Hebribii 5 - ŊMALƐ KRƆŊKRƆŊ LƐ

¹ Ejaakɛ osɔfonukpa fɛɛ osɔfonukpa ni ahala kɛjɛ gbɔmɛi ateŋ lɛ, awo lɛ osɔfo ni edamɔ gbɔmɛi anajiaŋ yɛ Nyɔŋmɔ nii agbɛfaŋ, koni ekɛ nikeenii kɛ afɔlei abahã yɛ eshai ahewɔ,

² akɛ mɔ ko ni nyɛɔ ehiɛɔ mɛi ni leee nii kɛ mɛi ni edu gbɛ lɛ blɛoo, akɛni lɛ diɛŋtsɛ hu lɛ gbedemɔ ebɔle lɛ kɛkpe lɛ.

³ Ni enɛ hewɔ lɛ ehe ehĩa akɛ eshã eshai ahe afɔle ehã ehe, tamɔ bɔ ni efeɔ ehãa maŋ lɛ.

⁴ Ni mɔ ko eŋɔɔɔ nyam nɛɛ ehãaa lɛ diɛŋtsɛ ehe, akɛ ja Nyɔŋmɔ etsɛ lɛ, tamɔ etsɛ Aaron hu lɛ.

⁵ Nakai nɔŋŋ Kristo hu, jeee lɛ ewo lɛ diɛŋtsɛ ehe osɔfonukpa kɛna hiɛnyam, shi moŋ mɔ ni kɛɛ lɛ akɛ, “Mi-Bi ji bo, mi, mifɔ bo ŋmɛnɛ gbi nɛɛ lɛ.”

⁶ Tamɔ bɔ ni ekɛɛ yɛ he kroko hu akɛ, “Osɔfo ji bo kɛmiiya naanɔ yɛ Melkizedek gbɛjianɔtoo lɛ naa” lɛ.

⁷ Kristo lɛ, be ni eyɔɔ shikpɔŋ nɛɛ nɔ lɛ ekɛ blɔmɔ ni naa wa kɛ yaafonui ŋɔ sɔlemɔi kɛ faikpamɔi ehã mɔ ni baanyɛ eyiwala ahere kɛjɛ gbele mli lɛ, tamɔ afɔle, ni eNyɔŋmɔ gbeyeishemɔ hewɔ lɛ abo lɛ toi.

⁸ Ni tsɛ belɛ Nyɔŋmɔ Bi ji lɛ moŋ nɛ, shi kɛ̃lɛ ekase toiboo kɛjɛ amanehului ni ena lɛ amli.

⁹ Ni be ni ehi kɛwula shi lɛ, etsɔ̃ mɔ ni naanɔ yiwalaheremɔ jeɔ emli ehã mɛi fɛɛ ni boɔ lɛ toi lɛ,

¹⁰ ejaakɛ Nyɔŋmɔ wo lɛ osɔfonukpa yɛ Melkizedek gbɛjianɔtoo lɛ naa.

Kristofoi akahi shi tamɔ gbekɛbii yɛ mumɔŋ gbɛfaŋ

¹¹ Wɔyɛ wiemɔi pii ni wɔɔwie yɛ enɛ he ni shishitsɔɔmɔ wa, ni nyɛyɛ shɔ̃ɔ kɛ niiashishinumɔ.

¹² Ejaakɛ nyɛ ni kulɛ benɛ lɛ esa akɛ nyɛtsɔ̃mɔ tsɔɔlɔi moŋ lɛ, ehe ehĩa akɛ atsɔ̃ɔ nyɛ Nyɔŋmɔ wiemɔi lɛ amli shishijee nibii lɛ ekoŋŋ, ni nyɛtsɔ̃mɔ mɛi ni fufɔ he ehia amɛ, shi jeee niyenii ni tsii.

¹³ Ejaakɛ mɔ fɛɛ mɔ ni yeɔ fufɔ lɛ, eleee jalɛ he nitsɔɔmɔ lɛ he nɔ ko; ejaakɛ fufɔoo ji lɛ.

¹⁴ Shi mɛi ni edara lɛ anɔ ji niyenii ni tsii, mɛi ni fɔ ni amɛfɔɔ feemɔ lɛ ehã amɛhenumɔnii lɛ ele ekpakpa kɛ efɔŋ teŋ srɔto.