Ezra 3 - ŊMALƐ KRƆŊKRƆŊ LƐ

Abɔ̃i jamɔ ekoŋŋ

¹ Be ni nyɔŋ ni ji kpawo lɛ shɛ ni Israelbii ni ba lɛ ehe shi yɛ amɛmaji lɛ amli lɛ, amɛ bluublu amɛbabua amɛhe naa yɛ Yerusalɛm.

² Kɛkɛ ni Yeshua, Yehozadak bi lɛ, kɛ enanemɛi osɔfoi lɛ kɛ Zerubabel, Shealtiel bi lɛ, kɛ ewekumɛi kɛ nitsumɔ wo mli, ni amɛma Israel Nyɔŋmɔ lɛ afɔleshãa latɛ lɛ koni amɛshã shãa afɔlei yɛ nɔ, tamɔ bɔ ni aŋma yɛ Nyɔŋmɔ Gbɔmɔ Mose Mla lɛ mli lɛ.

³ Tsɛbelɛ nomii lɛ she maŋsɛɛbii ni yɔɔ shikpɔŋ lɛ nɔ lɛ agbeyei moŋ, shi kɛ̃lɛ amɛma afɔleshãa latɛ lɛ yɛ eshimaahe lɛ nɔŋŋ. Amɛshã leebi shãa afɔlei kɛ gbɛkɛ shãa afɔlei yɛ afɔleshãa latɛ nɛɛ nɔ amɛhã Yehowa.

⁴ Amɛye asesei agbijurɔ lɛ hu, tamɔ bɔ ni ato lɛ, ni amɛshã daa gbi shãa afɔlei lɛ yɛ yibɔ ni ato ahã daa gbi lɛ naa.

⁵ Enɛɛmɛi asɛɛ hu amɛshã daa shãa afɔlei lɛ kɛ nyɔŋ hee afɔlei lɛ kɛ gbii krɔŋkrɔŋi fɛɛ anɔ shãa afɔlei ni Yehowa etsɔ̃ɔ akɛ ashã lɛ, kɛ mɔ fɛɛ mɔ nii ni ekɛbakeɔ Yehowa yɛ tsuijurɔ naa lɛ.

⁶ Nyɔŋ ni ji kpawo lɛ nɔ klɛŋklɛŋ gbi lɛ nɔ amɛjɛ amɛbɔ̃i shãa afɔlei lɛ ashãa kɛ Yehowa hãmɔ, tsɛbelɛ Yehowa Sɔlemɔtsu lɛ anako ato shishi.

Abɔ̃i Sɔlemɔtsu lɛ maa

⁷ Maŋbii lɛ hã shika kɛhã gbogbotswalɔi kɛ srɛŋkifoi lɛ anyɔmɔwoo. Asaŋ amɛhã niyenii kɛ dãa kɛ mu akɛ akɛhã Sidonbii lɛ kɛ Tirobii lɛ, koni amɛyaŋɔ tsenedru tsei kɛjɛ Lebanon kɛba Yopa ŋshɔ lɛ naa tamɔ bɔ ni Koresh, Persia maŋtsɛ lɛ, ehã amɛ hegbɛ akɛ afee lɛ.

⁸ No hewɔ lɛ, be ni Israelbii lɛ ba Yehowa we lɛ yɛ Yerusalɛm lɛ, enɔ afi ni ji enyɔ yɛ nyɔŋ ni ji enyɔ lɛ nɔ lɛ, Zerubabel, Shealtiel bi lɛ, kɛ Yeshua, Yozadak bi lɛ, kɛ amɛnyɛmimɛi ni eshwɛ lɛ kɛ osɔfoi lɛ kɛ Levibii lɛ, kɛ mɛi fɛɛ ni ku amɛsɛɛ kɛjɛ nomŋɔɔ lɛ mli kɛba Yerusalɛm lɛ bɔ̃i nitsumɔ lɛ. Amɛfamɔ Levibii fɛɛ ni eye afii nyɔŋmai enyɔ kɛyaa lɛ koni amɛkwɛ Yehowa we lɛ nitsumɔ lɛ nɔ.

⁹ Yeshua kɛ ebii kɛ enyɛmimɛi lɛ, kɛ Kadmiel kɛ ebii lɛ ni ji Yuda weku lɛ, fee ekome kɛkɔ Nyɔŋmɔ We lɛ nitsumɔi lɛ anɔkwɛmɔ lɛ amɛfɔ̃ amɛnɔ. Levibii ni jɛ Henadad weku lɛ mli kɛ amɛbii kɛ amɛnyɛmimɛi hu ye bua amɛ.

¹⁰ Be ni tsumalɔi lɛ to Yehowa Sɔlemɔtsu lɛ shishi lɛ, osɔfoi ni ewula kɛ amɛtadei lɛ badamɔ shi kɛ amɛtɛtrɛmantrɛi ni amɛhiɛ yɛ amɛdɛŋ kɛ Levibii lɛ ni ji Asafbii lɛ hu kɛ amɛŋoŋoi, koni amɛkafo Yehowa tamɔ bɔ ni Israel Maŋtsɛ David eto gbɛjianɔ lɛ.

¹¹ Amɛla ni amɛhereheree nɔ amɛkɛkafo Yehowa, ni amɛkɛda lɛ shi amɛkɛɛ, “Ejaakɛ ehi, ejaakɛ esuɔmɔ ni ekɛsumɔɔ Israel lɛ yɛ kɛmiiya naanɔ.” Maŋ muu lɛ fɛɛ bɔ oshe waa amɛkɛkafo Yehowa yɛ Yehowa shĩa lɛ shishitoo lɛ hewɔ.

¹² Shi Osɔfoi lɛ kɛ Levibii lɛ kɛ tsɛmɛi awei lɛ onukpai lɛ ateŋ mɛi pii, mɛi ni ji hiimeji ni na klɛŋklɛŋ shĩa lɛ fo waa, be ni ato shĩa nɛɛ shishi yɛ amɛhiɛ lɛ; shi mɛi babaoo hu bɔ oshe waa kɛ nyamɔ.

¹³ No hewɔ lɛ, maŋbii lɛ yooo emli nɔ ni ji nyamɔ oshebɔɔ lɛ kɛ nɔ ni ji yaafo blɔmɔ lɛ, ejaakɛ maŋbii lɛ bɔ oshe waa diɛŋtsɛ, ni anu yɛ shɔŋŋ.