Ester 5 - ŊMALƐ KRƆŊKRƆŊ LƐ

Ester ŋmɛ Maŋtsɛ Ahashwerosh okplɔ̃ kɛ Haman

¹ Be ni Ester ehi ŋmãa gbii etɛ̃ lɛ ekɔlɔ emaŋnyɛ atadei lɛ ewo, kɛkɛ ni ebote maŋtsɛ we lɛ mli, ni etee eyadamɔ maŋtsɛ we lɛ mligbɛ kpo lɛ nɔ yɛ maŋtsɛ lɛ asa lɛ ŋlɛnɔ. Nakai be mli lɛ maŋtsɛ lɛ yɛ asa lɛ nɔ. Eta emaŋtsɛ sɛi lɛ nɔ, ni ehiɛ miikwɛ asa lɛ shinaa lɛ naagbɛ.

² Be ni maŋtsɛ lɛ na Maŋnyɛ Ester damɔ kpo lɛ nɔ lɛ, ena maŋnyɛ lɛ he tsuijurɔ, kɛkɛ ni ekpã enine mli ni ekɛ shika tsi ni ehiɛ lɛ tsɔ̃ɔ Ester hiɛ. Ester tsi ebɛŋkɛ maŋtsɛ lɛ, ni ekɛ enine ta tsi lɛ (yitso lɛ) he.

³ Kɛkɛ ni maŋtsɛ lɛ kɛɛ lɛ akɛ, “Maŋnyɛ Ester, mɛni sane ni, mɛni otaoɔ? Nɔ ni ji lɛ bi, ni abaafee ahã bo aahu, kɛji mimaŋtsɛyeli lɛ mlijaa ni po.”

⁴ Ester to he akɛ, “Kɛji Maŋtsɛ baasumɔ lɛ, no lɛ Nii kɛ Haman aba okplɔ̃ ko ni miiŋmɛ mahã Nii lɛ he ŋmɛnɛ gbɛkɛ nɛɛ.”

⁵ Kɛkɛ ni maŋtsɛ lɛ fã akɛ atsɛ Haman kɛba mramra koni amɛya Ester okplɔ̃ ni eŋmɛɔ lɛ lɛ he amɛyaye nii. Maŋtsɛ lɛ kɛ Haman tee okplɔ̃ ni Maŋnyɛ Ester ŋmɛ lɛ he.

⁶ Be mli ni anuɔ wain lɛ, maŋtsɛ lɛ bi Ester akɛ, “Mɛni ji osane lɛ; mɛni otaoɔ? Nɔ ni ji lɛ bi, ni mafee mahã bo aahu kɛji mi maŋtsɛyeli lɛ mlijaa ni po.”

⁷ Ester here nɔ ni ekɛɛ akɛ,

⁸ “Kɛji mihiɛ eba nyam yɛ Maŋtsɛ hiɛ, ni Nii yɛ he suɔmɔ akɛ eeefee nɔ ni mabi lɛ ehã mi lɛ, no lɛ Nii kɛ Haman aba okplɔ̃ kroko ko ni mibaŋmɛ amɛ wɔ lɛ he koni mikɛ nɔ ni miyɔɔ ni mabi lɛ aŋmɛ Nii hiɛ wɔ.”

Haman to Mɔdekai gbele he ŋaa

⁹ Haman shi maŋtsɛ we lɛ gbi lɛ kɛ miishɛɛ kɛ mliflimɔ. Shi be ni ena Mɔdekai yɛ maŋtsɛ koi lɛ shi, ni Mɔdekai eteee shi ehãaa lɛ, asaŋ ni ehe hu kpokpooo lɛ, Haman mli wo Mɔdekai la naakpa.

¹⁰ Shi kɛ̃lɛ Haman ye ehe nɔ, ni eyiŋ etee ewe lɛ, ni etsu ayatsɛ enanemɛi abahã lɛ; etsɛ eŋa Zeresh hu ebafata enanemɛi lɛ ahe.

¹¹ Haman kɛ enii ni eyɔɔ kɛ emusuŋbii ayifalɛ kɛ bɔ ni maŋtsɛ lɛ ewo enɔ grɔŋŋ kɛ bɔ ni ehiɛ hewalɛ fe lumɛi kɛ maŋtsɛ tsuji lɛ fɛɛ ateŋ eko fɛɛ eko lɛ shi ehe nɔ etsɔ̃ɔ amɛ.

¹² Etee nɔ ni ekɛɛ akɛ, “Maŋnyɛ Ester po hãaa mɔ ko mɔ ko kɛ maŋtsɛ lɛ aba okplɔ̃ ni eŋmɛ maŋtsɛ lɛ he akɛ ja mi, ni wɔ hu ekpee mi kɛ maŋtsɛ lɛ ekoŋŋ kɛmiiya wɔyaye nii.

¹³ Shi kɛ̃lɛ enɛɛmɛi fɛɛ asɛɛ lɛ, gbii abɔ ni minaa Mɔdekai Yudanyo lɛ ta maŋtsɛ koi shi lolo lɛ mitsui etɔɔɔ.”

¹⁴ No hewɔ lɛ, eŋa lɛ kɛ enanemɛi lɛ fɛɛ wo lɛ ŋaa akɛ, “Hã akla tsei ama shi; ekwɔlɛ afee ninetalɔi nyɔŋmai enumɔ. Obi maŋtsɛ lɛ koni asɛŋ Mɔdekai yɛ nɔ wɔ leebi. No sɛɛ lɛ, okɛ maŋtsɛ lɛ aya okplɔ̃ lɛ he kɛ miishɛɛ.” Ŋaa ni awo nɛɛ ŋɔɔ Haman naa; ni no hewɔ lɛ, ehã akla sɛŋmɔtso lɛ ama shi.