Bɔfoi 7 - ŊMALƐ KRƆŊKRƆŊ LƐ

Stefano shiɛmɔ

¹ Ni osɔfonukpa lɛ bi Stefano akɛ, “Ani saji nɛɛ yɛ mli nakai lo?”

² Ni ekɛɛ, “Anyɛmimɛi kɛ Ataamɛi, nyɛboa toi! Anunyam Nyɔŋmɔ lɛ jie ehe kpo etsɔ̃ɔ wɔtsɛ Abraham be ni eyɔɔ Mesopotamia, ni enako ebahi Haran lɛ,

³ ni ekɛɛ lɛ akɛ, ‘Jee oshikpɔŋ lɛ nɔ kɛ owekumɛi ateŋ kɛya shikpɔŋ ni matsɔ̃ɔ bo lɛ nɔ.’

⁴ Kɛkɛ ni eje Kaldeabii lɛ ashikpɔŋ lɛ nɔ ni eyahi Haran. Ni be ni etsɛ gbo sɛɛ lɛ, Nyɔŋmɔ fã lɛ kɛjɛ jɛi kɛba nɛkɛ shikpɔŋ ni nyɛyɔɔ nɔ amrɔ nɛɛ nɔ;

⁵ ni ehãaa lɛ nɔyelinɔ ni ji shikpɔŋ ni shɛɔ nane tokota lɛɛmɔ tete, shi ewo lɛ shi akɛ ekɛaahã lɛ kɛ eshwiei ni baaba yɛ esɛɛ lɛ akɛ amɛnɔ, tsɛ no mli lɛ ebɛ bi kwraa po.

⁶ Shi bɔ ni Nyɔŋmɔ kɛ lɛ wie ji akɛ, eshwiei lɛ aaayato gbɔ yɛ maŋsɛɛ shikpɔŋ ko nɔ, ni aaafee amɛ nyɔji ni aaawa amɛ yi afii ohai ejwɛ.

⁷ Shi Nyɔŋmɔ kɛɛ, ‘Makojo nakai maŋ ni amɛaayasɔ̃mɔ lɛ, ni no sɛɛ lɛ amɛaaje jɛi ni amɛaabaja mi yɛ biɛ nɛɛ.’

⁸ Ni ekɛ ketiafoo he kpãŋmɔ lɛ hã lɛ; ni no hewɔ efɔ Isak ni efo lɛ ketia gbi ni ji kpaanyɔ lɛ nɔ lɛ; ni Isak fɔ Yakob, ni Yakob hu fɔ blematsɛmɛi nyɔŋma kɛ enyɔ lɛ.

⁹ Ni blematsɛmɛi lɛ kɛ hiɛkɔ̃ɔ hɔ̃ɔ Yosef kɛtee Ijipt, shi Nyɔŋmɔ kɛ lɛ yɛ,

¹⁰ ni ejie lɛ yɛ emanehului fiaa mli, ni ehã ehiɛ ba nyam, ni efee nilelɔ yɛ Ijipt maŋtsɛ Farao hiɛ, ni ewo lɛ lumɔ yɛ Ijipt kɛ lɛ diɛŋtsɛ ewe lɛ fɛɛ nɔ.

¹¹ “Shi hɔmɔ kɛ amanehulu kpeteŋkple ba Ijipt kɛ Kanaan shikpɔŋ lɛ fɛɛ nɔ, ni wɔtsɛmɛi lɛ naaa nii amɛye.

¹² Ni be ni Yakob nu akɛ abele yɛ Ijipt lɛ, klɛŋklɛŋ lɛ etsu wɔtsɛmɛi lɛ kɛtee.

¹³ Ni nɔ ni ji shii enyɔ lɛ nɔ lɛ, Yosef hã enyɛmimɛi lɛ yoo lɛ, ni Farao hu bale Yosef weku lɛ.

¹⁴ Ni Yosef tsu ayakpee etsɛ Yakob kɛ eweku lɛ fɛɛ kɛba; amɛyi nyɔŋmai kpawo kɛ enumɔ.

¹⁵ Ni Yakob yiŋ etee Ijipt, ni lɛ kɛ wɔtsɛmɛi lɛ yagboi yɛ jɛi.

