Amos 8 - ŊMALƐ KRƆŊKRƆŊ LƐ

Kɛntɛŋ kɛ emli tsei ayibii he ninaa

¹ Yehowa, Taiatsɛ lɛ, jie ninaa nɛɛ etsɔ̃ɔ mi, Mina kɛntɛŋ kɛ emli tsei ayibii ni etsu.

² Kɛkɛ ni Yehowa bi mi akɛ, “Amos, mɛni onaa nɛɛ?” Mihere nɔ akɛ, “Kɛntɛŋ kɛ emli tsei ayibii ni etsu.” Kɛkɛ ni Yehowa kɛɛ mi akɛ, “Mimaŋ Israelbii akpulu eyi agbɛnɛ; mikɛ amɛhe ekeŋ amɛ dɔŋŋ; mibagbala amɛtoi.

³ Nakai gbi lɛ, lalai ni amɛlaa yɛ Sɔlemɔ we lɛ mli lɛ baatsɔ̃ yara ni awo. Gbɔmɛi babaoo baaplene, ni abaashɛrɛ gbohii ashwie hei fɛɛ nigii, shi mɛi baafee diŋŋ kɛkwɛ.”

Israel hiɛkpãtãmɔ

⁴ Nyɛboa toi, nyɛ mɛi ni nyɛnaanaa mɛi ni efi amɛ lɛ anɔ, ni nyɛkpãtãa ohiafoi ahiɛ yɛ shikpɔŋ lɛ nɔ.

⁵ Nyɛkɛɔ akɛ, “Mɛɛbe po nyɔŋ hee lɛ aaanyɔ shi koni wɔbɔ̃i ŋmaa hɔ̃ɔmɔ? Ni mɛɛbe po abaagbe hejɔɔmɔ gbi lɛ yeli naa koni wɔbɔ̃i wɔŋmaa hɔ̃ɔmɔ kɛ susumɔnɔ ni shɛɛɛ, asaŋ kɛ nsɛnitɛ ni atse nɔ?

⁶ Wɔkɛ jwiɛtɛi aaahe ohiafo nyɔmɔtsɛ, ni wɔkɛ tokota aaahe mɔ ni efi lɛ, ni ŋmaa shishi tutuu tete wɔɔhɔ̃ɔ lɛ kɛ jarawalɛ.”

⁷ Yehowa, Israel Nyɔŋmɔ lɛ, ekã kitã akɛ; “Anɔkwa, mihiɛ kpaŋ amɛnifeemɔnii lɛ eko nɔ kɔkɔɔkɔ.

⁸ Ni no hewɔ lɛ, shikpɔŋ lɛ baahoso, ni enɔ gbɔmɛi fɛɛ baaye awerɛhoo. Shikpɔŋ lɛ nɔ baafee hamahama tamɔ bɔ ni Nilo Faa lɛ yiɔ, ni ekuɔ, ni asaŋ ekpɔŋɔ lɛ.”

⁹ Nuŋtsɔ Nyɔŋmɔ kɛɛ akɛ, “Nakai gbi lɛ nɔ lɛ, mibahã hulu anyɔ shi shwane koni duŋ awo yɛ shikpɔŋ lɛ nɔ shwane fintiŋŋ.

¹⁰ Mahã gbii juji ni nyɛyeɔ lɛ atsɔ̃ yarafeemɔ, ni lalai kɛ ŋɔɔmɔ ni nyɛlaa lɛ baatsɔ̃ yaafo. Nyɛbaabumɔ kpekpe, ni nyɛaashɛshɛɛ nyɛyi, ni nyɛbaatsɔ̃mɔ tamɔ fɔlɔi ni miiye amɛbi koome ni egbo he awerɛho. Nakai gbi lɛ naagbee mli baajoo pam.

¹¹ “Naa, gbii miiba, ni mahã hɔ̃mɔ aba shikpɔŋ lɛ nɔ. Jeee daaŋŋmãa hɔ̃mɔ mɛi baaye lɛ, ni jeee nu hɔ̃mɔ hu, shi moŋ abaaye Yehowa wiemɔi lɛ he kumai.

¹² Mɛi baafo shi kɛjɛ ŋshɔnaa kɛya ŋshɔnaa, ni amɛaajɛ kooyigbɛ kɛya bokãgbɛ ni amɛmiitao Yehowa naa wiemɔ lɛ, shi amɛnaŋ.

¹³ Nakai gbi lɛ nɔ lɛ, oblayei hefɛotsɛmɛi kɛ oblahii fɛɛ baatɔtɔɔ biti kɛ kumai,

¹⁴ ni mɛi ni kɛ Samaria jemawɔji lɛ kãa kitã amɛkɛɔ akɛ, ‘Mina Dan jemawɔŋ lɛ,’ loo ‘Mina Beersheba jemawɔŋ lɛ,’ amɛbaanyɔnyɔi.”