Jajelɔ 7 - ŊMALƐ KRƆŊKRƆŊ LƐ

Wala he susumɔi

¹ Gbɛi kpakpa hi fe mu ni jara wa, ni gbele gbi hi fe fɔmɔ gbi.

² Kɛji otee shĩa ni aafee yara yɛ mli lɛ, ehi fe nɔ ni otee shĩa ni aŋmɛ okplɔ̃ yɛ jɛi, ejaakɛ esa akɛ gbɔmɔ hiɛ ahi nɔ akɛ gbɔmɛi fɛɛ anaagbee ji gbele.

³ Awerɛho hi fe ŋmɔlɔ; ejaakɛ awerɛho baahã ohiɛ afee mɔbɔmɔbɔ moŋ nɛ, shi ehãa jwɛŋmɔ mli gbeleɔ.

⁴ He ni nilelɔ tsui kãa ji shĩa ni yara yɔɔ mli; shi he ni kwashia tsui kãa ji shĩa ni mliflimɔ yɔɔ mli.

⁵ Ehi akɛ ooonu ni nilelɔi miikã bo, fe nɔ ni ooonu ni kwashiai miila kɛmiikafo bo.

⁶ Ejaakɛ kwashiai aŋmɔlɔ lɛ, etamɔ ŋmei fɛlɛmɔ yɛ kukwɛi shishi la mli. No hu yakanii ni.

⁷ Niseniianii hãa nilelɔ tsɔ̃ɔ kwashia, ni nyɔɔŋnihamɔ fiteɔ gbɔmɔ jwɛŋmɔ.

⁸ Nɔ ko naagbee hi fe eshishijee; ni tsuishitoo mumɔ hi fe hewoo mumɔ.

⁹ Kaahã omli fu oya, ejaakɛ kwashiai amiinaa ji he ni mlifu yɔɔ.

¹⁰ Kaakɛɛ akɛ, “Mɛɛba nyɛsɛɛ ŋɔɔ fe ŋmɛnɛŋmɛnɛ?” Ejaakɛ jeee nilee mli obaajɛ obi nɛkɛ sane.

¹¹ Nilee ni gboshinii fata he he yɛ sɛɛnamɔ hã hiɛkãalɔi;

¹² ejaakɛ nilee baa mɔ yi tamɔ shika baa mɔ yi lɛ, shi nɔ ni nilee kɛfe shika ji akɛ nilee baa mɔ ni yɔɔ eko yi.

¹³ Susumɔ Nyɔŋmɔ nitsumɔ he. Namɔ baanyɛ ejaje nɔ ni Nyɔŋmɔ diɛŋtsɛ ekɔ̃dɔ̃ lɛ.

¹⁴ Be ni nibii eshwere lɛ, nya; ni kɛji joomɔ be ba lɛ susumɔ he; ejaakɛ Nyɔŋmɔ dɛŋ enyɔ lɛ fɛɛ jɛ, bɔ ni afee ni gbɔmɔ adesa akanyɛ ele nɔ ni baaba wɔsɛɛ.

¹⁵ Mina mihiɛ nii yɛ yaka je nɛɛ mli. Jalɔ gboɔ yɛ ejalɛ nifeemɔ mli, ni gbɔmɔ fɔŋ lɛ moŋ wala sɛɛ tsɛɔ yɛ efɔŋ ni efeɔ mli.

¹⁶ Kaafee ohe jalɔ tuutu; asaŋ kaafee ohe nilelɔ tuutu. Mɛɛba oookpãtã bo diɛŋtsɛ ohiɛ?

¹⁷ Kaafee ohe yiwalɔ tuutu, ni asaŋ kaafee kwashia. Mɛni hewɔ esa akɛ ogbo be ni ogbele be shɛko.

¹⁸ Ehi akɛ omɔɔ enɛ mli, ni kaajie onine yɛ he; ejaakɛ mɔ ni sheɔ Nyɔŋmɔ lɛ ebaaje fɛɛ mli shweshweeshwe.

¹⁹ Nilee hãa nilelɔ kome naa hewalɛ ni fe nɔyelɔi nyɔŋma ahewalɛ yɛ maŋ.

²⁰ Anɔkwa, adesa ko bɛ shikpɔŋ nɛɛ nɔ ni ekpakpa sɔŋŋ kɛkɛ efeɔ, ni efeee esha.

²¹ Kaadi gbɔmɛi anaa wiemɔi fɛɛ asɛɛ, kɛjeee nakai lɛ ooonu ni otsulɔ miilomɔ bo;

²² ole yɛ bo diɛŋtsɛ oyitsoŋ akɛ bo hu olomɔ mɛi komɛi shii abɔ pɛŋ.

²³ Mikɛ nilee eka enɛɛmɛi fɛɛ mikwɛ. Mitswa fai shi akɛ male nii; shi miyanyɛɛɛ.

²⁴ Namɔ baanyɛ ena? Esɛɛ jɛkɛ, ni emli kwɔ jogbaŋŋ diɛŋtsɛ.

²⁵ Mikɛ mijwɛŋmɔ fɔ̃ nɔ akɛ mibagbɛlɛ shi matao nilee kɛ nɔ fɛɛ nɔ mli. Mitao akɛ male yitsoŋwalɛ ni yɔɔ buulufeemɔ mli, kɛ bɔ ni buulufeemɔ lɛ sɛkɛyeli ni.

²⁶ Mina nɔ ko ni joɔ fe gbele tete; no ji yoo. Etsui mli eyi kɛ tsɔnei kɛ yai ni akɛduɔ mɔ, ni eniji lɛ kɔsɔŋkɔsɔ ni fimɔɔ mɔ ni. Mɔ ni sheɔ Nyɔŋmɔ gbeyei jeɔ yoo akpa mli; shi eshafeelɔ lɛ yoo duɔ lɛ.

²⁷ Tsɔɔlɔ lɛ kɛɛ akɛ, “Naa, mihiɛ taomɔ mli ekomekome lɛ, nɔ ni mina nɛ.

²⁸ Nibii ni mikɛ mijwɛŋmɔ etao aahu lɛ, minako. Mɛi akpe mli lɛ, mina nuu kome pɛ ni yɔɔ hiɛsɔɔ; shi minaaa yoo kome nɛkɛ yɛ amɛteŋ.

²⁹ Naa, nɔ ni kɛkɛ ni mina ji akɛ Nyɔŋmɔ bɔ gbɔmɔ adesa koni ehi shi krɔŋŋ; shi gbɔmɔ adesa ni eto ŋai srɔtoi.