¹⁶ Akɛ amɛgbohii lɛ ba Shekem, ni abato amɛ yɛ fuuhe ni Abraham tse shika he yɛ Hamorbii lɛ adɛŋ yɛ Shekem lɛ mli.

¹⁷ “Shi be ni bè ni Nyɔŋmɔ baaye eshi ni ewo Abraham lɛ nɔ lɛ shɛ lɛ, maŋ lɛ shwere, ni amɛyi fa yɛ Ijipt shikpɔŋ lɛ nɔ,

¹⁸ kɛyashi beyinɔ ni maŋtsɛ kroko ni leee Yosef lɛ bate shi yɛ Ijipt.

¹⁹ Maŋtsɛ nɛɛ, ekɛ wɔjakubii lɛ ye ŋaa mli ni efee wɔtsɛmɛi lɛ efɔŋ, akɛ ehã amɛshɛrɛ amɛbii abifabii amɛshwie, bɔ ni afee ni amɛkahi jeŋ.

²⁰ Nakai be lɛ mli afɔ Mose, ni ehe yɛ fɛo yɛ Nyɔŋmɔ hiɛ, ni alɛ lɛ yɛ etsɛ we lɛ nyɔji etɛ̃.

²¹ Ni be ni ashɛ lɛ afɔ̃ lɛ, Farao biyoo lɛ yawo lɛ, ni elɛ lɛ ekɛ lɛ fee lɛ diɛŋtsɛ ebi.

²² Ni atsɔ̃ɔ Mose Ijipt nilee fɛɛ, ni efee mɔ ko ni yɔɔ hewalɛ yɛ ewiemɔi kɛ enitsumɔi amli.

²³ “Be ni eye afii nyɔŋmai ejwɛ lɛ, eba eyiŋ akɛ eeeyasara enyɛmimɛi Israelbii lɛ.

²⁴ Be ni ena akɛ aafee amɛteŋ mɔ ko efɔŋ lɛ, efã ehe, ni etɔ mɔ ni afeɔ lɛ efɔŋ lɛ he owele ni egbe Ijiptnyo lɛ.

²⁵ Ni esusu akɛ kulɛ enyɛmimɛi lɛ aaayoo sɛɛ akɛ Nyɔŋmɔ miitsɔ enine nɔ ehere amɛ; shi amɛyooo sɛɛ.

²⁶ Ni enɔ jetsɛremɔ lɛ ebanina amɛteŋ mɛi enyɔ ni amɛmiinɔ, ni ekpãtã amɛ ekɛɛ, ‘Ataamɛi, nyɛ lɛ nyɛmimɛi ji nyɛ; mɛɛba nyɛfeɔ nyɛhe efɔŋ nɛɛ?’

²⁷ Shi mɔ ni feɔ enaanyo efɔŋ lɛ tsirɛ lɛ ni ekɛɛ, ‘Namɔ wo bo wɔnɔ lumɔ kɛ kojolɔ?

²⁸ Ani ootao akɛ ogbe mi tamɔ bɔ ni nyɛ lɛ ogbe Ijiptnyo lɛ?

²⁹ Ni wiemɔ nɛɛ hewɔ lɛ Mose jo foi, ni eyato gbɔ yɛ Midian shikpɔŋ lɛ nɔ, ni efɔ bihii enyɔ yɛ jɛi.

³⁰ “Shi be ni shɛ afii nyɔŋmai ejwɛ lɛ, Nuŋtsɔ lɛ bɔfo ko bajie ehe kpo etsɔ̃ɔ lɛ yɛ Sinai Gɔŋ lɛ he ŋa lɛ nɔ yɛ ŋmeitso ko lalilɛi mli.

³¹ Be ni Mose na lɛ, ehiɛ fee lɛ yaa yɛ ninaa lɛ hewɔ; ni be ni etsiɔ ebɛŋkɛ ni ekwɛ lɛ enu Nuŋtsɔ lɛ gbee ni eekɛɛ lɛ akɛ,

³² ‘Mi ji otsɛmɛi aNyɔŋmɔ lɛ, Abraham kɛ Isak kɛ Yakob Nyɔŋmɔ lɛ.’ Ni Mose he kpokpo ni ekaaa akɛ eeeyakwɛ.

