Efesobii 2 - ŊMALƐ KRƆŊKRƆŊ LƐ

Kɛjɛ gbele mli kɛtee wala mli

¹ Nyɛ hu kulɛ gbohii ji nyɛ yɛ nyɛ nɔtɔmɔi kɛ nyɛhe eshai lɛ amli.

² Ni nyɛnyiɛ yɛ mli sa yɛ no je nɛɛŋ su lɛ naa, yɛ lumɔ ni yɔɔ kɔɔyɔɔ mli hewalɛ lɛ ni ji mumɔ ni tsuɔ nii amrɔ nɛɛ yɛ toigbele bii amli lɛ naa.

³ Amɛteŋ wɔ fɛɛ hu wɔhi wɔba wɔjeŋ yɛ sa yɛ wɔheloo akɔnɔi lɛ amli, ni wɔtsu nii ni heloo kɛ jwɛŋmɔ sumɔɔ lɛ, ni wɔji bii ni Nyɔŋmɔ mlifu yɔɔ wɔnɔ yɛ wɔfɔmɔsu lɛ naa, tamɔ mɛi ni eshwɛ lɛ nɔŋŋ.

⁴ Shi Nyɔŋmɔ ni emɔbɔnalɛ fa babaoo lɛ, etsɔ̃ lɛ diɛŋtsɛ esuɔmɔ babaoo ni ekɛsumɔ wɔ lɛ nɔ,

⁵ ni wɔ ni kulɛ gbohii ji wɔ yɛ nɔtɔmɔi amli lɛ, etsiɛ wɔ kɛ Kristo fɛɛ hiɛ, dromɔ akɛhere nyɛyiwala!

⁶ Ni etee wɔ kɛ lɛ shi, ni eŋɔ wɔ kɛ lɛ fɛɛ eta ŋwɛiniiaŋ yɛ lɛ Kristo Yesu lɛ mli.

⁷ Efee enɛ koni bei ni baaba lɛ amli lɛ ejie lɛ diɛŋtsɛ edromɔ falɛ ni teke nɔ lɛ kpo yɛ emli ni hi hã wɔ yɛ Kristo Yesu mli lɛ mli.

⁸ Ejaakɛ dromɔ akɛhere nyɛyiwala kɛtsɔ hemɔkɛyeli nɔ, ni enɛ lɛ, jeee nyɛmli ejɛ, Nyɔŋmɔ nɔkeenɔ ni,

⁹ jeee nitsumɔi amli ejɛ koni mɔ ko akashwã.

¹⁰ Ejaakɛ enine naa nitsumɔnii ji wɔ, abɔ wɔ yɛ Kristo Yesu mli ahã nitsumɔi kpakpai ni Nyɔŋmɔ esaa eto koni wɔnyiɛ yɛ mli lɛ.

Kristo mli lɛ Yudafonyo kɛ jeŋmajiaŋnyo efee ekome

¹¹ No hewɔ lɛ, nyɛkaia akɛ nyɛ ni sa ni nyɛ ji jeŋmajiaŋbii yɛ heloo gbɛfaŋ ni mɛi ni atsɛɔ amɛ ketiafolɔi ni akɛ niji folɔ amɛ ketia yɛ heloo mli lɛ tsɛɔ nyɛ foolɔi lɛ,

¹² nyɛbɛ Kristo nakai be lɛ mli. Ni mɛi kpɔ̃ji ji nyɛ yɛ Israel maŋ biyeli gbɛfaŋ kɛ gbɔi yɛ kpãŋmɔi ni damɔ Nyɔŋmɔ shiwoo nɔ lɛ agbɛfaŋ hu, nyɛbɛ hiɛnɔkãmɔ ko, ni nyɛbɛ Nyɔŋmɔ tete yɛ je nɛɛŋ.

¹³ Shi agbɛnɛ, Kristo Yesu mli lɛ, nyɛ ni sa ni nyɛyɔɔ shɔŋŋ lɛ, nyɛtsɔ̃ Kristo lá lɛ nɔ nyɛbɛŋkɛ.

¹⁴ Ejaakɛ lɛ ji wɔhejɔlɛ lɛ, mɔ ni ŋɔ kui enyɔ lɛ fɛɛ efee ekome, ni ekumɔ gbogbo afabaŋ ni yɔɔ teŋ ni ji nyɛɛ lɛ.

¹⁵ Ni ekɛ lɛ diɛŋtsɛ eheloo gu Mla lɛ kitãi kɛ akpɔi lɛ, koni ekɛ mɛi enyɔ lɛ fɛɛ abɔ gbɔmɔ hee kome yɛ lɛ diɛŋtsɛ emli ni ehã hejɔlɛ aba,

¹⁶ ni ekpãtã amɛyi enyɔ lɛ fɛɛ kɛ Nyɔŋmɔ yɛ gbɔmɔtso kome mli yɛ sɛŋmɔtso lɛ nɔ, nɔ nɔ ni egbe nyɛɛ lɛ yɛ lɛ.

¹⁷ Ni eba ebajaje hejɔlɛ Sanekpakpa lɛ etsɔ̃ɔ nyɛ ni nyɛyɔɔ shɔŋŋ lɛ kɛ mɛi ni bɛŋkɛ lɛ hu.

¹⁸ Ejaakɛ enɔ wɔyi enyɔ lɛ fɛɛ wɔtsɔ̃ɔ wɔnaa gbɛ, yɛ Mumɔ kome mli, kɛyaa Tsɛ lɛ ŋɔɔ.

¹⁹ No hewɔ lɛ, agbɛnɛ jeee gbɔi kɛ mɛi kpɔ̃ji ji nyɛ dɔŋŋ, shi moŋ mɛi krɔŋkrɔŋi lɛ ananemɛi maŋbii kɛ Nyɔŋmɔ webii,

²⁰ ni atswa nyɛ ama bɔfoi lɛ kɛ gbalɔi lɛ shishitoo lɛ ni ekoŋtɛ ji Yesu Kristo lɛ nɔ.

²¹ Emli atswa tsu muu lɛ fɛɛ afee ekome yɛ, ni eeda eefee Sɔlemɔtsu krɔŋkrɔŋ yɛ Nuŋtsɔ lɛ mli;

²² ni emli atswaa nyɛ awoɔ afee Nyɔŋmɔ shihilɛhe yɛ Mumɔ mli lɛ.