Amos 7 - ŊMALƐ KRƆŊKRƆŊ LƐ

Balabii ahe ninaa

¹ Nɔ ni Nuŋtsɔ Nyɔŋmɔ jie etsɔ̃ɔ mi nɛ. Mina akɛ Nuŋtsɔ Nyɔŋmɔ bɔ baalabii ku ko. Be nɛɛ mli lɛ afɛ̃ maŋtsɛ jwɛi momo, ni jwɛi lɛ eje shishi eefu kɛmiiba ekoŋŋ.

² Be ni baalabii lɛ eye shikpɔŋ lɛ nɔ jwɛfɔ lɛ amɛgbe naa lɛ, mikɛɛ akɛ, “Ao! Yehowa Ofe, ofainɛ, okɛ Israelbii ahe ake amɛ. Te aaafee tɛŋŋ ni amɛyi aaana wala hu? Ejaakɛ amɛhe waaa.”

³ Yehowa tsake eyiŋtoo lɛ, ni ekɛɛ akɛ, “Nɔ ni ona nɛɛ baŋ mli.”

La he ninaa

⁴ Nɔ ni Nuŋtsɔ Nyɔŋmɔ jie etsɔ̃ɔ mi nɛ. Mina akɛ Nuŋtsɔ Nyɔŋmɔ miitao akɛ ekɛ la agbala ewebii lɛ atoi. La lɛ ŋala nu ni yɔɔ shikpɔŋ lɛ shishi lɛ, kɛkɛ ni la lɛ bɔ̃i shikpɔŋ lɛ hu shãa.

⁵ Kɛkɛ ni mikɛɛ akɛ, “Ao! Yehowa, ofainɛ, foo sɛɛ. Te aaafee tɛŋŋ ni Israelbii, owebii lɛ, ayi aaana wala hu? Ejaakɛ amɛhe waaa.”

⁶ Yehowa tsake eyiŋtoo, ni ekɛɛ akɛ, “Enɛ hu baŋ mli.”

Plomo he ninaa

⁷ Yehowa jie ninaa nɛɛ hu etsɔ̃ɔ mi. Mina Yehowa ni edamɔ gbogbo ni akɛ plomo susu ni atswa he; ni ehiɛ plomo yɛ edɛŋ.

⁸ Yehowa bi mi akɛ, “Amos, mɛni onaa nɛɛ?” Mito he akɛ, “Plomo.” Kɛkɛ ni ekɛɛ akɛ, “Naa, mikɛ plomo nɛɛ miisusu mimaŋ Israelbii ajalɛ. Mihaŋ amɛye amɛhe dɔŋŋ.

⁹ Hei ni Isak shwie lɛ jaa yɛ lɛ baatsɔ̃mɔ amaŋfɔ̃, ni hei ni Israelbii jaa yɛ lɛ hu baafee koikoi; ni mibafã ta mawo Yeroboam we lɛ.”

Amos kɛ Osɔfo Amazia

¹⁰ Kɛkɛ ni Amazia, Betel osɔfo lɛ, tsu kɛtee Yeroboam, Israel maŋtsɛ lɛ, ŋɔɔ akɛ, “Amos etee oyinɔ apam yɛ Israelbii lɛ ateŋ. Ewiemɔi lɛ baafite maŋ lɛ.”

¹¹ Nɔ ni Amos kɛɛ ji, “Yeroboam baanyɔ yɛ ta mli, ni nom kɛ̃ aaaŋɔ Israelbii kɛaaje amɛshikpɔŋ nɔ kɛaatee.”

¹² Osɔfo Amazia kɛɛ Amos akɛ, “Gbalɔ, jee biɛ ni oya Yuda shikpɔŋ lɛ nɔ, ni oyaye nii yɛ jɛi koni ogba yɛ jɛi.

¹³ Kaakã he oogba yɛ Betel nɛɛ dɔŋŋ, ejaakɛ biɛ ji he ni maŋtsɛ lɛ jaa yɛ, ni biɛ nɔŋŋ ji he ni maŋtsɛyelihe nɛɛ Sɔlemɔ we wulu ni fe fɛɛ lɛ hu yɔɔ.”

¹⁴ Amos here nɔ, ni ekɛɛ Osɔfo Amazia akɛ, “Jeee gbalɔ ji mi, ni asaŋ jeee gbalɔ bi hu ji mi. Shi moŋ koolookwɛlɔ ji mi, ni misaa sikamore tsei ahe hu;

¹⁵ ni kooloo mikpalaa ni Yehowa tsɛ mi; ni Yehowa kɛɛ mi akɛ, ‘Yaa, ni oyagba otsɔ̃ɔ Israelbii lɛ.’

¹⁶ No hewɔ lɛ, agbɛnɛ, bo nɔ ni Yehowa kɛɔ toi ejaakɛ okɛɛ mikagba mishi Israel lɛ, ni mikashiɛ mishi Isak we lɛ.

¹⁷ Amazia, bɔ ni Yehowa kɛɛ nɛ, ‘Oŋa baatsɔ̃ ajwamãŋ yɛ maŋ lɛ mli, ni obihii kɛ obiyei lɛ baanyɔnyɔɔ yɛ ta naa; abaaŋɔ oshikpɔŋ lɛ, ni abaaja ahã mɛi kpɔji. Bo diɛŋtsɛ lɛ maŋsɛɛ obaaya oyagbo yɛ, yɛ shikpɔŋ ko nɔ ni ajaaa Nyɔŋmɔ yɛ; ni Israelbii lɛ nom kɛ̃ aaaŋɔ amɛ kɛaaje amɛshikpɔŋ nɔ kɛaatee.’ ”