Hagai 1 - ŊMALƐ KRƆŊKRƆŊ LƐ

Yehowa fã akɛ atswa Sɔlemɔ we lɛ

¹ Maŋtsɛ Dario, Persia nɔyelɔ lɛ yinɔ afi ni ji enyɔ lɛ nɔ nyɔŋ ni ji ekpaa lɛ klɛŋklɛŋ gbi lɛ nɔ lɛ, Yehowa kɛ wiemɔ hã Gbalɔ Hagai ekɛbahã Yuda Amralo Zerubabel, Shealtiel bi lɛ, kɛ Osɔfonukpa Yoshua, Yehozadak bi lɛ.

² Yehowa Taiatsɛ lɛ kɛɛ Hagai akɛ, “Gbɔmɛi nɛɛ kɛɔ akɛ be ni sa akɛ asaa atswa Sɔlemɔ we lɛ shɛko.”

³ No hewɔ lɛ, Yehowa kɛ wiemɔ nɛɛ tsu Hagai kɛyahã maŋbii lɛ akɛ,

⁴ “Miwebii, aso esa nyɛhiɛ akɛ nyɛhi nyɛtsui ni asɛŋ nɔ amli, be mli ni miwe nɛɛ kã shi amaŋfɔ̃ lɛ lo?

⁵ No hewɔ lɛ, agbɛnɛ nyɛjwɛŋa nyɛjeŋba he jogbaŋŋ.

⁶ Nyɛduɔ nii babaoo, shi fioo pɛ nyɛnaa nyɛkpaa. Nyɛyeɔ nii, shi nyɛtɔrɔɔɔ; ni nyɛnuɔ dãa shi nyɛtɔrɔɔɔ dãa. Nyɛbuɔ mama, shi mɔ ko mɔ ko he efeee kulɔɔ. Ni mɔ ni yeɔ apaa ni awoɔ lɛ nyɔmɔ hu lɛ, ekɛwoɔ kotoku ni shishi egbulɔ mli.”

⁷ Bɔ ni Yehowa kɛɛ nɛ, “Nyɛjwɛŋa, nyɛjeŋba he jogbaŋŋ.

⁸ Nyɛyaa gɔji lɛ anɔ, ni nyɛyafolɔa tsei kɛbaa nyɛkɛbamaa Sɔlemɔ we lɛ, ni mimii baashɛ mihe, ni mapue yɛ minunyam mli.

⁹ “Nyɛkwɛɔ ŋmɔshi nii babaoo gbɛ, shi ebafeɔ fioo kɛkɛ. Ni kɛji nyɛkɛ nikpamɔnii lɛ ba shĩa hu lɛ, mifiliɔ nii lɛ mishwãa. Mɛni hewɔ mifeɔ nakai lɛ? Ejaakɛ miSɔlemɔ we lɛ kã shi amaŋfɔ̃, ni nyɛ lɛ nyɛteŋ mɔ fɛɛ mɔ hiɛ edɔ kɛmiitsu ewe he nii.

¹⁰ No hewɔ ni ŋwɛi etsi nu naa ni enɛɛɛ lɛ, ni shikpɔŋ lɛ hu baaa niyenii lɛ.

¹¹ No hewɔ mihã nuhɔmɔ eba shikpɔŋ lɛ kɛ gɔji lɛ anɔ, ni esa abele kɛ wain kɛ mu kɛ nibaanii fɛɛ kɛ gbɔmɛi kɛ kooloi kɛ ninenaa nitsumɔi fɛɛ ahe nɛɛ.”

Maŋbii lɛ ye Yehowa fãmɔ lɛ nɔ

¹² Kɛkɛ ni Zerubabel, Shealtiel bi lɛ, kɛ Osɔfonukpa Yoshua, Yehozadak bi lɛ, kɛ maŋ lɛ mli mɛi ni shwɛ kɛjɛ nomŋɔɔ lɛ mli kɛba lɛ fɛɛ, bo Yehowa kɛ Gbalɔ Hagai wiemɔi lɛ atoi. Amɛshe gbeyei yɛ Yehowa hiɛ.

¹³ Kɛkɛ ni Hagai, Yehowa bɔfo lɛ, kɛɛ maŋbii lɛ yɛ Yehowa tsumɔ lɛ naa akɛ, “Miikɛɛ nyɛ akɛ mikɛ nyɛ yɛ!”

¹⁴ Kɛkɛ ni Yehowa tee Yuda Amralo Zerubabel, Shealtiel bi lɛ, kɛ Osɔfonukpa Yoshua, Yehozadak bi lɛ, kɛ maŋ lɛ mli bii ni shwɛ kɛjɛ nomŋɔɔ mli kɛba lɛ hu fɛɛ amumɔ shi, ni amɛtee amɛyatsu Yehowa, Taiatsɛ, amɛNyɔŋmɔ lɛ, Sɔlemɔ we lɛ he nii.

¹⁵ Amɛtsu nii nɛɛ yɛ Maŋtsɛ Dario yinɔ afi ni ji enyɔ lɛ nɔ nyɔŋ ni ji ekpaa lɛ nɔ gbi ni ji nyɔŋmai enyɔ kɛ ejwɛ lɛ nɔ.