ baadara, amɛgboiŋ.

⁸ Yɛ mli akɛ efãi baatsɛ̃ yɛ sũ mli ni etsoku lɛ baagbo yɛ suŋ,

⁹ shi nu ni eeena nɛkɛ pɛ, eeetsɛ̃ ekoŋŋ, ni eeetsɛ̃rɛ niji tamɔ tso ŋmɔŋ.

¹⁰ Shi gbɔmɔ gboɔ, ni enyɔɔ shi. Kɛji mumɔ na fã yɛ emli lɛ, nɛgbɛ lɛ yɔɔ dɔŋŋ?

¹¹ Bɔ ni nu tãa yɛ kpaakpo mli, ni faa miiɔ ni egbiɔ lɛ,

¹² nakai gbɔmɔ hoɔ ekãa shi ni eteee shi dɔŋŋ. Kɛyaashi beyinɔ ni ŋwɛi aaaho aya lɛ, ehiɛ etsɛŋ, ni atsiɛŋ lɛ yɛ wɔ lɛ mli.

¹³ Mina ni kulɛ oŋɔ mi otee yɛ gbohiiaje, ni oŋɔ mi ohɔ shi kɛyashi beyinɔ ni omlifu lɛ aaaho, koni oto be ohã mi, ni okai mi.

¹⁴ Kɛji gbɔmɔ gbo lɛ, ehiɛ aaakã ekoŋŋ? Mibato mitsui shi mamɛ yɛ misɔ̃ɔmɔ be lɛ mli kɛyaashi be aaashɛ ni aaaŋmɛ̃ɛ mihe.

¹⁵ Kɛkɛ lɛ ooobo otsɛ mi, ni mahere bo nɔ; ni oootao oninenaa bɔɔnii lɛ sɛɛgbɛ.

¹⁶ Ni ohiŋmɛi baakã minyiɛmɔ he, ni obuŋ minifɔɔjianii ahe akɔntaa;

¹⁷ aaasɔo minifɔɔjianii anaa awo kotoku mli, ni obaatsimɔ minifɔɔjianii lɛ anɔ.

¹⁸ Shi bɔ ni gɔŋ tete gbeɔ shi, ni efufluɔ, ni atsiɔ tɛsaa kɛjeɔ eshimaahe,

¹⁹ ni nu yeɔ tɛi ahe, ni eloɔ shikpɔŋ su kɛyaa lɛ, nakai ofiteɔ gbɔmɔ adesa hiɛnɔkãmɔ.

²⁰ Oyeɔ gbɔmɔ hewalɛ nɔ kɛyaa naanɔ, otsakeɔ ehiɛ, ni oshwieɔ lɛ kɛyaa, ni ehoɔ eyaa.

²¹ Kɛji ebii ahiɛ miiba nyam lɛ, eleee; ni kɛji amɛhiɛ miishwie shi hu eleee.

²² Lɛ diɛŋtsɛ pɛ egbɔmɔtsoŋ piŋmɔ he enuɔ, ni lɛ diɛŋtsɛ pɛ ehe ŋkɔmɔ eyeɔ.”