Daniel 12 - ŊMALƐ KRƆŊKRƆŊ LƐ

Naagbee be lɛ

¹ Bɔfo lɛ tsa ewiemɔ lɛ nɔ akɛ, “Ni nakai be lɛ mli lɛ Mikael, lumɔ kpeteŋkple ni buɔ omaŋbii lɛ ahe lɛ, aaate shi adamɔ shi; kɛkɛ lɛ fimɔ be ko aaaba ni anako ehenɔ dã kɛjɛ beyinɔ ni aje maŋtoo shishi kɛbashi nakai be lɛ mli. Nakai be lɛ mli lɛ, aaahere omaŋ lɛ mli mɔ fɛɛ mɔ ni aaana akɛ aŋma egbɛi yɛ wala wolo lɛ mli lɛ yiwala.

² Ni mɛi ni egboi lɛ ateŋ mɛi pii ahiɛ aaatsɛ̃; mɛi komɛi aaatee naanɔ wala mli; shi mɛi komɛi hu aaatee naanɔ hiɛgbele mli.

³ Ni mɛi ni le nii lɛ aaakpɛ tamɔ atatu kpɛmɔ, ni mɛi ni etsɔ̃ɔ mɛi pii agbɛ kɛtee jalɛ mli lɛ aaakpɛ tamɔ ŋulamii kɛaatee naanɔ.”

⁴ Shi ekɛɛ mi akɛ, “Bo, Daniel, tsiimɔ wiemɔi nɛɛ anɔ, ni osɔo wolo nɛɛ naa kɛyashi naagbee be lɛ. Ni mɛi pii aaagba amɛhe naa kɛya kɛba kɛtao nɔ ni eba lɛ shishi; ni nilee aaafa.”

⁵ Kɛkɛ ni mi, Daniel, mikwɛ ni naa, mɛi krokomɛi enyɔ damɔ shi, mɔ kome yɛ faa lɛ naa biɛ nɛɛ, ni mɔ kome hu yɛ faa lɛ sɛɛ.

⁶ Ni mɔ kome kɛɛ nuu lɛ ni wo klala ni yɛɔ, mɔ ni yɔɔ faa lɛ sɛɛ lɛ akɛ, “Mɛɛ beyinɔ aaagbe nɛkɛ naakpɛɛnii nɛɛ anaa?”

⁷ Ni nuu ni wo klala ni yɔɔ faa lɛ sɛɛ lɛ wo eninejurɔ kɛ ebɛku nɔ kɛtee ŋwɛi, ni ekã mɔ ni hiɛ kã kɛyaa naanɔ lɛ kitã. Minu ni ekɛɛ, “Ebaakã he kɛyashi afii etɛ̃ kɛ fã, beyinɔ ni aaakumɔ hewalɛ ni waa mɛi krɔŋkrɔŋi lɛ ayi lɛ agbe naa; kɛkɛ lɛ aaagbe enɛɛmɛi fɛɛ naa.”

⁸ Minu nɔ ni bɔfo lɛ wie lɛ, shi minuuu shishi. No hewɔ lɛ, mibi akɛ, “Minuŋtsɔ, ofainɛ, te enɛɛmɛi anaagbee lɛ aaatamɔ tɛŋŋ?”

⁹ Eto he ekɛɛ akɛ, “Daniel, kwɛmɔ ohiɛgbɛ ni oya! Wiemɔi lɛ atsimɔ nɔ, ni asɔo amɛnaa kɛyaashi naagbee be lɛ aaaba.

¹⁰ Mɛi pii baatsuu amɛhe koni amɛyɛ futafuta ni amɛhe atse. Shi yitsoŋwalɔi lɛ ateŋ mɔ ko mɔ ko nuŋ shishi, ni amɛaaya nɔ amɛye yitsoŋwalɛ sane; shi nilelɔi lɛ, amɛ lɛ, amɛbaanu nɔ ni yaa nɔ lɛ shishi.

¹¹ “Kɛji agu daa gbi afɔle ni ashãa lɛ, be ni akɛ amãgã ni buleɔ Sɔlemɔ we lɛ baama shi lɛ, gbii akpe kɛ ohai enyɔ kɛ nyɔŋmai nɛɛhu baaho.

¹² Aaajɔɔ mɛi fɛɛ ni baato amɛtsui shi koni amɛye anɔkwa kɛyashi gbii akpe kɛ ohai etɛ̃ kɛ nyɔŋmai etɛ̃ kɛ enumɔ lɛ.

¹³ “Ni bo Daniel, ye anɔkwa kɛyashi naagbee; ni no sɛɛ lɛ obaagbo; shi ooote shi, ni ooona aekoo ni sa bo yɛ naagbee gbi lɛ nɔ.”