Amos 5 - ŊMALƐ KRƆŊKRƆŊ LƐ

Tsuitsakemɔ he ehĩa

¹ Israelbii, nyɛboa yaafo lala ni miwoɔ nɔ yɛ nyɛhe nɛɛ toi.

² Israel oblayeiaŋ etã, egbee shi, ni eteŋ shi dɔŋŋ. Akwa lɛ yɛ eshikpɔŋ nɔ, ni mɔ ko bɛ ni woɔ enɔ.

³ Nuŋtsɔ Nyɔŋmɔ lɛ kɛɛ akɛ, “Maŋ ni baawo asraafoi akpe gbɛ kɛya ta lɛ, eeeshwɛ asraafoi oha pɛ ahã lɛ, ni maŋ ni woɔ asraafoi oha gbɛ lɛ, eeeshwɛ emɛi nyɔŋma pɛ ni aaaku amɛsɛɛ aba Israel we lɛ.”

⁴ Nɔ ni Yehowa kɛɔ Israelbii ji akɛ, “Nyɛtaoa mi misɛɛgbɛ, ni nyɛyi aaana wala,

⁵ shi nyɛkataoa Betel sɛɛgbɛ, ni nyɛkayaa Gilgal hu, aloo nyɛmitse mli kɛmiiya Beersheba; ejaakɛ abaaŋɔ Gilgalbii nom, ni Betel hiɛ baakpãtã.”

⁶ Nyɛtaoa Yehowa sɛɛgbɛ, ni nyɛyi baana wala. Kɛjeee nakai lɛ Yehowa aaaba tamɔ la ni eje yɛ Israelbii ateŋ, ni eeeshã nii. La nɛɛ baakpãtã Betel hiɛ, ni mɔ ko mɔ ko bɛ ni aaanyɛ agbe ahã Betel.

⁷ Kpoo hã nyɛ, nyɛ mɛi ni jalɛ saneyeli joɔ hãa nyɛ tamɔ taatso, nyɛ mɛi ni nyɛkɛ jalɛ saneyeli shwishwia shikpɔŋ!

⁸ Naa, mɔ ni bɔ ŋulamii, “Wuɔ kɛ ebii kɛ Oŋwɛ” mɔ ni hãa duŋ kpii tsɔ̃ɔ jetsɛremɔ, ni ehãa shwane woɔ duŋ ni etsɔ̃ɔ tamɔ nyɔŋ. Lɛ mɔ ni efãa ŋshɔ mli nu, ni efɔseɔ eshwieɔ shikpɔŋ lɛ hiɛ lɛ, Yehowa ji egbɛi.

⁹ Ehãa hewalɔ hiɛ kpãtãa kɛkɛ lɛ mɔɔ ni wa lɛ hu hiɛ ekpãtã.

¹⁰ Amɛnyɛɔ mɔ ni kãa mɔ hiɛ yɛ koishi, ni mɔ ni wieɔ anɔkwale lɛ, amɛhiɔ ehiɛ.

¹¹ Akɛni nyɛnaanaa ohiafo nɔ, ni nyɛtsuɔ lɛ abele onia fe bɔ ni sa hewɔ lɛ, nyɛkɛ tɛ ni ako emamɔ shĩai; shi moŋ nyɛhiŋ amɛmli; ni nyɛfeefee wain tromi fɛɛfɛji moŋ, shi nyɛnuŋ amɛmli wain.

¹² Ejaakɛ mile akɛ nyɛmlanɔtɔ̃mɔi lɛ fa, ni mile eshai ni nyɛfeefee anaawalɛ. Nyɛgbaa jalɔ naa, ni nyɛheɔ nyɔŋnii, ni nyɛŋmɛɛɛ gbɛ koni ohiafo kɛ esane ashɛ koishi koni aye ahã lɛ.

¹³ No hewɔ lɛ, mɔ ni le nii lɛ, efeɔ diŋŋ nɛkɛ be mli, ejaakɛ be lɛ be fɔŋ ni.

^14-15 Nyɛtaoa nɔ kpakpa, shi jeee nɔ fɔŋ, bɔ ni afee ni nyɛyi ana wala, kɛkɛ lɛ Yehowa, Taiatsɛ lɛ, kɛ nyɛ aaahi shi kpakpa; ni nyɛyea jalɛ sane yɛ koishi akɛ aleee nɔ Yehowa, Taiatsɛ lɛ, aaadro Yosef shwiei ni eshwɛ lɛ lo!

^16-17 No hewɔ lɛ, nɔ ni Yehowa, Taiatsɛ, ni ji Nuŋtsɔ lɛ, kɛɔ ji akɛ, “Abaawo yara yɛ blohui fɛɛ amli, ni aaabolɔ, ‘Ao, ao!’ Kɛnyiɛ gbɛjegbɛi lɛ anɔ. Abaatsɛ okwaafoi koni amɛbaye ŋkɔmɔ, ni abaatsɛ mɛi ni le yara nɔ yaafo jogbaŋŋ hu koni amɛbafo. Abaawo yara yɛ wain trom fɛɛ wain trom mli ejaakɛ matsɔ̃ nyɛteŋ kɛho kɛgbala nyɛ toi,” Yehowa kɛɛ.

¹⁸ Kpoo hã nyɛ, nyɛ mɛi ni nyɛshweɔ Yehowa gbi lɛ. Mɛni nyɛbaana yɛ Yehowa gbi lɛ nɔ? Naa, duŋ gbi ni, shi jeee la gbi ni:

¹⁹ nɔ ni baaba lɛ etamɔ mɔ ko ni joɔ jata naa foi, ni ekɛ oshishibrishi kpeɔ, loo be ni eba shĩa ni ekɛ enine mɔ gbogbo mli lɛ onufu kɔ̃ lɛ.

²⁰ Naa, Yehowa gbi lɛ duŋ aaawo, ni hulu etsoŋ; nakai gbi lɛ duŋ kpii aaawo bɔ ni la bɛ he ko he ko.

²¹ Miihi nyɛgbii juji lɛ; amɛjeee nɔ ko kɛhã mi; ni nyɛhe naa ni nyɛbuaa kɛjaa mi lɛ tete, mibɛ he miishɛɛ.

²² Nyɛshãa shãa afɔlei kɛ nyɛniyenii afɔlei tete nyɛhãa mi nɛ, shi miheee. Shidaa afɔlei ni nyɛkɛ nyɛkooloi ni eshwishwii shãa lɛ hu, mikwɛɛɛ po.

²³ Nyɛkɛ nyɛlalai lɛ ajea minɔ; mitaooo nyɛsaŋkui lɛ agbɛɛmɔ hu toi mabo.

²⁴ Nyɛyea jalɛ sane moŋ koni etsɔ̃ tamɔ nu ni hoɔ; nyɛhãa jalɛ ahea shi, ni etsɔ̃ tamɔ faa ni hoɔ daa.

²⁵ “Israelbii, mɛɛ kooloi afɔlei kɛ niyenii afɔlei nyɛshã nyɛhã mi yɛ shiaŋa lɛ nɔ afii nyɔŋmai ejwɛ lɛ?

²⁶ Nyɛbaawo nyɛmãgãi ni nyɛfee nyɛhã nyɛhe ni ji nyɛmaŋtsɛ Sakut kɛ Kaiwan hu nyɛtere;

²⁷ ni mahã aŋɔ nyɛ nom kɛya Damasko sɛɛ.” Nɔ ni Yehowa, mɔ ni gbɛi ji Taiatsɛ lɛ, kɛɛ nɛ.