Hiob 12 - ŊMALƐ KRƆŊKRƆŊ LƐ

Hiob Wiemɔ

¹ Kɛkɛ ni Hiob here nɔ ni ekɛɛ akɛ,

² “Ŋwanejee bɛ he akɛ nyɛ ji maŋ lɛ, ni kɛji nyɛgboi pɛ, nilee hu egbo.

³ Shi mi hu miyɛ jwɛŋmɔ tamɔ nyɛ nɔŋŋ; Nyɛfeee mi nilee. Namɔ leee wiemɔi ni nyɛwie nɛɛ?

⁴ Naa mi ni mitsɔ̃ hefɛoyeli nɔ mihã minanemɛi. Mi ni mitsɛɔ Nyɔŋmɔ, ni ehereɔ mi nɔ, ni miyeɔ jalɛ sane, ni shwamɔ ko bɛ mihe lɛ; mi, mitsɔ̃ hefɛoyeli nɔ nɛɛ.

⁵ Mɔ ni he ejɔ lɛ lɛ, ejwɛŋmɔ ji akɛ mɔ ni yɔɔ amanehulu mli lɛ esa ehefɛoyeli. No ji nɔ ni sa mɔ ni eshane ni eyaagbee shi lɛ.

⁶ Julɔi atoiiaŋ ejɔ amɛ yɛ amɛshĩai amli, ni mɛi ni woɔ Nyɔŋmɔ mli la hu yɛ shweshweeshwe, tsɛbelɛ amɛhewalɛ ji amɛnyɔŋmɔ.

⁷ Bo lɛ bi kooloi, ni amɛaatsɔ̃ɔ bo nii; bi loofɔji, ni amɛaagba bo sane;

⁸ loo shikpɔŋ lɛ nɔ tsei, ni amɛaatsɔ̃ɔ bo nii; ni ŋshɔŋ loi hu aaagba bo sane.

⁹ Te nibii nɛɛ ateŋ nɔ ni leee akɛ Yehowa nine ji nɔ ni bɔ lɛ lɛ?

¹⁰ Lɛ edɛŋ nibii fɛɛ ni muɔ awala kɛ adesa mumɔ fɛɛ yɔɔ.

¹¹ Bɔ ni toi kaa wiemɔi ekwɛɔ lɛ, nakai lilɛi hu saa niyenii naa ekwɛɔ.

¹² Nilee yɛ onukpai adɛŋ, shi walasɛɛtsɛlɛ mli jwɛŋmɔ yɔɔ.

¹³ Shi Nyɔŋmɔ lɛ, eyɛ nilee kɛ hewalɛ kɛ ŋaawoo kɛ jwɛŋmɔ fɛɛ.

¹⁴ Kɛji ekumɔ nɔ ko eshwie shi lɛ, mɔ ko bɛ ni baanyɛ esaa etswa ema shi; ni kɛji eŋa mɔ ko yi lɛ, mɔ ko nyɛŋ agbele mɔ lɛ.

¹⁵ Kɛji etsi nunɛmɔ naa lɛ, fai miiɔ; ni kɛji eŋmɛɛ he lɛ fai yimɔɔ, ni amɛjeɔ ŋa kɛhaa shikpɔŋ lɛ nɔ.

¹⁶ Lɛ edɛŋ hewalɛ kɛ nilee fɛɛ yɔɔ; mɔ ni eshishiuɔ mɔ kɛ mɔ ni ashishiuɔ lɛ fɛɛ lɛ, enɔ ji amɛ fɛɛ.

¹⁷ Ehãa nilee ŋmɛɔ ajinafoi, ni ehãa kojolɔi tsɔ̃ɔ kwashiai.

¹⁸ Ekpaa maŋtsɛmɛi, ni ekɛ kpãa fimɔɔ amɛhɛ.

¹⁹ Ekpɔlɔɔ osɔfoi ahewulamɔnii yɛ amɛhe, ni ebaa mɛi ni hiɛ hewalɛ shi.

²⁰ Ehãa wiemɔ tete ŋmɛɔ mɛi ni hiɛ kã amɛnɔ, ni eshɔ̃ɔ hiimeji anilee yɛ amɛdɛŋ.

²¹ Ehãa lumɛi ahe guɔ gboɔ, ni efoɔ hewalɔi ahewalɛ sɛɛ.

²² Ejieɔ nibii ni hɔlɔ dujiaŋ lɛ kpo, ni ehãa la kpɛɔ yɛ hei ni duŋ yɔɔ.

²³ Ehãa maji jeɔ agbo, ni lɛ nɔŋŋ ekpãtãa amɛhiɛ. Elɛɔ maji amli, ni amɛdaraa, ni lɛ nɔŋŋ ekpãtãa amɛhiɛ.

²⁴ Eshɔ̃ɔ nilee yɛ shikpɔŋ lɛ nɔ bii amaŋtsɛmɛi adɛŋ; ni ehãa amɛtsomloɔ yɛ ŋa nɔ he ni nanegbɛ tete bɛ.

²⁵ Amɛgbugbuɔ shi yɛ duŋ ni la ko bɛ mli lɛ mli, ni ehãa amɛdidãa tamɔ dãatɔlɔi.