Ester 7 - ŊMALƐ KRƆŊKRƆŊ LƐ

¹ Kɛkɛ ni maŋtsɛ lɛ kɛ Haman tee amɛkɛ Maŋnyɛ Ester yaaye nii.

² Be ni anuɔ dãa yɛ niyenii lɛ ashi yɛ gbi ni ji enyɔ lɛ nɔ lɛ, maŋtsɛ lɛ kɛɛ Ester ekoŋŋ akɛ, “Maŋnyɛ Ester, mɛni ji osane lɛ; mɛni otaoɔ? Nɔ ni ji lɛ bi, ni mafee mahã bo aahu, kɛji maŋtsɛyeli lɛ mlijaa po ni.”

³ Maŋnyɛ Ester here nɔ ni ekɛɛ akɛ, “Maŋtsɛ, kɛji mihiɛ eba nyam yɛ ohiɛ, ni maŋtsɛ yɛ he tsuijurɔ akɛ ebaafee nɔ ni mibabi lɛ lɛ, nɔ ni mibiɔ ji akɛ akɛ miwala ake mi; asaŋ akɛ mimaŋbii hu awala ake amɛ.

⁴ Amrɔ nɛɛ mli lɛ, ahɔ̃ɔ wɔ, mi kɛ mimaŋbii lɛ, ahã koni akpãtã wɔhiɛ, ni agbe wɔ kɛbule wɔshishi. Eji ahɔ̃ɔ wɔ akɛ nyɔji hii kɛ nyɔji yei kɛkɛ kulɛ egbaŋ minaa, ni kulɛ mikɛŋ nɔ ko, ejaakɛ piŋmɔ ni abaapiŋ wɔ lɛ ejeee nɔ ko kwraa kɛji akɛto maŋtsɛ nii ni baafite he.”

⁵ Kɛkɛ ni Maŋtsɛ Ahashwerosh here nɔ, ni ebi Maŋnyɛ Ester akɛ, “Namɔ to yiŋ kɛbaafee nɛkɛ nɔ ko? Namɔ ni, ni nɛgbɛ mɔ lɛ yɔɔ?”

⁶ Maŋnyɛ Ester to he akɛ, “Wɔhenyɛlɔ kɛ wɔyinɔ apamtolɔ lɛ, lɛ ji Haman, gbɔmɔ fɔŋ nɛɛ.” Kɛkɛ ni Haman tsui fã yɛ maŋtsɛ lɛ kɛ maŋnyɛ lɛ hiɛ.

⁷ Maŋtsɛ lɛ te shi kɛ mlifu kɛshi okplɔ̃ lɛ he kɛtee trom ni yɔɔ maŋtsɛ we lɛ he lɛ mli. Haman na maŋtsɛ lɛ hiŋmɛi sha akɛ kɛji ena lɛ Haman lɛ efɔŋ lɛ, eeefee. No hewɔ lɛ, Haman te shi koni ekpa Maŋnyɛ Ester fai koni akɛ ewala ake lɛ.

⁸ Ho ni Haman ho egbee shi yɛ saatso fioo ko ni Ester ta nɔ lɛ naa, koni ekpa lɛ fai pɛ, kɛkɛ ni maŋtsɛ lɛ jɛ maŋtsɛ we lɛ he trom lɛ mli kɛba he ni aŋmɛ okplɔ̃ lɛ yɛ lɛ. Ni ebanina Haman nɛkɛ lɛ ekɛɛ akɛ, “Aso ebaatua maŋnyɛ lɛ yɛ mihiɛ yɛ mi diɛŋtsɛ nɔŋŋ miwe mli lo?” Maŋtsɛ lɛ naa ni nyɔɔ shi nɛkɛ nɔŋŋ kɛkɛ ni piafoi lɛ ha Haman hiɛ.

⁹ Kɛkɛ ni piafoi ni yɔɔ jɛi lɛ ateŋ mɔ kome ko ni gbɛi ji Harbona lɛ kɛɛ akɛ, “Nii, bɛ Haman ekala tso ni ekwɔlɛ ji ninetalɔi nyɔŋmai enumɔ ema ewe lɛ akɛ ekɛbaasɛŋ Mɔdekai mɔ ni here oyiwala lɛ.” Kɛkɛ ni maŋtsɛ lɛ fã akɛ, “Nyɛyasɛŋa lɛ yɛ nɔ!”

¹⁰ No hewɔ lɛ, atee ni ayasɛŋ Haman moŋ yɛ tso ni ekala akɛ ebaasɛŋ Mɔdekai yɛ nɔ lɛ nɔ. Kɛkɛ ni maŋtsɛ lɛ mlila lɛ jɔ.