³³ Ni Nuŋtsɔ lɛ kɛɛ lɛ akɛ, ‘Jiemɔ otokotai lɛ yɛ onane, ejaakɛ he ni odamɔ lɛ shikpɔŋ krɔŋkrɔŋ ni.

³⁴ Mina mimaŋ ni yɔɔ Ijipt lɛ amanehulu lɛ, amɛŋtsɔidɔɔmɔ lɛ hu minu; ni mikpeleke shi miba amɛ jiemɔ; no hewɔ lɛ, ba ni matsu bo Ijipt.’

³⁵ “Nɛkɛ Mose nɛɛ nɔŋŋ ni amɛkwa lɛ amɛkɛɛ, ‘Namɔ wo bo wɔnɔ lumɔ kɛ kojolɔ’ lɛ, lɛ nɔŋŋ Nyɔŋmɔ tsɔ̃ bɔfo lɛ ni jie ehe kpo etsɔ̃ɔ lɛ yɛ koo lɛ mli lɛ nine nɔ etsu lɛ akɛ lumɔ kɛ kpɔlɔ.

³⁶ Ni lɛ nɔŋŋ ekpala amɛ kɛje kpo, ni efee naakpɛɛnii kɛ okadii yɛ Ijipt shikpɔŋ lɛ nɔ kɛ Ŋshɔ Tsuru lɛ mli kɛ ŋa lɛ nɔ afii nyɔŋmai ejwɛ lɛ.

³⁷ Lɛ ji nakai Mose lɛ ni kɛɛ Israelbii lɛ akɛ, ‘Nuŋtsɔ, nyɛNyɔŋmɔ lɛ aaatee gbalɔ ko ni tamɔ mi shi kɛaajɛ nyɛnyɛmimɛi lɛ ateŋ ahã nyɛ’ lɛ.

³⁸ Mose ji mɔ ni kɛ asafo lɛ hi ŋa lɛ nɔ, ni edamɔ bɔfo ni kɛ lɛ wie yɛ Sinai Gɔŋ lɛ nɔ lɛ kɛ wɔtsɛmɛi lɛ ateŋ, ni ehe wala wiemɔi lɛ ni ekɛbahã wɔ lɛ.

³⁹ “Shi wɔtsɛmɛi lɛ ekpɛlɛ̃ɛɛ ni amɛbo lɛ toi, ni amɛtsi lɛ amɛto afã, ni amɛtsui kpale kɛtee Ijipt ekoŋŋ;

⁴⁰ ni amɛkɛɛ Aaron akɛ, ‘Feemɔ nyɔŋmɔi ohã wɔ ni amɛnyiɛ wɔhiɛ, ejaakɛ nɛkɛ Mose nɛɛ ni kpala wɔ kɛjɛ Ijipt shikpɔŋ lɛ nɔ lɛ, wɔleee nɔ ni efee lɛ.’

⁴¹ Nakai be lɛ mli amɛfee tsinabi amãgã, ni amɛshã afɔle amɛhã lɛ, ni amɛna amɛ diɛŋtsɛ amɛnine naa nitsumɔi lɛ ahe tsuijurɔ.

⁴² Shi Nyɔŋmɔ tsi ehe kɛjɛ amɛhe ni eŋmɛɛ amɛhe akɛ amɛja ŋwɛinii, tamɔ bɔ ni aŋma yɛ gbalɔi lɛ awolo lɛ mli akɛ, ‘Nyɛ Israel we, ani nyɛshã kooloi afɔle kɛ niyenii afɔle nyɛhã mi yɛ ŋa lɛ nɔ afii nyɔŋmai ejwɛ lɛ?

⁴³ Dabida, Molok buu lɛ moŋ nyɛwo nyɛtere kɛ nyɛnyɔŋmɔ Refan lɛ ŋulami lɛ ni ji amãgãi ni nyɛshɔ ni nyɛja amɛ lɛ. Shi Babilon sɛɛ maloo nyɛ kɛaatee.’

⁴⁴ “Wɔtsɛmɛi lɛ hiɛ Odase Buu lɛ yɛ ŋa lɛ nɔ. Afee lɛ tamɔ bɔ ni mɔ ni kɛ Mose wie lɛ tsɔ̃ɔ akɛ efee lɛ lɛ, no ji efee lɛ tamɔ nɔ ni ena lɛ.

