Ester 6 - ŊMALƐ KRƆŊKRƆŊ LƐ

Maŋtsɛ lɛ wo Mɔdekai hiɛ nyam

¹ Nakai gbi lɛ nyɔɔŋ lɛ mli fɛɛ lɛ wɔ tse yɛ maŋtsɛ lɛ hiŋmɛiŋ. No hewɔ lɛ, efã akɛ ayakɔ yinɔi asaji ahe wolo lɛ kɛba koni abakane atsɔ̃ɔ lɛ.

² Sane ko ni akane lɛ tsɔ̃ɔ bɔ ni Mɔdekai hã ana ale akɛ Bigtan kɛ Teresh, ni ji maŋtsɛ piafoi enyɔ komɛi ni fata mɛi ni buɔ maŋtsɛ we lɛ mli shinai anaa ahe lɛ, to yiŋ akɛ amɛbaagbe Maŋtsɛ Ahashwerosh.

³ Kɛkɛ ni maŋtsɛ lɛ bi akɛ, “Mɛni afee akɛwo Mɔdekai hiɛ nyam yɛ nɔ ni etsu nɛɛ hewɔ?” Maŋtsɛ lɛ sɔ̃ɔlɔi ni yɔɔ emasɛi lɛ here nɔ akɛ, “Afeko nɔ ko nɔ ko ahãko lɛ.”

⁴ Maŋtsɛ lɛ bi akɛ, “Namɔ yɔɔ kpo lɛ nɔ lɛ?” No mli nɔŋŋ lɛ Haman ebashɛ maŋtsɛ we lɛ agbonaagbɛ kpo lɛ nɔ, ni eeba ekɛ maŋtsɛ lɛ abawie he koni asɛŋ Mɔdekai yɛ tso ni ehã akla ama shi ahã Mɔdekai sɛŋmɔ lɛ nɔ.

⁵ No hewɔ lɛ, maŋtsɛ lɛ sɔ̃ɔlɔi lɛ kɛɛ lɛ akɛ, “Haman eshɛ shi, edamɔ kpo lɛ nɔ.” Maŋtsɛ lɛ kɛɛ akɛ, “Hã ni eba mli!”

⁶ Be ni Haman ba lɛ, maŋtsɛ lɛ kɛɛ lɛ akɛ, “Kɛji maŋtsɛ miisumɔ akɛ ewo nuu ko hiɛ nyam lɛ, mɛni esa akɛ afee ahã mɔ lɛ?” Haman susu yɛ eyiŋ ekɛɛ, “Namɔ po maŋtsɛ baasumɔ akɛ ewo ehiɛ nyam nɛɛ akɛ ja mi?”

⁷ No hewɔ lɛ, Haman hã maŋtsɛ lɛ hetoo akɛ, “Nuu lɛ ni maŋtsɛ sumɔɔ akɛ ewo ehiɛ nyam lɛ hewɔ lɛ,

⁸ Maŋtsɛ ahã akɔlɔ maŋtsɛ atadei ni maŋtsɛ woɔ daa lɛ ekomɛi, ni aŋɔ okpɔŋɔ ni maŋtsɛ eta nɔ dã, ni akɛ maŋtsɛ akekre afata he.

⁹ Atu atadei kɛ okpɔŋɔ lɛ awo maŋtsɛ lumɛi onukpai lɛ ateŋ mɔ kome dɛŋ koni ekɛwula nuu lɛ ni Maŋtsɛ sumɔɔ akɛ ewo ehiɛ nyam lɛ. Nuu nɛɛ ni awoɔ ehiɛ nyam lɛ ata okpɔŋɔ lɛ nɔ kɛfo blohuiaŋ yɛ maŋ lɛ mli be mli ni onukpa lɛ nyiɛ ehiɛ. Abɔ oshe kɛnyiɛ gbɔmɔ nɛɛ hiɛ akɛ, ‘Nɛkɛ abaafee ahã mɔ ni maŋtsɛ miisumɔ akɛ ewo ehiɛ nyam lɛ nɛ.’ ”

¹⁰ Kɛkɛ ni maŋtsɛ lɛ kɛɛ Haman akɛ, “Ohe afee oya, koni oŋɔ atade kɛ okpɔŋɔ lɛ, ni oyafee bɔ ni okɛɛ lɛ pɛpɛɛpɛ ohã Mɔdekai, Yudanyo lɛ, ni taa maŋtsɛ koi lɛ shi lɛ. Okashi nɔ ko ni otsɔ̃ɔ akɛ afee lɛ ekoeko.”

¹¹ No hewɔ lɛ, Haman ŋɔ atade lɛ kɛ okpɔŋɔ lɛ kɛtee. Ekɛ atade lɛ yawula Mɔdekai, ni ehã ekwɔ eta okpɔŋɔ lɛ nɔ, ni eta nɔ kɛfo blohuiaŋ yɛ maŋ lɛ mli, ni Haman bɔ oshe kɛnyiɛ Mɔdekai hiɛ ekɛɛ akɛ, “Naa, bɔ ni afeɔ ahãa mɔ ni Maŋtsɛ miisumɔ akɛ ewo ehiɛ nyam lɛ nɛ!”

¹² Kɛkɛ ni Mɔdekai ku esɛɛ kɛba maŋtsɛ koi lɛ shi; shi Haman he fee oya ni eyiŋ kɛtee ewe lɛ kɛ ŋkɔmɔyeli ni eha eyi nɔ.

¹³ Egba eŋa Zeresh kɛ enanemɛi lɛ fɛɛ nɔ osharã ni eyasharã lɛ lɛ. Haman nanemɛi nilelɔi lɛ kɛ eŋa lɛ hu kɛɛ lɛ akɛ, “Kɛji abɔ̃i bo shibaa yɛ Mɔdekai ni jɛ Yudafoi aseshi mli lɛ hiɛ lɛ, belɛ no lɛ onyɛŋ lɛ mɔ; bɔ fɛɛ bɔ ni fee lɛ ebaafe bo.”

Haman gbele

¹⁴ Ahiɛ sanegbaa lɛ mli nɔŋŋ kɛkɛ ni maŋtsɛ lɛ piafoi komɛi bashɛ shi, ni amɛbaŋɔ Haman kplakpla kɛtee Maŋnyɛ Ester okplɔŋmɛɛ lɛ he.