Jajelɔ 8 - ŊMALƐ KRƆŊKRƆŊ LƐ

¹ Namɔ kɛ nilelɔ ye egbɔ; ni namɔ nuɔ nibii ashishi? Nilee hãa gbɔmɔ saa ehiɛ kɛ ŋmɔlɔ, ni ehiɛtumɔ laajeɔ.

Ye Maŋtsɛ gbee nɔ

² Ye maŋtsɛ lɛ fãmɔ nɔ; yɛ okitã krɔŋŋ ni okã lɛ hewɔ lɛ kaahã enɔyeli hao bo.

³ Kɛji sane lɛ eŋɔɔɔ enaa lɛ kaashashao shi; oshi ehiɛ oya, ejaakɛ maŋtsɛ feɔ nɔ ni lɛ esumɔɔ.

⁴ Kɛji maŋtsɛ kɛɛ lɛ, akɛɛɛ dɔŋŋ; ni namɔ po baanyɛ lɛ ebi akɛ, “Mɛni po ofeɔ nɛɛ?”

⁵ Mɔ ni yeɔ famɔ nɔ lɛ, enaaa amane. Nilelɔ le beyinɔ kɛ gbɛ nɔ ni eeetsɔ̃ efee nɔ ni yɔɔ feemɔ;

⁶ ejaakɛ nɔ fɛɛ nɔ yɛ be kɛ gbɛ nɔ ni atsɔ̃ɔ atsuɔ ehenii; kɛ̃lɛ naagba kpaaa yɛ gbɔmɔ adesa nɔ.

⁷ Gbɔmɔ ko leee nɔ ni baaba; ni namɔ hu aaanyɛ atsɔ̃ɔ lɛ bɔ ni ebaaba lɛ ehã?

⁸ Mɔ ko kwraa bɛ hewalɛ ni ekɛaatsĩ gbɔmɔ wala mumɔ naa koni ekafã yɛ emli; ni gbi ni gbɔmɔ gboɔ lɛ, mɔ ko kwraa bɛ hewalɛ yɛ nɔ. Ta ko ni wɔnyɛŋ naa foi wɔje ni; ni nɔ ko hu nyɛŋ ehã mɛi ni ahe yɔɔ mli aje mli.

Mɔ ni efeee nɔ ni ja kɛ Mɔ ni feɔ nɔ ni ja

⁹ Be ni mitao nii fɛɛ ni afeɔ yɛ jeŋ ni gbɔmɔ adesa kpɔfuɔ enyɛmi gbɔmɔ yɛ mli nɛɛ mli fitsofitso lɛ, nɔ ni mina nɛ:

¹⁰ Mina mɛi fɔ̃ji ni egboi ni afu amɛ. Gbɔmɛi nɛɛ awalabeiaŋ lɛ, anaa amɛ amɛyaa amɛbaa yɛ Sɔlemɔ we lɛ; shi amɛgbele mli lɛ, ajie amɛyi yɛ maŋ lɛ mli, he nɔŋŋ ni amɛfee nakai efɔ̃ji lɛ yɛ lɛ. Enɛ hu shishinumɔ bɛ he.

¹¹ Akɛ ni awooo esha he nyɔmɔ oya hewɔ lɛ, gbɔmɛi ahe ehomɔ kɛ efɔŋfeemɔ.

¹² Yɛ mli akɛ eshafeelɔ feɔ esha shii oha, ni ewala sɛɛ tsɛɔ moŋ nɛ, kɛ̃lɛ mile akɛ mɛi fɛɛ ni sheɔ Nyɔŋmɔ gbeyei lɛ ebaahi ehã amɛ, ejaakɛ amɛsheɔ Nyɔŋmɔ gbeyei;

¹³ shi yiwalɔ lɛ ehiŋ ehaŋ lɛ, ni ewala sɛɛ etsɛŋ tamɔ hɔ̃ɔŋ, ejaakɛ esheee Nyɔŋmɔ gbeyei.

¹⁴ Nɔ ko hu ni yaa nɔ yɛ je nɛɛŋ ni shishinumɔ bɛ he nɛ: gbɔmɛi kpakpai komɛi naa amanehului ni sa gbɔmɛi fɔ̃ji moŋ; ni yiwalɔi komɛi yɛ ni amɛna dromɔ ni sa gbɔmɛi kpakpai moŋ. Nɔ ni mikɛɛ ji akɛ enɛ hu lɛ shishinumɔ bɛ he.

¹⁵ Kɛkɛ ni mikafo miishɛɛ ejaakɛ nɔ kpakpa ko bɛ hã gbɔmɔ yɛ hulu shishi nɛɛ, fe akɛ eye nii ni enu nɔ ko, ni ena miishɛɛ. Eeenyɛ ekã he efee enɛ be mli ni eyɔɔ wala ni Nyɔŋmɔ ehã lɛ yɛ je nɛɛŋ.

¹⁶ Be ni mikɛ mijwɛŋmɔ fɔ̃ nɔ akɛ matao male nii koni manu nii ni yaa nɔ, yɛ je nɛɛŋ shishi, hewɔ ni nyɔɔŋnyɔɔŋ kɛ shwaneshwane fɛɛ lɛ gbɔmɔ naaa wɔ ewɔ lɛ,

¹⁷ mina mile Nyɔŋmɔ dɛŋ nitsumɔi fɛɛ; shi mina akɛ bɔ fɛɛ bɔ ni gbɔmɔ baagba ehe naa ehã lɛ, enuŋ nii ni yaa nɔ yɛ je nɛɛ mli lɛ shishi kɔkɔɔkɔ. Tsɛbelɛ nilelɔ aaakɛɛ akɛ ena ele nii fɛɛ nɛ, shi anɔkwale ji akɛ enyɛŋ ele nɔ fɛɛ nɔ.