Jajelɔ 6 - ŊMALƐ KRƆŊKRƆŊ LƐ

¹ Nɔ fɔŋ ko yɛ ni mina yɛ jeŋ ni ebu yɛ gbɔmɛi ateŋ.

² Mɔ ko hiɔ shi, ni Nyɔŋmɔ hãa enaa shika kɛ nii kɛ anunyam bɔ ni nɔ ko bɛ ni eshweɔ ni enaaa; shi kɛ̃lɛ edurooo lɛ hewalɛ ni ekɛye eninamɔ lɛ mli ŋɔɔmɔ; shi moŋ mɔkpɔŋ ji mɔ ni bayeɔ eninamɔ lɛ mli ŋɔɔmɔ lɛ. Enɛ lɛ yakanii ni, ni eji hejaramɔ sane kpele.

³ Kɛji mɔ ko fɔ bii oha, ni ewala sɛɛ tsɛ, ni eye afii babaoo, shi eyeee jeŋ nibii kpakpai amli ŋɔɔmɔ lɛ eko, ni enaaa fuu kpakpa hu lɛ, miikɛɛ akɛ abifao ni ashrake tete nɔ hi fe lɛ.

⁴ Sharakemɔ bi lɛ yaka eba jeŋ lɛ; enyiɛ duŋ mli kɛba, ni duŋ lɛ mli nɔŋŋ etsɔ̃ɔ kɛyaa, ni hiɛ jeɔ enɔ.

⁵ Enaaa hulu lɛ, eleee nɔ ko nɔ ko hu; kɛ̃lɛ lɛ moŋ enaa hejɔlɛ fe mɔ ni

⁶ aaaye afii akpei enyɔ tete, shi eyeee jeŋ nibii kpakpai lɛ amli ŋɔɔmɔ ko. Ani jeee he koome mɛi enyɔ nɛɛ fɛɛ yaa lo?

⁷ Gbɔmɔ tɔlɛ kɛ deŋme fɛɛ lɛ, emusu kɛkɛ hewɔ; kɛ̃lɛ gbɔmɔ leee mitɔ.

⁸ Mɛni ji nɔ ni nilelɔ kɛfe kwashia? Ni mɛni ohiafo naa kɛji ele bɔ ni ahiɛɔ he ahãa yɛ mɛi ahiɛ?

⁹ Nɔ ni onaa kɛ ohiŋmɛii lɛ, ehi fe nɔ ni oshweɔ. Enɛ hu lɛ yakanii kɛ kɔɔyɔɔ abɔyeli ni.

¹⁰ Nɔ ni eba dã lɛ, awo lɛ gbɛi momo; ni ale nɔ ni ji gbɔmɔ, asaŋ akɛ gbɔmɔ nyɛɛɛ ekɛ mɔ ni yɔɔ hewalɛ fe lɛ afu daa.

¹¹ Wiemɔ pii lɛ ekɛ yakanii pii nyiɛ; ni mɛni ji sɛɛnamɔ ni yɔɔ mli hã gbɔmɔ?

¹² Namɔ le nɔ ni hi hã gbɔmɔ adesa ni eyɔɔ yaka wala be kukuoo nɛɛ ni hoɔ tamɔ lamɔ nɛɛ mli? Ni namɔ baanyɛ egba gbɔmɔ nɔ ni baaba jeŋ yɛ egbele sɛɛ?