Hiob 10 - ŊMALƐ KRƆŊKRƆŊ LƐ

¹ “Mijeŋshihilɛ eje mitsine. Mikɛ mikɔmɔi lɛ baashwie shi kpookpoo. Mibawie mitsui mli dɔlɛ fɛɛ.

² Mibakɛɛ Nyɔŋmɔ akɛ, ‘Kaabu mi fɔ!’ Tsɔɔmɔ mi nɔ hewɔ ni okɛ mi ena nɛɛ.

³ Aso eja gbɛ yɛ ohiɛ, akɛ owa mɔ yi, ni onyaŋe bo diɛŋtsɛ oninenaa nitsumɔnii. Ni ona mɛi fɔ̃ji ayiŋtoi moŋ ahe tsuijurɔ lo?

⁴ Ani adesa hiŋmɛi ohiɛ, ni okwɛɔ nii tamɔ adesa?

⁵ Ani ogbii tamɔ adesa gbii, loo ofii tamɔ adesa afii;

⁶ hewɔ ni otiuɔ mitɔ̃mɔi asɛɛ, ni odiɔ esha ni mifee sɛɛ;

⁷ tsɛbelɛ ole akɛ miyeee fɔ, ni mɔ ko bɛ ni aaanyɛ ashɔ̃ mi yɛ odɛ̃ŋ?

⁸ Oniji shɔ̃ mi, ni amɛbɔ mi, ni agbɛnɛ ofo ohe, ni okɛ nakai niji lɛ nɔŋŋ miikpãtã mihiɛ.

⁹ Kaimɔ akɛ okɛ sũ bɔ mi. Ani oohã matsɔ̃ sũ ekoŋŋ?

¹⁰ Ohã mitsɛ hewalɛ, ni ekɛfɔ mi, ni ohã mida yɛ minyɛ musuŋ.

¹¹ Okɛ wui kɛ fãi tsara migbɔmɔtso, ni okɛ loo kɛ hewolo ha mihe.

¹² Oduro mi wala, ni suɔmɔ ni okɛsumɔ mi sɛɛ efooo, ni odɛ̃ŋ kwɛmɔ ebaa miyi.

¹³ Kɛ̃lɛ okɛ nibii ni eba minɔ nɛɛ tee mi yɛ otsui mli, yɛ oyiŋtoo naa.

¹⁴ Kɛji mifee esha lɛ, okadiɔ ohãa mi, ni okɛ mitɔmɔ lɛ efaaa.

¹⁵ Kɛji mifee nɔ fɔŋ lɛ, kpoo hã mi! Kɛji mifee nɔ ni ja tete lɛ, minyɛɛɛ miyi nɔ mawo, ejaakɛ mihiɛ egbo kpɔtɔɔ, ni miikwɛ mihejaramɔ lɛ moŋ.

¹⁶ Kɛji mikanya mihe lɛ, ogbɔbiɔ mi tamɔ jata, ni ofeɔ naakpɛɛ nibii oshiɔ mi.

¹⁷ Otsakeɔ odasefoi ni wieɔ shiɔ mi, ni ohãa omlifu naa waa yɛ minɔ, ni ohãa ta nyiɛɔ ta sɛɛ kɛtuaa mi.

¹⁸ Nyɔŋmɔ, mɛɛba oŋmɛ gbɛ ni afɔ mi mɔ? Mina ni migbo dani hiŋmɛi ko na mi;

¹⁹ ni kɛjɛ musuŋ lɛ awo mi ayafu, ni mitsɔ̃ tamɔ mɔ ko ni afɔko lɛ kwraa.

²⁰ Te miwala gbii faaa? Ŋmɛɛmɔ mihe koni mawo mitsui fioo,

²¹ dani maya he ni kɛ mitee, ni mijɛŋ jɛi mibaŋ dɔŋŋ, he ni ji duŋ kpii kɛ gbele hɔ̃ɔŋ shikpɔŋ lɛ,

²² duŋ kpii shikpɔŋ kɛ enɔ sakasaka, he ni la ji duŋ lɛ.”