Hiob 11 - ŊMALƐ KRƆŊKRƆŊ LƐ

Zofar wiemɔ

¹ Kɛkɛ ni Zofar, Naamanyo lɛ here Hiob nɔ, ni ekɛɛ,

² “Ani awieɔ babaoo nɛkɛ ni ahãaa hetoo, ni ahãa naafuutsɛ ŋɔɔ ehe eyeɔ? Ani naafuu wiemɔ hãa mɔ sane jaa?

³ Hiob, aso owiemɔi babaoo nɛɛ aaahã mɛi afee dioo? Ni kɛji oye mɛi ahe fɛo lɛ, mɔ ko akawo bo hiɛgbele?

⁴ Okɛɛ nɔ ni owieɔ lɛ anɔkwale ni, ni yɛ Nyɔŋmɔ hiɛ lɛ ohe tse.

⁵ Oo, kulɛ Nyɔŋmɔ awie, egbɛ edaaŋ ekɛ bo awie,

⁶ koni egbele teemɔŋ nilee hiɛ etsɔ̃ɔ bo, ejaakɛ enilee yɛ naakpɛɛ. Na ole akɛ Nyɔŋmɔ kɛ bo yeko bɔ ni sa otɔ̃mɔ lɛ.

⁷ Ani ooonyɛ ona Nyɔŋmɔ teemɔŋ nibii anaa? Ani ooonyɛ ole he ni Ofe lɛ hewalɛ yatãa?

⁸ Nyɔŋmɔ nɔ kwɔ fe ŋwɛii amli ŋwɛi; mɛni obaanyɛ ofee yɛ he? Ni emli kwɔ voo fe gbohiiaje; mɛni obaanyɛ ofee yɛ he?

⁹ Ekɛ fe shikpɔŋ lɛ kɛlɛ, ni elɛɛ fe ŋshɔ.

¹⁰ Kɛji Nyɔŋmɔ ba, ni ebamɔ bo ewo kpabuŋ, ni etsɛ bo kojomɔ lɛ, namɔ aaanyɛ enaa atsi?

¹¹ Akɛni Nyɔŋmɔ le mɛi ni ji yakagbɔmɛi lɛ, kɛji ena nɔ sha lɛ, aso eeeku ehiɛ efɔ̃ nɔ?

¹² Kwashiai baabɔ̃i jwɛŋmɔ namɔ, be ni ŋaŋ teji baafɔ bi ni he jɔ tamɔ gbɔmɔ.

¹³ Kɛji osaa otsuiŋ ekpakpa lɛ, ooohole oniji anɔ yɛ Nyɔŋmɔ hiɛ.

¹⁴ Kɛji nɔ sha ko yɛ odɛ̃ŋ lɛ, hã eya sɛɛ flɛŋŋ ni ogu nɔ ni ejaaa gbɛ yɛ owe lɛ mli.

¹⁵ Kɛkɛ lɛ, anɔkwa, ooonyɛ ohiɛ nɔ owo, ni kpa ko bɛ ohe, ni ooona ekãa ni osheŋ gbeyei.

¹⁶ Ejaakɛ ohiɛ aaakpa ohaomɔi lɛ fɛɛ nɔ; obaakai haomɔi lɛ tamɔ faaŋ nu ni eho etee kɛkɛ.

¹⁷ Owala be mli aaatse fe shwane, ni kɛji duŋ wo yɛ mli tete lɛ, eeetsɔ tamɔ leebi.

¹⁸ Otsui aaakã omli, ejaakɛ oyɛ hiɛnɔkãmɔ; Nyɔŋmɔ aaabu ohe, ni ooojɔɔ ohe, ni ooofee shweshweeshwe.

¹⁹ Oookã shi, ni mɔ ko woŋ ohe gbeyei; mɛi babaoo aaababi odɛ̃ŋ wamɔ.

²⁰ Shi mɛi fɔ̃ji lɛ aaashwila, ni amɛnaŋ foijeehe. Amɛhiɛnɔkãmɔ pɛ ji gbele.”