Jajelɔ 12 - ŊMALƐ KRƆŊKRƆŊ LƐ

¹ Kaimɔ obɔlɔ lɛ yɛ oblahiiaŋ, be ni gbii fɔ̃ji lɛ kɛ afii fɔ̃ji lɛ nako ashɛ, be mli ni obaakɛɛ akɛ, “Jeŋshihilɛ eŋɔɔɔ” lɛ.

² Nakai be lɛ hulu la lɛ kɛ nyɔɔŋtsere lɛ kɛ ŋulamii lɛ baafee sulii, ni atatui baabua amɛhe naa ekoŋŋ yɛ nunɛmɔ sɛɛ.

³ Nakai be lɛ ogbɔmɔtso shĩa lɛ he bulɔi, ni ji oniji lɛ baakpokpo, ni onaji kpiŋtiŋkpliŋŋ lɛ egbɔjɔ, ni onyanyɔji, nigbɛlɛlɔi lɛ, nyɛɛɛ nii amɛgbɛlɛ dɔŋŋ, ejaakɛ eshwɛ amɛyi fioo ko kɛkɛ, ni hiŋmɛii lɛ ni kwɛɔ samfɛji lɛ amli nii lɛ anɔ eha.

⁴ Toii lɛ ni anaa kamɔ ni boɔ blohuiaŋ toi lɛ nuŋ nɔ ko nɔ ko dɔŋŋ; amɛnuŋ nigbɛlɛmɔ tsɔne lɛ gbɛɛmɔ ni naa eba shi lɛ he ekpakpa ko. Loofɔlɔ gbee aaatsĩɛ bo yɛ wɔ mli moŋ, shi ooonu yei lalɔi agbei, ejaakɛ osharãi sɔŋŋ yɔɔ gbɛteŋ.

⁵ Oooshe hei ni kwɔlɔ gbeyei, ni onyiɛmɔ tete baatsɔ̃ osharã ahã bo. Oyiteŋ baayɛ tamɔ odonti ni egba, ni ohetsimɔ baawa ahã bo, ni nɔ ko nɔ ko efeŋ bo akɔnɔ dɔŋŋ. Akɛni gbɔmɔ adesa miiya enaanɔ shĩa lɛ, no hewɔ ni yarafeelɔi foɔ shi yɛ blohuiaŋ lɛ.

⁶ Jwiɛtɛi kɔsɔŋkɔsɔ lɛ baatse, ni shika kane lɛ baatswa shi ni ejwa, ni faaŋyaa gbɛ lɛ baajwa yɛ nubu lɛ naa.

⁷ Wɔsũ gbɔmɔtsei lɛ baaku sɛɛ kɛya shikpɔŋ sũ mli ekoŋŋ, he ni amɛjɛ lɛ, ni mumɔ lɛ hu baaku esɛɛ eya Nyɔŋmɔ mɔ ŋɔɔ ni ejɛ eba lɛ ŋɔɔ ekoŋŋ.

⁸ Yakanii mli yakanii, Tsɔɔlɔ lɛ kɛɛ; fɛɛ lɛ yakanii ni.

Wiemɔi lɛ anaamuu

⁹ Tsɔɔlɔ lɛ le nii, ni etsɔ̃ɔ emaŋbii lɛ nii ni ele lɛ eko. Ekase abɛi ahe nii, ejwɛŋ amɛhe ni ekɛ amɛ to shihilɛ he ekwɛ kɛ hiɛshikãmɔ.

¹⁰ Tsɔɔlɔ lɛ bɔ mɔdɛŋ etao wiemɔi ni ŋɔɔ, asaŋ ni ja, ni eŋmala anɔkwale wiemɔi.

¹¹ Nilelɔ daaŋ wiemɔi lɛ etamɔ kplamɔ tso. Tookwɛlɔ koome ni yɔɔ lɛ, ewiemɔi ni abua naa lɛ yɛ kpɛŋŋ tamɔ plɛkoo ni aka awo tso mli.

¹² Mibi, kwɛmɔ ni ahi yɛ enɛɛmɛi asɛɛ. Woloŋmaa bɛ naagbee, ni nikasemɔ tuutu lɛ gbɔmɔtso tɔlɛ ni.

¹³ Sane tso muu lɛ ni onu lɛ fɛɛ naagbee nɛ. She Nyɔŋmɔ gbeyei, ni oye ekitãi lɛ anɔ, ejaakɛ enɛ ji nitsumɔ kwraa ni gbɔmɔ yɔɔ tsumɔ.

¹⁴ Ejaakɛ Nyɔŋmɔ baakojo wɔ yɛ nɔ fɛɛ nɔ ni wɔfee gbɛfaŋ, ehi jio, ehiii jio, teemɔŋ nibii fɛɛ fata he.