Amos 6 - ŊMALƐ KRƆŊKRƆŊ LƐ

Israel hiɛkpãtãmɔ

¹ Kpoo hã mɛi ni ahe ejɔ amɛ yɛ Zion, kɛ mɛi ni nyɛsusuɔ akɛ amɛyɛ shweshweeshwe yɛ Samaria Gɔŋ lɛ nɔ, mɛi ni ji lumɛi wuji yɛ maŋ wulu, Israel mli lɛ, mɛi aŋɔɔ ni Israelbii lɛ baa lɛ.

² Nyɛhoa kɛyaa Kalne maŋ lɛ mli nyɛyakwɛa jɛi; ni nyɛjɛa jɛi nyɛyaa Hamat maŋ wulu lɛ mli; nyɛtsaa nɔ kɛkpelekea shi kɛyaa Filistibii amaŋ ni ji Gat lɛ mli hu. Ani amɛhi fe maŋtsɛyelihei nɛɛ lo; aloo amɛshikpɔŋ lɛ da fe nyɛshikpɔŋ lɛ,

³ nyɛ mɛi ni nyɛtsiɔ gbi fɔŋ lɛ kɛyaa sɛɛ shɔŋŋ, ni nyɛkɛ nakai feemɔ moŋ hãa gbi fɔŋ lɛ bɛŋkɛɔ nyɛ lɛ?

⁴ Kpoo hã mɛi ni kãmɔɔ shuɔ wu saatsei anɔ amɛwɔɔ, ni amɛkpãa amɛmli yɛ saatsei bibii anɔ, ni amɛyeɔ too ku lɛ mli gwantɛŋbii kɛ tsina tsui amli tsinabii lɛ.

⁵ Mɛi ni kɛ saŋku laa yakayaka lalai, ni amɛsɔ̃ɔ saŋkui tamɔ David nɔ lɛ amɛhãa amɛhe.

⁶ Mɛi ni kɛ kpuji wuji nuɔ wain, ni mu ni hi fe fɛɛ amɛkpaa, shi Israel hiɛkpãtãmɔ lɛ edɔɔɔ amɛ kwraa lɛ.

⁷ No hewɔ lɛ, amɛ tsutsu aaaŋɔ amɛ nom kɛaatee, ni no baahã ahoshwibɔlɔi lɛ ahoofeemɔ lɛ sɛɛ afo.

⁸ Nuŋtsɔ Nyɔŋmɔ lɛ ekã lɛ diɛŋtsɛ ehe kitã. Yehowa, Taiatsɛ lɛ, kɛɛ akɛ, “Miihi Israelbii ahewoo lɛ; ni miinyaŋe amɛmɔji fɛɛfɛji lɛ; no hewɔ lɛ, maŋɔ amɛmaŋ lɛ kɛ emli nii lɛ fɛɛ mahã.”

⁹ Aaaba mli akɛ kɛji shwɛ shĩa kome mli hii nyɔŋma kɛkɛ po lɛ, amɛbaagboi kɛ̃.

¹⁰ Ni kɛji mɛi ni egbo lɛ eko wekunyo, mɔ ni fuɔ lɛ, baaba koni ebawo gbonyo lɛ kɛje shĩa lɛ, wekunyo nɛɛ baabi mɔ ni yɔɔ shĩa lɛ mli akɛ, “Ani eshwɛ mɔ ko lolo hɔ shĩa lɛ mli fata ohe lo?” Mɔ lɛ aaahere nɔ akɛ, “Dabida!” Gbonyo lɛ wekunyo lɛ baakɛɛ akɛ, “Feemɔ diŋŋ. Wɔkwɛ jogbaŋŋ ni wɔkatsi Yehowa gbɛi tã.”

¹¹ Ejaakɛ Yehowa efã ni shĩa wulu fɛɛ shĩa wulu baawule butuu, ni shĩa bibioo hu baajwa.

¹² Ani okpɔŋɔ joɔ foi yɛ tɛsaa nɔ, aloo akɛ tsinahii huɔ yɛ ŋshɔ mli? Shi nyɛhã jalɛ etsɔ̃ ebɔɔ, ni jalɛ yibii etsɔ̃ taatso.

¹³ Nyɛnyaa yɛ Lo-Debar maŋ lɛ mli akɛ, “Ani jeee wɔ diɛŋtsɛ wɔhewalɛ mli wɔjɛ ni wɔshɔ̃ Karnaim maŋ lɛ?”

¹⁴ Yehowa, Taiatsɛ lɛ, diɛŋtsɛ kɛɛmɔ ji akɛ, “Israelbii, naa, mibatee maŋ ko shi mawo nyɛ koni amɛbaŋɔ nyɛshikpɔŋ lɛ. Maŋ nɛɛ baahao nyɛ kɛjɛ Lebo-Hamat yɛ kooyigbɛ, aahu kɛyashi ŋa kplenee ni atsɛɔ lɛ Araba Nujɔɔ lɛ naa yɛ wuoyigbɛ.”