Amos 4 - ŊMALƐ KRƆŊKRƆŊ LƐ

¹ Nyɛ Samaria yei ni nyɛshwishwii tamɔ Bashan tsinayei ni yɔɔ Samaria gɔji anɔ lɛ, nyɛboa wiemɔ nɛɛ toi. Te nyɛwaa ohiafoi ayi, ni nyɛshwishwiaa mɛi ni efĩ amɛ shi, ni nyɛkɛɔ nyɛwumɛi lɛ akɛ, “Nyɛyataoa nɔ ni wɔɔnu kɛba!”

² Naa, beiaŋ ni Nuŋtsɔ Nyɔŋmɔ lɛ yɔɔ krɔŋkrɔŋ lɛ, ekã kitã akɛ, “Gbii miiba ni akɛ kpoŋ baalalaa nyɛ, ni akpala nyɛteŋ mɔ fɛɛ mɔ kɛya. Nyɛbaatsɔ̃mɔ tamɔ loi ni tsɛ̃rɛ kpoji anaa.

³ Nyɛteŋ mɔ fɛɛ mɔ baanyiɛ kɛya ehiɛ tɛ̃ɛ, kɛyashɛ fɔji ni egbulɔ yɛ maŋ gbogboi lɛ amli lɛ ahe, ni aaahole nyɛ kɛtsɔ̃ fɔji nɛɛ amli atsirɛ ashwie Harmon,” Yehowa kɛɛ.

Israel ekaseee nii

⁴ “Nyɛ Israelbii, nyɛbaa Betel nyɛbatɔ̃a mla; nyɛyaa Gilgal nyɛyahãa mlanɔtɔ̃mɔ lɛ afaa; nyɛkɛ nyɛfɔlei abaa koni ashã daa leebi; ni nyɛkɛ nyɛnibii amlijaa nyɔŋma mli ekomekome lɛ abaa daa gbii etɛ̃.

⁵ Nyɛkɛ ma ni esha abashãa shidaa fɔlei lɛ, ni nyɛshiɛa kɛfoa shi akɛ nyɛshãa tsuijurɔ naa afɔlei hu, ejaakɛ nakai feemɔ ji nɔ ni ŋɔɔ nyɛnaa. Nuŋtsɔ Yehowa kɛɛ.

⁶ “Mi, mihã hɔmɔ ye nyɛ, ni daaŋtaa bɔ nyɛ yɛ nyɛmaji lɛ amli lɛ; aboloo hɔmɔ ye nyɛ, shi fɛɛ sɛɛ lɛ nyɛkpaleko kɛbako miŋɔɔ.” Yehowa kɛɛ.

⁷ “Asaŋ be ni eshwɛ nyɔji etɛ̃ ni akɛkpaa ŋmɔshinii lɛ tete mihãaa nu anɛ nyɛ. Mihã nu nɛ maŋ kome ko nɔ, shi mihãaa enɛ maŋ ko hu nɔ. Nu nɛ ŋmɔ ko shi, ni nu enɛɛɛ ŋmɔ ko hu shi, no hewɔ lɛ, ŋmɔ ni enɛɛɛ mli lɛ mli nii ŋala.

⁸ Maji enyɔ loo etɛ̃ mli bii didãa kɛ kumai kɛyagbee maŋ ko nɔ koni amɛyatao nu ni amɛnu; shi nu ni amɛyana lɛ eyashɛɛɛ amɛnaa. Shi kɛ̃lɛ nyɛkpaleko kɛbako miŋɔɔ,” Yehowa kɛɛ.

⁹ “Mihã kɔɔyɔɔ kɛ emli dɔlɛ fã, ni eŋala nyɛŋmɔshinii, ni baalabii kpãtã nyɛbɔ̃ɔi kɛ nyɛwain tromi kɛ nyɛgbami tsei kɛ nyɛmu tsei bluublu ahiɛ; shi kɛ̃lɛ nyɛkpaleko kɛbako miŋɔɔ.” Yehowa kɛɛ.

¹⁰ “Mihã gbele hela tamɔ Ijipt hela lɛ bote nyɛteŋ, ni mihã nyɛblahii lɛ nyɔnyɔɔ yɛ ta mli, ni ashɔ̃shɔ̃ɔ nyɛkpɔŋɔi yɛ nyɛdɛŋ kɛtee. Mihã nyɛgbohii ni jwere nyɛnsrai amli lɛ je fu wo nyɛ. Shi fɛɛ lɛ nyɛkpaleko kɛbako miŋɔɔ.”

¹¹ Yehowa kɛɛ akɛ, “Mikpãtã nyɛteŋ mɛi komɛi ahiɛ tamɔ mifee Sodom kɛ Gomora lɛ. Nyɛ mɛi ni nyɛyi na wala lɛ, nyɛtsɔ̃mɔ tamɔ la tso ni afã yɛ la naa; ni kɛ̃lɛ nyɛkpaleko kɛbako miŋɔɔ.

¹² No hewɔ lɛ, Israelbii, agbɛnɛ mibagbala nyɛ toi. Ni akɛni mibafee nyɛ nakai hewɔ lɛ, nyɛsaa nyɛhe nyɛkɛkpea nyɛNyɔŋmɔ lɛ dɛŋ toigbalamɔ naa.”

¹³ Naa, mɔ ni shɔ̃ gɔji lɛ, ni ebɔ kɔɔyɔɔ, ni egbaa gbɔmɔ nɔ ni ji lɛ Nyɔŋmɔ lɛ eyiŋtoo. Lɛ mɔ ni ehãa jetsɛremɔ tsɔ̃ɔ duŋ, ni enyiɛɔ shikpɔŋ lɛ nɔ hei grɔŋŋi lɛ, Egbɛi ji Yehowa, Taiatsɛ.