⁴⁵ Buu nɛɛ, be ni wɔtsɛmɛi ni ba yɛ sɛɛ lɛ hu anine shɛ nɔ lɛ, amɛkɛ Yoshua hiɛ kɛba jeŋmaji ni Nyɔŋmɔ shwie amɛ yɛ wɔtsɛmɛi lɛ ahiɛ lɛ ashikpɔŋ lɛ nɔ. Ni ehi shi kɛbashi David yinɔ.

⁴⁶ David nɛɛ hiɛ ba nyam yɛ Nyɔŋmɔ hiɛ, ni ekpa fai ni ahã emã shihilɛhe ko eha Yakob Nyɔŋmɔ lɛ.

⁴⁷ Shi Solomon ji mɔ ni mã tsu ehã lɛ.

⁴⁸ “Tsɛbelɛ Ŋwɛinyo lɛ ehiii tsui ni akɛ niji fee amli, tamɔ bɔ ni gbalɔ lɛ hu kɛɛ lɛ,

⁴⁹ ‘Ŋwɛi lɛ, misɛ̃i ni,’ Nuŋtsɔ lɛ kɛɛ, ‘ni shikpɔŋ lɛ, minaneshi maaŋoo ni. Mɛɛ tsu nyɛaama nyɛhã mi mɔ, Asaŋ nɛgbɛ ji mihejɔɔmɔhe lɛ?

⁵⁰ Aso jeee minine fee enɛɛmɛi fɛɛ?’

⁵¹ “Nyɛ kuɛŋtilɔi kɛ tsuiiaŋ kɛ toiiaŋ foolɔi! Nyɛ lɛ, daa nɛɛ nyɛkuɔ Mumɔ Krɔŋkrɔŋ lɛ naa; bɔ ni nyɛtsɛmɛi lɛ fee lɛ, nakai nyɛ hu nyɛfeɔ.

⁵² Gbalɔi lɛ ateŋ namɔ ni nyɛtsɛmɛi lɛ waaa lɛ yi? Amɛgbe mɛi ni gba yɛ jalɔ lɛ baa lɛ he amɛto lɛ. Ni agbɛnɛ nyɛ nyɛtsɔ̃ɔ esɛɛgbɛ ni nyɛgbe lɛ,

⁵³ nyɛ ni nyɛna Mla lɛ kɛtsɔ ŋwɛi bɔfoi anɔ, ni nyɛyeee nɔ lɛ.”

Stefano gbele

⁵⁴ Shi be ni amɛnu nɛkɛ wiemɔi nɛɛ lɛ, etsurɔ amɛtsuiiaŋ, ni amɛkpe amɛnyanyɔji ashishi kɛ mlifu.

⁵⁵ Shi Stefano ni Mumɔ Krɔŋkrɔŋ eyi lɛ obɔ̃ lɛ kwɛ ŋwɛi gãa, ni ena Nyɔŋmɔ anunyam lɛ kɛ Yesu ni edamɔ Nyɔŋmɔ ninejurɔ nɔ,

⁵⁶ ni ekɛɛ, “Naa, miina ŋwɛi naa ni egbele, kɛ Gbɔmɔ Bi lɛ ni edamɔ Nyɔŋmɔ ninejurɔ nɔ.

⁵⁷ Shi amɛbolɔ kɛ gbee ni wa, ni amɛtsimɔ amɛtoii, ni amɛkɛ jwɛŋmɔ kome ke kɛbashwie enɔ,

⁵⁸ ni amɛtsirɛ eyi sɛɛ kɛje maŋ lɛ mli, ni amɛyatswia lɛ tɛi. Ni odasefoi lɛ kɛ amɛmamai lɛ shwie oblanyo ko ni atsɛɔ lɛ Saul lɛ najianaa.

⁵⁹ Ni be ni amɛtswiaa Stefano tɛi lɛ, ebo etsɛ Yesu ni ekɛɛ, “Nuŋtsɔ Yesu, heremɔ mimumɔ lɛ!”

⁶⁰ Ni ekula shi, ni ebo kɛ gbee ni wa akɛ, “Nuŋtsɔ, kaawo amɛ nɛkɛ esha nɛɛ he nyɔmɔ!” Ni be ni ekɛɛ nɛkɛ lɛ, etsɔ̃ mli ewɔ.